Jıyn barysynda Bas prokýror, Ulttyq qaýipsizdik komıtetiniń tóraǵasy jáne Ishki ister mınıstriniń mindetin atqarýshy tulǵa baıandama jasady.
Memleket basshysyna quqyq qorǵaý organdary men Qarýly Kúshterdiń elimizdegi quqyqtyq tártip pen zańdylyqty qalpyna keltirýine qatysty qabyldanǵan sharalar men óńirlerdegi tótenshe jaǵdaı rejıminiń saqtalýyn qamtamasyz etý jumystary týraly baıandaldy. Blok beketter ornatylyp, UQShU-ǵa múshe memleketterdiń birikken bitimgerlik kúshterine birqatar strategııalyq nysandy kúzetý tapsyryldy. Kúshtik qurylymdar eldi mekenderde «tazalaý» jumystaryn jalǵastyryp jatyr. Lańkesterdiń ornalasqan jerin anyqtaý, ustaý, olarǵa qatysty qujattar men málimetterdi jınaý jáne tıisti saraptama jasaý jóninde shuǵyl sharalar atqarylýda.
Qazir 125 qylmystyq is qozǵalǵan. Polısııa organdaryna 5,8 myń adam jetkizilgen. Olardyń arasynda kóptegen sheteldik azamat bar.
Jıynda elimizdiń barlyq óńirlerinde ahýaldyń turaqtanǵany, jaǵdaıdyń baqylaýǵa alynǵany jáne quqyq qorǵaý organdary ákimshilik ǵımarattardyń bárin lańkesterden tazartqany týraly aıtyldy. Kommýnaldyq jáne tirshilikke qajetti basqa da nysandar qalpyna keltirilip jatyr.
Qasym-Jomart Toqaev kúshtik qurylymdardyń elimizdegi qoǵamdyq tártip pen qaýipsizdikti tolyq qalpyna keltirý úshin barlyq qajetti sharalardy qabyldaıtynyn atap ótti.
Otyrys barysynda Memleket basshysy tártipsizdikterdiń saldarynan kelgen shyǵyndardy qalpyna keltirý úshin Úkimettik komıssııa qurýdy tapsyrdy.
Prezıdent Almaty qalasy men basqa da óńirlerdiń ákimshilik ǵımarattaryn, áleýmettik jáne kommýnaldyq nysandaryn qalpyna keltirý jumystaryna jedel kirisýdi tapsyrdy.
