Úkimet basshysy Prezıdent Qasym-Jomart Toqaev memlekettik qoldaý sharalaryn kórsetý tásilderi men keıbir damý ınstıtýttarynyń qyzmetin túbegeıli qaıta qaraýdy tapsyrǵanyn eske salyp, Ulttyq ekonomıka mınıstrligine memlekettik organdarmen jáne «Atameken» kásipkerler palatasymen birlesip, shaǵyn jáne orta bızneske memlekettik qoldaý sharalaryn kórsetýdiń ashyq ári túsinikti mehanızmin barynsha qysqa merzimde daıyndaýdy júktedi.
«Úshinshi. Ulttyq ekonomıka mınıstrligi Ulttyq bankpen jáne «Atameken» kásipkerler palatasymen birlesip, ınflıasııaǵa qarsy áreket etý sharalarynyń keshenin jańartyp, Qaýly jobasy Úkimetke engizsin.
Tórtinshi, «Samuryq-Qazyna» qorynyń satyp alý tártibin túbegeıli qaıta qaraý qajet. Munda bir kózden alý tásilimen memlekettik satyp alý úlesin qysqartý máselesin pysyqtaý kerek. Qarjy mınıstrligi atalǵan tásilmen memlekettik satyp alýdyń negizdiligi boıynsha tıisinshe baqylaýdy qamtamasyz etsin», dedi Álıhan Smaıylov.
Sondaı-aq, ol «Samuryq-Qazyna» qoryn Qarjy mınıstrligimen, Básekelestikti qorǵaý agenttigimen birlesip, qor men onyń enshiles kompanııalarynyń satyp alýdy júzege asyrý prosesin bir qujat deńgeıinde qaıta qaraýǵa mindettedi.
