Úkimet otyrysynda Densaýlyq saqtaý mınıstri Ajar Ǵınııat eldegi sanıtarlyq-epıdemıologııalyq ahýaldyń nasharlaǵanyn habarlady.
«Qyzyl aımaqqa» qaıta engen Nur-Sultan, Almaty, Shymkent qalalarynda jáne Atyraý oblysynda koronavırýs ınfeksııasymen syrqattanýdyń kúrt óskeni baıqaldy. Al Aqtóbe, Batys Qazaqstan, Qaraǵandy, Qyzylorda, Pavlodar jáne Mańǵystaý oblystary «sary aımaqta» ornalasqan.
Búgingi tańda 9,4 mln astam adam vaksınanyń birinshi komponentin, 8,7 mln-nan astam adam ekinshi komponentin aldy. 670 myńǵa jýyq adam revaksınasııadan ótti.
«Bizdiń negizgi mindetimiz – epıdemıologııalyq ahýaldy baqylaýda ustaý. Halyqtyń sanıtarııalyq-epıdemıologııalyq talaptardy saqtaýy boıynsha sharalardy kúsheıtý qajet», dedi Álıhan Smaıylov.
Úkimet basshysy Densaýlyq saqtaý mınıstrligine, ákimdikterge PTR-testileý sanyn ulǵaıtýdy, jedel monıtorıng júrgizip, medısına qyzmetkerleri men aýrýhanalarda rezervtik oryndardyń daıarlyǵyn qamtamasyz etýdi, sondaı-aq dári-dármek pen medısınalyq buıymdardyń jetkilikti bolýyn qadaǵalaýdy tapsyrdy.
Premer-Mınıstr úıde medısınalyq kómek kórsetý úshin mobıldi brıgadalardyń jumysyn jandandyryp, olardy tegin dári-dármekpen qamtamasyz etý qajet ekenin, sonymen qatar dárihanalarda dári-dármektiń tapshylyǵyna jol bermeý sharalaryn qabyldaý qajettigine toqtaldy.
Álıhan Smaıylov Densaýlyq saqtaý mınıstrligi men ákimdikterge halyqty revaksınasııalaý qarqynyn edáýir arttyrýdy tapsyrdy. О́ńirlerdiń ákimderi bul máseleni jeke baqylaýyna alýy tıis.
Sondaı-aq Úkimet basshysy elimizdiń barlyq medısına qyzmetkerlerine rızashylyǵyn bildirdi.
«El úshin syn saǵatta olar zardap shekkender men jaralanǵandarǵa táýlik boıy kómek kórsetip jatyr. Dárigerler aýrýhanalar men jedel járdem kólikterin basyp alǵan lańkesterdiń agressııasyn bastan keshirdi. Qurmetti medısına qyzmetkerleri, sizderge eńbekterińiz ben batyldyq tanytqandaryńyz úshin, kez kelgen jaǵdaıda halyqqa kómek kórsetýge ázirlikterińiz úshin alǵys aıtamyz!», dedi Álıhan Smaıylov óz sózinde.
