Ejelden aýyly aralas, qoıy qoralas jatqan, Alataýdyń kúngeıi men teriskeıin qonys etken qos halyqtyń tarıhı tamyrlastyǵy, baýyrlastyǵy ǵasyrlar boıy ajyraǵan emes.
Tarıhty alyp qarasaq, jyr alyby Jambyl men qyrǵyz aqyny Toqtaǵuldyń aradan qyl ótpes dostyǵy da búgingi urpaq úshin óshpes úlgi men ónege. Qazaqstanda oryn alǵan qaraly qańtardyń qasireti qyrǵyz aǵaıynnyń da janyna batty. Baıyrǵydan kele jatqan baýyrlarymyz áleýmettik jeliler arqyly qazaq baýyrlaryna kóńilqos aıtyp, jyr arqyly jubatýda.
Iýtýb jelisinde alǵashqylardyń biri bolyp ún qatqan Narynbek Kalybaev eki eldiń baýyrlastyǵyn ánmen kestelepti.
«Qalpaqtyń aq-qarasyndaı,
Qazaqtyń keń dalasyndaı,
Qyrǵyz-qazaq bir týǵan el,
Bir atanyń balasyndaı (eki ret).
Qomyz menen dombyrasy,
Shańǵa tolǵan taý arasy,
Yrdap barsam baýyryma,
Tosyp alar keń dalasy.
At jalynda oınap ósken,
Ata-babam bolǵan kóshpen,
Jambyl menen Toqtoǵuldaı,
Qanshalaǵan asyl ótken», degen án arqyly qazaq dalasyna sálem joldapty.
Áleýmettik jelide taraǵan taǵy bir beınejazbada:
«Qanatyndaı bir qustyń,
Qazaq-qyrǵyz elderi,
Bir qanaty synsa eger,
Usha almas qusym jerdegi.
Terbelip tursyn tynyshtyqta,
Tamyrlas qazaq el-jeri.
Qazaq bóbek jylasa,
Qyrǵyz eneniń syzdaıdy emshegi.
Jan birge jaqyn qazaǵym,
Jamannyń tarttyń azabyn.
Týǵaly qımas qazaǵym,
Turmystyń tarttyń azabyn.
Dúrbeleń túsip zamatta,
Dúnıeniń burdyń nazaryn.
О́zegim kúıdi, shoq boldy,
О́rtengen kezde bazaryń,
Qantógý bolyp kútýsiz,
Qanshalar tapty ajalyn», degen joldar arqyly qyrǵyz baýyrlar bizdiń eldegi jaǵdaıǵa nazar aýdaryp, kóńilderin bildirgen.
