– Qyzylorda qalasynda «Kompas», «Sinooil», «GazEnerdjı» janar-jaǵarmaı beketterine, «Sultan», «Frıstaıl», «Birlik», «Al-asad» saýda úıleriniń ǵımarattaryna, tólem termınaldaryna, «M-lombard» ǵımaratyna zalal keltirilip, múlikterin (azyq-túlik, altyn buıymdary, aqsha) tonaý faktileri oryn alǵan. Keltirilgen zalaldyń kólemin naqty aıtý qıyn. Degenmen palata men oblystyq basqarmaǵa habarlasyp, ótinishterin qaldyryp jatqan kásipkerlerdiń sózderine súıensek, zalaldyń jalpy somasy 395,4 mln teńgeni quraıdy. Shyǵyndar áli de bolsa eseptelýde. Baılanys túzetilgen soń, biz kásipkerlermen habarlasyp, tolyq aqparat pen dáleldeıtin qujattardy alamyz. Sondyqtan, kásipkerlerden zalaldy dáleldeý úshin barlyq derekterdi foto jáne vıdeo arqyly tirkeýdi suraımyz, – deıdi oblystyq kásipkerler palatasynyń dırektory Ǵalymbek Jaqsylyqov.
Oblystyq polısııa departamentiniń bastyǵy, aýmaqtyq komendant Bektóre Sultannyń buıryǵyna sáıkes Qyzylordada komendanttyq saǵat engizildi (saǵ. 23.00-den 07.00-ge deıin). Buıryqqa saı:
– oblys kóleminde azyq-túlik dúkenderi jáne dárihanalardyń jumys ýaqyty saǵat 09.00-den 18.00-ge deıin;
– oblys kóleminde alkogoldik ónimderdiń satylýyna tyıym salyndy;
– oblys kóleminde kafe-barlar, meıramhanalar, qoǵamdyq monshalar, saýnalar, sporttyq uıymdar, oıyn-saýyq ortalyqtarynyń jumysyna tyıym salyndy.
Atalǵan buıryqtyń oryndalý merzimi jaǵdaı turaqtalyp, arnaıy sheshim qabyldanǵanǵa deıin kúshinde saqtalady.
– Qala turǵyndary men qonaqtaryn, kásipkerlerdi qaýipsizdik sharalaryn, komendanttyq saǵatty qatań ustanyp, tártip saqtaýǵa shaqyramyn. Prezıdenttiń saıası ustanymynyń jáne tıimdi sheshimderiniń nátıjesinde elimizde tynyshtyq ornap, qalypty ómirimizge qaıta oralamyz dep senemin, – dedi Ǵ.Jaqsylyqov.
