KIMEP nemese Nazarbaev Ýnıversıteti bolsyn, bári sheteldik ǵalymdardyń, sheteldik bilim berý menedjmentiniń ozyq úlgilerinde bolmasa da, zamanaýı úlgilerge saı iske asyp jatyr. Sondyqtan endigi ashylatyn oqý oryndary mindetti túrde sheteldik oqý oryndarynyń úlgisimen, solardyń fılıaly retinde ashylǵany jón dep oılaımyn. Jáne olar ár óńirde bolsa, artyqtyq etpeıdi.
Sonymen qatar Memleket basshysy «Qazaqstan halqyna» qoǵamdyq áleýmettik qory qurylatynyn atap ótti. Bul muqtaj azamattardy jan-jaqty qoldaýǵa baǵyttalǵan aýqymdy joba bolmaq. Atalǵan qor eshbir memlekettik organǵa qaramaıtyn, derbes, naǵyz halyqtyq sıpatta bolady. Bilikti baqylaýshysy bar jaýapty basshy taǵaıyndalyp, qyzmeti men bıýdjeti buqaraǵa ashyq júrgiziledi. «Qazaqstan halqyna» qoryna elimizdegi iri bıznes nysandary, aýqymdy kompanııalar men aýqatty tulǵalar júıeli túrde aýdarym jasap turýy tıis. Prezıdenttiń aıtýynsha, halyq ózine tıesili úlesti alatyn kez jetti. Osy kezde buǵan deıin iske asyp kelgen «Ulttyq qor» ne bolady, onda qansha qarajat qaldy, ol qalaı jumys isteıdi degen zańdy suraq týyndaıtyny taǵy bar.
Ultymyzdyń, mádenıetimizdiń tiregi qazaq tili ekeni anyq. Qazaq tiline baılanysty áli de bolsa, joǵarǵy bılikte túbegeıli, naqty ustanym joq. Áli de bolsa jaltaqtaý, áli de bolsa qazaq tilin basqa da bir saıası-ekonomıkalyq múddelerge qurbandyqqa shalý bolyp otyr. Sondyqtan osyǵan baılanysty kóńil tolarlyqtaı jaǵdaı joq.
Tálim-tárbıe, bilim berýdiń naqty ınstrýmentteriniń biri – sport. Mysaly, sportqa baılanysty áli de bolsa qordalanǵan máseleler kóp. Olardyń ishinde jattyqtyrýshylardyń jetispeýshiligi, qazirgi bar bapkerlerdiń basym bóligi – orystildi mamandar. Sondyqtan búgingi tańda elordada nemese basqa bir iri qalada, múmkin bir ortalyqta bola ma eken, qazaq ulttyq sport akademııasy ashylýy kerek. Jáne ol jerdegi bilim berý baǵdarlamalary tek qana deneshynyqtyrý pániniń muǵalimi emes, jattyqtyrýshy degen biliktilik beretindeı baǵdarlamalar bolsa eken. Osyǵan kirisetin ýaqyt jetti dep oılaımyn.
Prezıdent óz sózinde áskerı kúshterdiń, arnaıy jasaqtardyń jumysyn reformalaý, jańa baǵytta jumys júrgizý sııaqty máselelerdi kóterdi. Bul durys. Osyny paıdalanyp búginde qajetsiz, urys-soǵys kezinde túk paıdasy joq aýyr tehnıka sııaqty salalarǵa ońtaılandyrý kerek. Bul rette shekarany kúsheıtý, barlaý qyzmetterine basa nazar aýdarylýy tıis.
Jalpy, qorytyndylaıtyn bolsaq, meniń oıymsha halyq keshegi jıynǵa qulaǵyn túrip, túbegeıli ózgerister bolady dep kútken sııaqty. Prezıdent eldiń arqasynda baılyqqa kenelgender týraly qatań da, qatal oılaryn jetkizdi. Bul aqıqat. Otyz jyl qazynamyz ustaǵannyń qolynda, tistegenniń aýzynda ketti. Endi osyǵan tosqaýyl bolýy kerek dep oılaımyn.
Ramazan SATTARULY,
áleýmettanýshy
