Koronavırýs • 18 Qańtar, 2022

«Qyzyl aımaqqa» qaıta endi

42 ret kórsetildi

Koronavırýs matrısasy boıynsha «sary aımaqqa» kirgenine úsh-aq kún bolǵan Batys Qazaqstan oblysy 14 qańtarda eń qaýipti «qyzyl aımaq» qataryna qosyldy.

Jańa jyldyń 13 kúninde óńirde 537 adamǵa COVID-19 dıag­nozy qoıylǵan. Al jalpy epıdemııa bastalǵaly oblysta 40 607 adam COVID-19 juqtyryp, 15 282 adam ınfeksııalyq stasıo­narlarda em alǵan. 857 adam osy dertten kóz jumdy.

«Batys Qazaqstan oblysynda 13 qańtar kúni ǵana 186 adamnyń aýyrǵany tirkeldi. Jańa jyldan beri oblysta 18 oqýshy, 14 muǵalim, 3 balabaqsha qyzmetkeri, 4 stýdent osyndaı dıagnozben tirkeldi», dedi oblystyq densaýlyq saqtaý basqarmasy Medısınalyq kó­mekti uıymdastyrý bóliminiń basshysy Aıgúl Qulbaraqova.

Naýqastardyń kóbi, ıaǵnı 360-y Oral qalasynda turady. Báıterek aýdanynda – 64, Bórli aýdanynda – 59, Terekti aýdanynda – 17, Jańaqala aýdanynda 14 jaǵdaı tirkelgen.

Sońǵy aptada ótken aptamen salystyrǵanda aýrýshańdyq deńgeıi 85,9%-ǵa (65-ten 464-ke) ósken.

«Koronavırýs ınfeksııa­sy oblysta da, eli­mizde de órship, ahýal nasharlap barady. Son­daı-aq ja­ńa «Omıkron» shtamyn juqtyrý qaýpi bar. Jańa shtamnyń erek­sheligi sol, juqtyrý qaýpi joǵary ári vırýsty qaıta juqtyrý yqtı­maldylyǵy da óte úlken. Vırýs birinshi túsetin joǵary tynys joldarynda «Omıkron» «Del­ta» shtamyna qara­ǵan­da 70 ese tez kóbeıedi», deı­di oblys­tyq sa­nı­tarııalyq-epı­demıo­lo­gııa­lyq baqylaý de­partamenti basshysynyń orynbasary Nur­lybek Mustaev.

Mamandardyń aıtýynsha, ázirge naýqastardy emdeıtin stasıonardan da, medıkamentten de tapshylyq joq. Aýrýhanalarda arnaıy daıyndalǵan tósektiń 78 paıyzy bos tur.

2021 jyldyń 1 aqpanynda vak­sınalaý jumysy bastal­ǵaly óńirde ekpeniń birinshi komponentimen – 258 101 (39%) adam, ekinshi komponentimen – 244 900 adam (37%) egilgen. Sondaı-aq oblysta 22 902 adam (9,3%) revaksınalaý­dan ótken. Ekpe alǵysy kele­tin tur­ǵyndarǵa birneshe tań­daý bar. Sonyń ishinde «Spýt­nık Lite» vaksınasyna qatys­ty partııanyń bir bóligi Qazaq­stanǵa kelip jetken. Jaqyn kúnderi oblysqa da jetkizilip, tıisti qaýly shyqqan soń qol­danylady.

Vedomstvoaralyq komıs­sııa­nyń sheshimine oraı, epı­de­mııalyq ahýal jaq­sarǵanǵa deıin oblys aýma­ǵynda qoǵam­dyq oryndarda, kóshede jáne otbasynda da barlyq kópshilik sharalardy ótkizýge tyıym salyndy. Bul jerde marqumdy sońǵy saparǵa shyǵaryp salý úshin ǵana 30 adamǵa deıin jınalýǵa ruqsat beriledi. Al teatr, fılarmonııa, sırk, konsert zaldarynda kóp­shilik sharalar ýaqytsha toq­taıdy, dinı qulshylyqtar ót­peıdi. Túngi klýbtar, karaoke barlar toqtaıdy. Jeke kezdesýlerde 10 adamnan artyq jınalýǵa bolmaıdy jáne bul adamdar ekpe alǵan bolýy tıis. Qoǵamdyq tamaqtaný oryndarynda bir ústelde 4 adamnan artyq otyrýǵa tyıym salynady. Ashyq jobasyna qatysatyn kınoteatrlar zaldyń 30 paıyzyna ǵana bılet satady. Kom­­mý­naldyq sharýashylyq kásiporyndarynan bólek mem­­le­kettik mekemeler 70 paıyz­ǵa deıin qyzmetkerlerin qashyqtan jumys rejimine aýystyrýy tıis.

Jaqyn kúnderi orta bilim salasynda qysqy kanıkýl aıaq­­t­al­maq. N.Mustaevtyń aı­týynsha, «qyzyl aımaq» mártebesi kezinde óńirdegi oqý­shy sany 600-ge jetpeıtin aýyl mektepterinde oqý úrdisi ádettegideı júredi. Al shákirt sany 600-den asatyn iri mektepter onlaın oqý formatyna kóshedi. Kolledjder men joǵary oqý oryndary stýdentteri jaǵdaıǵa qaraı aralas formatta bilim alady.

 

Batys Qazaqstan oblysy

Sońǵy jańalyqtar

Uqsas jańalyqtar