Ekonomıka • 18 Qańtar, 2022

Úkimet áleýmettik jaǵdaıdy turaqtandyrý boıynsha jospar usyndy

146 ret kórsetildi

Ulttyq ekonomıka mınıstrliginde Qazaqstandaǵy áleýmettik-ekonomıkalyq jaǵdaıdy turaqtandyrý boıynsha jedel is-qımyl jospary tanystyryldy, dep habarlaıdy Egemen.kz.

Ulttyq ekonomıka mınıstri Álibek Qýantyrovtyń aıtýynsha, Memleket basshysynyń tapsyrmasyn oryndaý maqsatynda mınıstrlik ortalyq memlekettik organdarmen jáne uıymdarmen birlesip, «Qazaqstan Respýblıkasyndaǵy áleýmettik-ekonomıkalyq jaǵdaıdy turaqtandyrý boıynsha jedel is-qımyl josparyn bekitý týraly» QR Úkimeti qaýlysynyń jobasyn ázirledi.

«Jospar qoǵamdyq tártip pen qaýipsizdikti qalpyna keltirý, áleýmettik jáne basqa da ınfraqurylymdar, áleýmettik máseleler, baǵanyń negizsiz ósýine jol bermeý, halyq pen kásipkerlikti qoldaý jáne uıymdastyrý - qarjy máseleleri boıynsha 51 is-sharadan turady. Qoǵamdyq tártip pen qaýipsizdikti, áleýmettik jáne basqa da ınfraqurylymdy qalpyna keltirý baǵyty boıynsha josparda 11 is-shara kózdelgen. Osylaısha, Memleket basshysynyń kúshtik qurylymdar qyzmetkerleriniń jaýyngerlik ázirligin arttyrý jáne moraldyq rýhyn qoldaý, zaqymdalǵan jyljymaıtyn múlik obektilerin qalpyna keltirý, sondaı-aq kúshtik qurylymdardyń, densaýlyq saqtaý, bilim berý jáne kommýnaldyq sharýashylyq salalarynyń materıaldyq-tehnıkalyq bazasyn qalpyna keltirý jónindegi tapsyrmalaryn iske asyrý kózdelip otyr», dep túsindirdi Álibek Qýantyrov Úkimet otyrysy barysynda.

Áleýmettik máseleler baǵyty boıynsha 10 is-sharany iske asyrý josparlanýda. Olar jaraqat alǵan tıisti organdardyń qyzmetkerlerine ótemaqy tóleýdi, qaza tapqan osy organdar men beıbit azamattardyń otbasylaryna kómek kórsetýdi, bıznes pen halyqqa borysh júktemesin azaıtý sharalaryn, muqtaj azamattarǵa turǵyn úı kómegin kórsetýdiń jańa tártibi men tetigin engizýdi qamtıdy.

Mınıstrdiń aıtýynsha, baǵanyń negizsiz ósýine jol bermeý baǵytynda 15 is-sharany iske asyrý josparlanǵan. Bul is-sharalar suıytylǵan munaı gazyn ótkizýdiń jańa tetigin ázirleýdi, áleýmettik mańyzy bar azyq-túlik taýarlarynyń baǵalaryn turaqtandyrý jónindegi forvardtyq tetikterdi qarjylandyrýdy ulǵaıtýdy jáne kómir baǵasynyń ósýine jol bermeý jónindegi sharalardy qamtıdy. Al halyq pen kásipkerlikti qoldaý baǵyty boıynsha 7 is-sharany iske asyrý kózdelgen.

«Máselen, bastalǵan salyqtyq jáne kedendik tekserýlerdi 2022 jylǵy 1 aqpanǵa deıingi merzimde toqtata turý jáne keıinge qaldyrý, kádege jaratý alymynyń mólsherlemeleri men tásilderin qaıta qaraý, 2022 jylǵy 20 sáýirge deıingi kezeńge qurylystardy kóshirýge, ornalastyrýǵa, buzýǵa baılanysty atqarýshylyq áreketterdi júrgizýge ýaqytsha tyıym salýdy engizý josparlanýda. Uıymdastyrý-qarjylyq máseleler baǵyty boıynsha 8 is-sharany iske asyrý josparlanýda. Olar teńgege degen senimdi tolyq qalpyna keltirgenge deıin valıýta naryǵynyń turaqtylyǵyn qamtamasyz etýdi, Batys óńirler úshin áleýmettik-ekonomıkalyq damýdyń keshendi josparlaryn ázirleýdi nemese ózektendirýdi, jappaı tártipsizdikter saldaryn joıý jónindegi is-sharalardy qarjylandyrýdy qamtamasyz etý úshin 2022 jylǵa arnalǵan respýblıkalyq bıýdjetti naqtylaýdy qamtıdy»,  dedi Álibek Qýantyrov.

Mınıstr usynylǵan jedel is-qımyl jospary Memleket basshysynyń tapsyrmalaryn eskere otyryp, jaqyn aradaǵy birneshe aı ishinde memlekettik organdardyń tıisti mindetterdi úılestire sheshýine baǵyttalǵanyn atap ótti.

«Jospardy iske asyrý eldegi ekonomıkalyq jaǵdaıdy jedel qalpyna keltirýge jáne kúndelikti ómirge oralýǵa ákeledi. Joba Qarjy, Ádilet mınıstrlikterimen, sondaı-aq basqa da memlekettik organdarmen kelisildi», dep qosty mınıstr.

Sońǵy jańalyqtar

Uqsas jańalyqtar