О́ner • 20 Qańtar, 2022

Qazaq bıine qumartqan qyz

2249 ret kórsetildi

Birikken Arab Ámirlikteriniń Dýbaı qalasynda «EXPO-2020» kórmesi ótýde. Osy kórmede nursultandyq «Naz» memlekettik bı teatry ujymy quramynda óner kórsetip júrgen Gúldana Samalqyzy tómendegi qyzyq oqıǵany baıandady.

Búkilálemdik kórmeniń Qazaqstan pavılony ádemi bezendirilgen tórt qabattan turady. Eń alǵashqy qabaty – Jýsan zaly. Bul zaldan dala ıisi, jýsan ıisi ańqyp tur, ǵajap! Bir kelgen adam qaıta aınalyp kelgisi keledi. Odan keıingi zaldarda ultymyzdyń dástúrli kıimderi, eldiń tarıhy men mádenıeti, óneri jan-jaqty qamtylǵan. Tamashalaýshy meımandar óte kóp, neshe túrli ult ókilderi qyzyqtap qaraýda.

Árıne, EKSPO kórmesinde elimizdiń ulttyq óneri de barynsha nasıhattalýda. Joǵaryda aıtylǵan «Naz» bı teatry ujymy da qazaqtyń myń buralǵan bılerin kórsetip, jıylǵan jurtty tańdaı qaqtyrady.

Sońǵy kúnderi mynadaı qyzyq oqıǵa bolypty: qazaq áýeni shyrqalyp, bıi oınalsa, myna bir Lýna esimdi qyz bala esi kete tamashalap, qoıylym aıaqtalysymen júgirip baryp bıshi Gúldanany qatty qysyp qushaqtaı alady eken. Osyndaı jaǵdaı birneshe márte qaıtalanǵan.

Qyzdyń ata-anasy Qytaıdan kelse kerek. Aıtýynsha, kishkentaı Lýna ákesi men anasyn qolynan jetektep, únemi qazaq pavılonyna tartady eken. О́mirde óte tuıyq bolsa da, qazaqy áýendi estigen sátte aınaladaǵynyń bárin umytyp ketetin sábıdiń qylyǵyna ata-anasy ań-tań bolǵan.

Gúldana Samalqyzy – Qurmanǵazy atyndaǵy Oral mýzykalyq kolledjiniń bı synybyn bitirgen. 2020 jyldan beri Nur-Sultan qalasynda «Naz» memlekettik bı teatrynda qyzmet etedi. Gúldananyń ata-anasy Samal men Elmıra da – óner adamdary, Hadısha Bókeeva atyndaǵy Batys Qazaqstan oblystyq qazaq drama teatrynda eńbek etedi.

 

Batys Qazaqstan oblysy

Sońǵy jańalyqtar

Uqsas jańalyqtar