Joldama kóp, nátıje qalaı bolar eken?

Kúni keshe Mádenıet jáne sport mınıstri Dáýren Abaevtyń tóraǵalyǵymen Beıjińde (Qytaı) ótetin XXIV qysqy Olımpıadaǵa daıyndyq barysy týraly keńes ótti. Alqaly jıynǵa Mádenıet jáne sport vıse-mınıstri Serik Jarasbaev, Sport jáne dene shynyqtyrý isteri komıtetiniń tóraǵasy Samat Erǵalıev, Sport jáne dene shynyqtyrý isteri komıteti tóraǵasynyń orynbasary Aıgúl Bektenova, Ulttyq Olımpıada komıteti (UOK) sport dıreksııasynyń dırektory Elsııar Qanaǵatov jáne UOK Bas hatshysy Andreı Krıýkov qatysty.

Jıynda vedomstvo basshysy qysqy Olımpıadada qazaq­standyq sportshylardyń aldynda turǵan birqatar mindetti atady.

– El úshin qazirgi qıyn jaǵ­daıda, sonyń ishinde koronavırýs ınfeksııasynyń kóbeıýi kezinde biz sportshylarymyzǵa aldaǵy Olımpıadada dopıngsiz, janjalsyz, laıyqty óner kór­setý mindetin qoıdyq. Árıne, árbir sportshy jetistiktiń shyńy sa­nalǵan Olımpıada meda­line umtylady. Al biz olımpıa­da­shy­larymyzdyń kez kelgen jetistigine qýanamyz. Bul úshin mem­leket qoldan kelgenniń bar­ly­ǵyn jasap, sportshylardy da­ıyndaý úderisterin, oqý-jat­tyǵý jıyndary men irikteý ja­rystaryna qatysýyn qarjylan­dyrdy, – dedi Mádenıet jáne sport mınıstri.

Ulttyq Olımpıada komıte­tiniń Bas hatshysy Andreı Krıýkov qazaqstandyq sportshylardyń XXIV qysqy Olımpıadaǵa da­ıyn­dyq máselesine toqtaldy.

– Búgingi kúnniń basty mindeti – sportshylar men jattyq­ty­rýshylar densaýlyǵy men qaýip­­sizdigin saqtaý. Olardyń kóp­shiligi, ıaǵnı irikteý týrnır­lerin aıaqtaǵandar sońǵy apta boıy jabyq karantındik aımaqtarda ornalasty. Onda daıyndyqtyń sońǵy kezeńi júrip jatyr. Álemdik dodalar aıaqtalǵan soń Beıjińge ushpas buryn sportshylar karantınde ýaqyt ótkizedi. Barlyq sportshy keshendi-ǵy­lymı top mamandarynyń úzdiksiz baqylaýynda. Mádenıet jáne sport mınıstrligi men UOK sport­tyq jarystar kúntizbesi boıynsha dodalarǵa qatysý, daıyndyq jumystary, sheteldik oqý-jattyǵý jıyndary men jarystar, onyń ishinde elimizdegi halyqaralyq dodalarǵa qatysý úshin komandalarǵa barlyq jaǵ­daıdy jasady. Endi sportshylar eń jaýapty kezeńge aıaq basyp otyr. Qazaqstan halqy biz­diń komandany qoldaıtynyna senimdimiz, – dedi Bas hatshy.

Ulttyq Olımpıada komı­tetiniń deregi boıynsha ázirge eń kóp joldama shańǵy jarysy boıynsha synǵa túsetin sport­­shylardyń enshisinde. Olar 30 joldamaǵa ıelik etýde. Odan keıingi úzdik nátıje frıstaılshylarǵa tıesili. Olar toǵyz joldama jeńip alǵan. So­nyń ishinde mogýl boıynsha – 5, akrobatıka boıynsha 4 lısenzııa bar. Konkıshiler men bıatlonshylar – 12, short-trekshiler toǵyz joldamany qorjynǵa saldy. El quramalary taý shańǵysy men shańǵymen tuǵyrdan sekirý sportynan tórt joldamadan enshilese, shańǵy qossaıysynan eki lısenzııaǵa ıelik etti.

Búgingi tańda olımpıadalyq qurama sapyna 32 sportshy engen. Aıta keterligi, bul sport­shylardyń sońǵy ári naqty sa­ny emes. Sebebi UOK keıbir sport túrlerinen halyqaralyq fede­rasııalardyń lısenzııalardy qaıta bólý, úlestirý nátıjelerin kútýde. Atap aıtqanda, bıatlon, shańǵy jarysy, mogýl jáne akrobatıkadan taǵy da joldamalar úlestirilýi múmkin. Olım­pııa oıyndaryna qatysatyn sportshylardyń sońǵy tizimi 20 qańtardan keıin belgili bolady. Qazaqstan quramasy 27 qańtar kúni charterlik reıspen Nur-Sultannan Almaty arqyly Beıjińge attanady.

Qazirgi tańda qazaqstandyq sportshylar Qytaıǵa júrer aldyndaǵy arnaıy karantınnen ótýde. Arnaıy karantındik aımaq eki qalada – Nur-Cultan men Almatyda uıymdastyrylǵan. Komandalar elordadaǵy «Alaý» muz saraıynda konkımen jú­girý sporty men short-trekten jattyǵyp jatyr.

«Biz úshin basty mindet, ásirese, vırýstyń jańa tolqyny kezinde sportshylar men komanda músheleriniń qaýipsizdigi men densaýlyǵyn saqtaý. Bul – erekshe jaýapkershilikti jáne joǵary deńgeıde úılestirýdi qajet etetin kúrdeli mindet. Komanda músheleriniń syrtqy álemmen baılanysyn boldyrmaý úshin eki qalada sportshylar karantınge alyndy. Olar jattyǵý alańdary men sol jerde ornalasqan qo­naqúı arasynda bir baǵytty us­tanady. Biz barlyq sportshymyzdy Beıjińdegi Olımpıada aýylyna aman-esen jetkizip, sol kúıi úılerine qaıtarýymyz kerek», dedi Elsııar Qanaǵatov.

Short-trekten Qazaqstan komandasy úzdikteriniń biri Denıs Nıkısha karantın jat­tyǵý prosesine eshqandaı áser etpeıtinin, kerisinshe, daıyn­dyqty kúsheıtýge zor múmkindik ekenin aıtyp ótti.

«Biz «Alaý» muz saraıynda turyp, sol jerde jattyǵyp jatyr­myz. Munda komanda múshe­lerinen basqa eshkimmen kóris­peımiz. Karantın jattyǵý prosesine eshqandaı keri áser etpeıdi, kerisinshe, tııanaqty daıyndalýǵa kómektesedi. Bizge eshkim kedergi jasamaıdy. Búkil jolymyz qonaqúı – muzaıdyn – qonaqúı marshrýtynan turady. Artyq qımyl jasaýǵa, kóshege shyǵýǵa bolmaıdy. Beıjińge attanǵanǵa deıin osynda bolamyz. Barlyq jaǵdaıdyń jasalǵany qýantady», dedi sportshy.

Almatydaǵy karantın aıma­ǵynda taý shańǵysy, frıstaıl-mogýl, shańǵymen tuǵyrdan sekirý jáne shańǵy qossaıysy komandalarynyń músheleri jatyr. Olar halyqaralyq týrnır­lerdegi óz ónerlerin aıaqtap, karantınge alyndy.

Komandalarǵa taý jatty­ǵýlary men tramplınde daıyn­dyq qajet, sondyqtan olardy jattyǵý aımaqtaryna tasymaldaý úshin aralyq aıaldamalarsyz «taza» kólik uıymdastyrylǵan. Karantın aımaǵynda jumys isteıtin barlyq kólik júrgizý­shileri men qyzmetkerleri de «taza» aımaqta turady jáne PTR synaqtaryn kún saıyn tapsyryp otyrady. Syrtqy ortamen barlyq baılanystar shektelgen, biraq jattyǵýlar josparlanǵan rejimde ótip jatyr.

2022 jylǵy qysqy Olımpııa oıyndary Beıjińde 4-20 aqpan aralyǵynda ótedi. Aldyn ala málimet boıynsha álemniń 95 elinen 4000-nan astam sportshy qatysady dep josparlanýda. Jarys baǵdarlamasyna sáıkes 109 medal jıyntyǵy sarapqa salynady.