Joǵary oqý oryndary sheteldik oqý oryndarymen básekege qabiletti bolýy qajet. Bul rette otandyq joǵary oqý oryndary sheteldik ýnıversıtettermen halyqaralyq baılanysty kúsheıtýi kerek. Biraq osyndaı jumystar qaǵaz betinde, jospar júzinde ǵana emes, is júzinde de joǵary nátıjede iske asyrylǵany abzal.
Prezıdent tapsyrmasyna oıyssaq, otandyq joǵary oqý oryndarynyń básekege qabilettiligin arttyrý ondaǵy oqytýshylyq quramnyń sapasyn arttyrýǵa tikeleı baılanysty. О́ıtkeni myqty kadrlarmen ǵana kez kelgen mekemeniń qadiri artady. Qazir ár ýnıversıtet ózindik ishki tártibine qaraı jumys isteıdi ǵoı, sondyqtan ár joǵary oqý ornynyń oqytýshylyq quramǵa, olardyń biliktiligin arttyrýǵa degen kózqarasy ártúrli bolýy múmkin.
Bizge ýnıversıtet oqytýshylarynyń kemi eki nemese úsh jylda bir ret halyqaralyq deńgeıde, sheteldik ýnıversıtetterde bilimin jetildirýin, halyqaralyq ǵylymı-tájirıbelik konferensııalarǵa qatysýyn mindetteıtin júıe kerek sekildi. Bul óz kezeginde joǵary oqý ornynyń qandaı da bir mártebesine, qaı vedomstvoǵa baǵynyshty ekenine qaramastan birdeı mindet bolǵany durys. Sebebi elimizde memlekettik, jekemenshik, óńirlik, ulttyq, halyqaralyq ýnıversıtettermen qatar dárigerlerdi, áskerı qyzmetkerlerdi, óner adamdaryn daıarlaıtyn joǵary oqý oryndary bar. Barlyǵynda kadrdyń kásibıligine degen jaýapkershilik birkelki bolǵany jón-aq.
Jaqynda Memleket basshysy quqyq qorǵaý organdary salasyn reformalaý kerek ekenin aıtty. Negizi ózgeris, júıeleý sol salaǵa maman daıarlaýdan bastalýy qajet. Sol sekildi bilikti dárigerlerdiń de qanshalyqty suranysta ekenin pandemııa anyq kórsetti. Al keıbir óńirlerge myqty muǵalimder jetispeı jatqanyn Prezıdenttiń ózi aıtty. Túptep kelgende barlyq salaǵa kásibı kadr kerek. Kásibı kadrdy maman daıarlaıtyn oqý oryndary qalyptastyrady. Al mamandy oqytyp, daıarlap shyǵaratyn oqytýshynyń ózi bilikti bolýǵa tıis.
Venera MÝSINA,
E.Bóketov atyndaǵy Qaraǵandy
ýnıversıtetiniń aǵa oqytýshysy
