Qasym-Jomart Kemeluly aıtqandaı, bolashaqta basymyzdan ótkergen qaıǵyly jaǵdaıdan sabaq alýymyz kerek. Bul rette, ásirese, el bolashaǵy – jastarmen jumys isteıtin pedagogterge de úlken jaýapkershilik júktelýge tıis. Barlyq bilim berý uıymdarynda qańtar oqıǵasy týraly oqýshylar men stýdentter arasynda túsindirý jumystary júrgizilgeni abzal. Qazaqstandyq patrıotızmge tárbıeleýge jańasha tyń serpin beretindeı naqty is-sharalar jospary jasalyp, júzege asyrylýy qajet. Onyń qatarynda ashyq tárbıe saǵattary, arnaıy talqylaýlar, quqyq qorǵaý organdary qyzmetkerleriniń, tártip saqshylarynyń shaqyrylýymen osy taqyryp sheńberinde arnaıy kezdesýler ótkiziler bolsa, jastar sanasyna qozǵaý salǵan bolar edi. Osylaısha, bilim berý salasynyń qyzmetkerleri Memleket basshysyna qoldaý bildirip, jas urpaqqa eldiń birligi men berekesi bárinen qymbat ekenin sezindiretini haq. Ustazdarymyz da, shákirtterimiz de «Elimiz aman, jurtymyz tynysh bolsyn» degen tilektiń qadirine de tereńirek boılaıtyn bolady.
Sondaı-aq jastarymyz jel sózge erip, arandatýshylyqtyń jetegine erip ketpeýge tıis. Osy tusta taǵy da Prezıdentimizdiń «...Internetke erkindik berilgenimen, oıyna kelgendi jazýǵa, jalǵan aqparat taratýǵa, bireýge til tıgizýge, arandatýshylyqqa jol berilmeıtinin eskertemin» degen sózderi tilge oralady. Qyzý emosııaǵa boı aldyrmaı, ár sózimizge, ár isimizge abaı bolǵanymyz jón. El basyna qaýip-qater tóngen qıyn shaqta Memleket basshysynyń batyl áreketi men «Qasterli Otanymyz – Qazaqstan álem kartasyndaǵy egemen el retinde qýatty memleketke aınalady, ekonomıkamyz neǵurlym qarqyndy damıdy, azamattarymyzdyń áleýmettik jaǵdaıy jaqsara túsedi. Biz myqty halyqpyz. Tól tarıhymyzda talaı jaýgershilik zamandy, asharshylyqty jáne basqa da alapat qıyndyqty bastan ótkerdik. Sońǵy kúnderdegi qaıǵyly oqıǵalar biz úshin taǵy bir synaq boldy. Ony eńserip, burynǵydan da myqty bolamyz» degen sózi, bolashaqqa degen nyq senimi halqymyzdy jigerlendirip, úmitin úkiledi. Elimiz qýatty bolýy úshin, bárimiz Memleket basshysyna zor qoldaý bildirip, birligimizdi bekemdeı túseıik, táýelsiz Qazaqstannyń jańa dáýiriniń órleı berýine úles qosaıyq.
Bıalash SÚIINKINA,
Bilim berý isiniń úzdigi,
Bilim berý salasynyń qurmetti qyzmetkeri
QOSTANAI
