Sport • 21 Qańtar, 2022

Beıjiń Olımpıadasy: Qazaqstan Týyn kimder ustap shyǵady?

133 ret kórsetildi

Short-trekten Qazaqstan komandasynyń kóshbashysy, álem kýbogi kezeńderiniń jeńimpazy ári júldegeri Abzal Ájiǵalıev pen konkımen júgirýden tórt qurlyq chempıony Ekaterına Aıdova 2022 jyly Beıjiń Olımpıadasynyń ashylý saltanatynda Qazaqstan Týyn ustap shyǵady, dep jazady Egemen.kz QR Ulttyq Olımpıada komıtetine silteme jasap.

Ekaterına Aıdova alǵash ret 2010 jyly Vankýver Olımpıadasyna qatysqan. Keıin Sochı-2014 jáne Phenchhan-2018 oıyndarynda el namysyn qorǵady. 30 jastaǵy Aıdova úshin Beıjiń oıyndary óz mansabyndaǵy tórtinshi Olımpıada bolmaq. Tájirıbeli sportshy konkımen júgirýden álem kýbogi kezeńiniń, 2017 jylǵy Ýnıversıada oıyndarynyń júldegeri, 2021 jylǵy tórt qurlyq chempıonatynyń jeńimpazy.

«Qysqy Olımpıada oıyndarynyń ashylý saltanatynda elimizdiń baıraǵyn kóterip shyǵatyn alǵashqy qazaqstandyq sportshy qyz ekenimdi maqtan tutamyn. Kóptegen atletter úshin bul alǵashqy Olımpıada, al keıbireýleri tórtjyldyq dodasyna birneshe ret qatysqan. Alaıda, Olımpıadaǵa qansha ret qatyssań da, ondaǵy sezim ózgermeıdi. Eliń úshin maqtanasyń jáne úlken jaýapkershilik baryn túsinesiń. Beıjińde el úmitin aqtaý úshin bar kúshimizdi salamyz», dedi Ekaterına Aıdova.

Abzal Ájiǵalıevtiń enshisinde short-trekten álem kýbogi kezeńderiniń barlyq júldesi bar. 2017 jylǵy Ýnıversıada, 2011 jylǵy Azııa oıyndarynyń medali de qorjynnan tabylady. Abzal 2014 jáne 2018 jyldardaǵy Olımpıadaǵa qatysyp, Phenchhanda Qazaqstannyń týyn kóterip shyqqan bolatyn. Ol mundaı qurmetke ekinshi ret ıe bolyp otyr.

«Olımpıada oıyndarynda Qazaqstannyń týyn alyp shyǵý úshin abyroı. Elińniń baıraǵyn ashylý saltanatynda kóterip shyqqandaǵy sezim ómir boıy umytylmaıdy. Bizge senim artqan barsha jankúıerge alǵysymyz sheksiz. Barlyq olımpıadashylar atynan bul básekeni asyǵa kútkenimizdi aıtqym keledi. Sportshylarǵa daıyndalý úshin bar jaǵdaı jasaldy. Elde de, shetelde de daıyndaldyq. Endi olımpıada aıdynynda el namysyn abyroımen qorǵaý úshin barymyzdy salamyz», dedi Abzal Ájiǵalıev.

Qysqy Olımpıada oıyndarynyń ashylý saltanaty 4 aqpan kúni Beıjińdegi ulttyq stadıonda ótedi.

Sońǵy jańalyqtar

Dollar 10 teńgege qymbattady

Qarjy • Búgin, 16:23

Referendýmǵa latvııalyq baqylaýshylar keledi

Referendým-2022 • Búgin, 15:25

Saıajaıdan esirtki zerthanasy tabyldy

Aımaqtar • Búgin, 13:07

Uqsas jańalyqtar