Ulybrıtanııanyń EQYU janyndaǵy elshiligi 20 qańtarda Venada ótken uıymnyń turaqty keńesiniń otyrysynda Qazaqstandaǵy jaǵdaıdǵa baǵa berip, málimdeme jasady.
«Jaqyn dostar retinde biz sońǵy aptalarda Qazaqstan halqynyń bastan keshken qaıǵyly oqıǵalaryna qatty alańdaýshylyq bildirdik. Zorlyq-zombylyq nátıjesinde adamdardyń qaza tapqanyn zor kúızelispen qabyldadyq jáne marqumdardyń otbasylaryna kóńil aıtamyz. Almaty men basqa da óńirlerdiń tezirek qalypty ómirge oralýyna tilektestik bildiremiz», dedi Ulybrıtanııanyń EQYU janyndaǵy Turaqty О́kili, Elshi Nıl Býsh.
Brıtandyq elshi Memleket basshysy Q.Toqaevtyń halyqqa úndeýinde, Almatydaǵy jáne basqa qalalardaǵy beıbit sherýshiler men «uıymdasqan qylmystyq top» arasyndaǵy naqty aıyrmashylyqty atap ótkenin quptady. Bul «konstıtýsııalyq bılikti qulatýdy kózdegeni anyq» dep atap ótken dıplomat Qazaqstanda oryn alǵan oqıǵa «jan-jaqty tergeýdi qajet etetin másele» ekenin basa aıtty.
«Biz Qazaqstan Prezıdentiniń bolǵan oqıǵalar men ólimniń sebebin anyqtaý úshin tergeý komıssııasyn qurý týraly sheshimin quptaımyz. Qazaqstan bıligi bul tergeýdi tıimdi ári ashyq bolýyn jáne Qazaqstan halqynyń senimine ıe bolýyn qamtamasyz etý jónindegi mindettemesin qoldaımyz», delingen Elshi málimdemesinde.
Sondaı-aq málimdemede Qazaqstandyq bıliktiń adam quqyqtary men halyqaralyq mindettemelerin saqtaýǵa berik kepildikteri atap ótildi.
Sonymen qatar barlyq ustalǵandar zańǵa sáıkes tıisti quqyqtyq rásimdi qamtamasyz etýdiń mańyzdylyǵy aıtyldy. Prezıdent Q.Toqaevtyń 11 qańtarda Qazaqstan Parlamentinde beıbit sherýshilerdiń negizgi talaptaryna jaýap retinde ekonomıkalyq, áleýmettik jáne saıası reformalar jospary týraly sóılegen sóziniń mátininde brıtandyq dıplomat olardyń oryndalýyna qoldaý kórsetýge daıyn ekenin aıtty.
Brıtandyq elshi N.Býsh eki el arasyndaǵy dıplomatııalyq qarym-qatynastardyń 30 jyldyǵynda qalyptasqan berik áriptestikke toqtala otyryp Qazaqstanǵa qoldaý kórsetýge daıyn ekendigin atap ótti.
