Olımpıadashylardan ońdy nátıjeler kútemiz

Sońǵy úsh Qysqy Olımpııa oıyndarynan Qazaqstan quramasy júldemen oralǵanyn jankúıerler jaqsy biledi. 2010 jyly Vankýverde bıatlonshy Elena Hrýstaleva kúmis medaldi ıelendi. 15 shaqyrymdyq jekelegen saıysta ol norvegııalyq Týra Bergerden ǵana qalyp qoıdy. Esesine óziniń burynǵy otandasy, Belarýstiń maqtanyshy Darıa Domrachevadan ozdy. 2014 jyly Sochıde mánerlep syrǵanaýshy Denıs Tenniń aıshyqty ónerine qol soqtyq. Jampoz sportshymyz japonııalyq Iýdzýrý Hanıý men kanadalyq Patrık Chanǵa ǵana ese jiberip, qola júldeni ıelendi. 2018 jyly Phenchhanda frıstaılshy Iýlııa Galysheva dál sol mejeden kórindi. Mogýl saıysynda jerlesimiz Fransııa ókili Perrın Laffon men Kanada sportshysy Jıýstın-Dıýfýr Lapýjantty alǵa jiberdi. Baıqasańyzdar, osy jarystardyń barlyǵynda jalqy júldege ıelik etken ekenbiz.

Al Beıjińdegi dodada osy kórsetkishti jaqsartýǵa jerlesterimizdiń kúsh-jigeri jete me? Atalǵan jarysta birneshe sportshyǵa aıryqsha senim artylyp otyr. Osy oraıda, Iýlııa Galyshevanyń esimin aıryqsha atap ótýge tıispiz. 29 jastaǵy Shyǵys Qazaqstan oblysy týmasynyń Olımpııa oıyndary júldesinen bólek, basqa da tolyp jatqan ataqtary bar. Máselen, 2019 jyly ol Park-Sıtıde ótken álem chempıonatynda altynnan alqa taqty. 2015 jyly Kraıshbergte qola alsa, 2017 jyly Serra-Nevada men 2021 jyly Almatyda kúmiske qol sozdy. Galyshevanyń enshisinde Dúnıejúzilik Ýnıversıadanyń eki jáne Azııa oıyndary men Álem kýbogynyń úsh altyny bar. Endi kendi Altaıdyń arýy Qytaı elinde Qazaqstan jankúıerlerine altyn medaldiń syńǵyryn estitse degen tilegimiz bar.

Frıstaılda Iýlııa Galyshevadan bólek, Pavel Kolmakov, Dmıtrıı Reıherd jáne Janbota Aldabergenova syndy saqa sportshylar da óner kórsetedi. 25 jastaǵy Kolmakov byltyr álem chempıonatynyń qola júldegeri atanyp, Dúnıejúzilik Ýnıversıadada medaldardyń tolyq jıyntyǵyn oljalady. Iаǵnı Paveldiń qorjynynda altyn da, kúmis te, qola da bar. Bıyl ol Álem kýbogynyń kezeńdik saıysynda jeńis tuǵyryna kóterildi. 33 jastaǵy Reıherd – tórt Olımpııa oıyndary men alty álem chempıonatyna qatysqan sportshy. Birqatar baıraqty básekede ol el namysyn abyroımen qorǵady. 26 jastaǵy Aldabergenovanyń nátıjeleri de jaman emes. Ol Sochı Olımpıadasynda altynshy orynǵa taban tirese, Phenchhanda 13-satyǵa jaıǵasty. Basqa da týrnırlerde ózin jaqsy qyrynan kórsetti. Mamandar tarapynan onyń múmkindigi men áleýeti áli de joǵary baǵalanýda. Olaı bolsa, dál osy dodada Janbota jasyndaı jarqyldasa deımiz. 

Qazaqstan jankúıerleri short-trekshiler saıysyn taǵatsyzdana kútýde. О́ıtkeni ulttyq qurama tizginin Mádiǵalı Qarsybekovteı maıtalman maman ustaǵaly beri bizdiń elde sporttyń bul túri óte jaqsy qarqynmen damyp keledi. Eń qýanyshtysy, birer jyldan beri bas komandamyzdyń basym bóligin óz qandastarymyz qurap otyr. Qazirgi kezde Qazaqstan sportshylarynyń halyqaralyq arenadaǵy qarqyny jaman emes. Osydan tórt jyl buryn Phenchhan Olımpıadasynyń estafetalyq saıysynda jerlesterimiz jeńis tuǵyryna synyq-súıem ǵana jetpeı qalyp, altynshy orynǵa taban tiregeni de esimizde. Álem chempıonattary men Álem kýboktarynyń kezeńdik saıystaryndaǵy nátıjelerimiz de kóńil kónshiterlikteı. Bul joly Beı­jińde Abzal Ájiǵalıev, Denıs Nı­kısha, Ádil Ǵalıahmetov, Olga Tıhonova jáne Iаna Han óner kórsetedi. Olardyń barlyǵy da kópten beri kózge túsip júrgen sportshylar. Osy jarystyń jekelegen saıysynda nemese komandalyq estafetada keminde bir júldege qolymyz jetse, sonyń ózi biz úshin tamasha jetistik bolyp sanalatyny sózsiz.

Kezinde dańqty Vladımır Smırnov Qazaqstannyń shańǵy sportyn orasan zor bıikke kótergen edi. Kókshe óńiriniń týmasy ótken ǵasyrdyń toqsanynshy jyldary qysqy Olımpıadada 1 altyn, 2 kúmis jáne 1 qola medaldi oljalap, barsha jurttyń alǵysyna bólendi. Bul táýelsiz Qazaqstannyń ǵalamdyq dodalardaǵy alǵashqy júldeleri edi. Odan bólek, 1988 jyly Kalgarıde Vladımır úsh ret jeńis tuǵyryna kóterildi. Ol álem chemmpıonattary men basqa da asa iri halyqaralyq jarystarda júldelerdi kúrep aldy. Sodan keıin keń baıtaq elimizden ataǵy alysqa jaıylǵan Smırnovtyń jeńisti jolyn jalǵastyratyn birde-bir shańǵyshynyń shyqpaǵany ókinishti, árıne!

Sońǵy 10 jyl bederinde mánerlep syrǵanaý sporty elimizde eńse tiktep qalǵan edi. Baıraqty básekelerde alǵashqy bolyp Denıs Ten atoı saldy. Almatylyq sportshy Sochı Olım­pıa­dasynyń qola júldesinen bólek, 2013 jáne 2015 jyldary jalaýy jelbiregen álem chempıonattarynda júldegerler sanatynan kórindi. «Tórt qurlyq chem­pıonaty», Azııa oıyndary jáne Dúnıe­júzilik Ýnıversıadada Tenge teń keler eshkim tabylmady. Odan keıin Elızabet Tursynbaevanyń óreli ónerine qol soqtyq. Phenchhan Olımpıadasynda 12-oryndy qanaǵat tutqan ol 2019 jyly úsh birdeı dúbirli dodada daralandy. Qazaq qyzy álem chempıonaty men Dúnıejúzilik Ýnıversıadada jáne «Tórt qurlyq chempıonatynda» kúmis medaldi moınynda jarqyratty.

Esimderi joǵaryda atalǵan eki jerle­simiz Qytaıdaǵy Qysqy oıyndarǵa qatys­qanda qalyń kórermen «eń bolmaǵanda bireýi júlde alýǵa tıis» dep taqymyn qysyp otyrar edi. Biraq qazir ekeýi de ulttyq qurama sapynda joq. Denıs 2018 jyldyń shilde aıynda Almatynyń qaq ortasynda qandyqol qaraqshylardyń qolynan qaza tapty. Ol nebári 25 jasta edi. Aqpan aıynyń bel ortasynda 22 jasqa tolǵaly otyrǵan Elızabet eski jaraqatynan aıyǵa almaı, sonyń saldarynan úlken sporttan qol úzdi. О́kinishke qaraı, qazirgi kezde ulttyq komanda sapynda óner kórsetip júrgen ul-qyzdar arasynan Ten men Tursynbaevanyń jemisti jolyn jalǵastyratyndaı eshkimdi kórip turǵan joqpyz.  

Konkıshiler qatarynda Denıs Kýzın men Ekaterına Aıdova sekildi saqa sportshylar bar. Olardyń árqaısysy Olımpııa oıyndaryna úsh retten qatysty. Ekeýiniń de álem chempıony degen dardaı ataqtary bar. Kezinde Kýzın eresekter synynda aldyna jan salmasa, Aıdova jastar býyny arasyndaǵy dodada daralandy. Alaıda qazir olar ardager sportshylar sanatynda. Ýaqyt ozǵan saıyn nátıjeleri de nasharlap keledi. Osy jaıttyń barlyǵyn eskere kele, «Denıs pen Ekaterınanyń ǵalamdyq dodada júlde alýy ekitalaı» desek, eshkim aıypqa buıyra qoımas. Sol sekildi bıatlon, taý shańǵysy, shańǵymen tramplınnen sekirý jáne shańǵy qossaıysyn serik etkender arasynda da jeńis tuǵyryna kóterilýge kúsh-jigeri jetetin sportshylar kórinbeıdi.