Qazaqstan • 26 Qańtar, 2022

Alaý ustaǵan azamat

266 ret kórsetildi

Jan alaýy – qolynda. Júrek qalaýy – jolynda. At jalyn tartyp mingeli «elge bolsyn» deıtin azamat az emes. Solardyń arasynda Darhan Myńbaı esimi jarqyrap kórinedi.

 

1978 jyl. Jýan jaz. Qa­zaq­tyń S.M.Kırov atyndaǵy mem­le­kettik ýnıversıtetine emtı­han tapsyryp jatyrmyz. Jýr­fakqa qabyldaný úshin mem­leket­tik tórt emtıhannyń aldyn­da shyǵarma jazýdan jáne aýyzsha áńgimelesýden eki synaq bolady. Jýrnalıst bolsam deıtin talapty jas kóp, sonyń birsypyrasy dál osy eki synaq kezinde sypyryla qulaıdy. Sóıtip, bir orynǵa eki júz, keıde úsh júz ta­lapker bolsa, sonyń talaıy «tońqalań» asyp qalady. Odan keıingi emtıhannyń bári abıtýrıent úshin qylkópirdiń ózindeı: ár emtıhan aldynda bir Allaǵa syıynyp, kúndiz-túni kóz ilmeı daıyndalyp, birinen ótseń – úmit oty mazdap, ile-shala ekinshisine ázirlenip ábiger bolyp jatatyn kez. Almatyǵa jan-jaqtan jınalǵan talapkerlerdiń bir-birimen tanysyp ta úlgermegen sáti. Biraq ár emtıhanǵa daıyndyq barysynda KazGý-diń korpýsynda jıi jolyǵamyz, bir-birimizdiń túrimizdi tanımyz; bir-birimizge tilekshimiz, keıde emtıhanǵa birge ázirlenemiz, áıteýir jýrna­lıs­tı­ka fakýltetine qujat tap­syrǵaly bárimizden maza ketken; kúlimdeý az, ýaıymy kóp ýaqyttyń jeteginde júrgen edik. Darhandy eń alǵash sol kezde kó­rip, tanysyp, asqaq arman je­te­gine birge jalǵasqanbyz.

Dál tórtinshi emtıhan Dar­han­ǵa aýyr tıdi. Tarıh páni­nen barlyq suraqtarǵa múltik­siz jaýap berip otyrǵan talap­ty shá­kirt­ke ustazdar qasaqana «eki» de­gen baǵa qoıdy. Sol ýaqytta albyrt jastyń birden eki ıyǵy eńkish tartyp, ádiletsizdikke jany shydamaı eńkildeı jylap bara jatqan sát áli kúnge esimde. Oqýǵa túspeı qalǵanyna qatty nalyǵan da bolar, biraq onyń ja­nyna qatty batqany – qaradaı ádi­letsizdikke urynǵany edi. Bá­­rine jaýap berip otyrǵanda «qu­­lata» salǵanyna kúıindi. «О́mir­de ádildik degen bar ma, joq pa?» dep dál sol kúni onyń túnimen kóz ilmeı shyqqany daý­syz. Ádildiktiń, ádilettiliktiń, týralyqtyń jaqtaýshysy bolý týraly bálkim, ol tap sol kúni belgili bir toqtamǵa kelgen de bolar. Áıteýir men biletin Darhan qy­ryq jyldan asty-aý, qashan da ádilet­tiń aq jolymen júrip ke­ledi.

1979 jyl. Qońyr kúz. Oqýǵa tús­ken jastar bir-birimizben shur­qy­rasyp, KazGÝ-diń jýrfaginiń 101 aýdıtorııasyna jınaldyq. Darhan á degennen baısaldy, oıly, jaýapty jigit retinde tanyldy. 102 grýppanyń komsorgy bolyp saılandy. Sabaqtan qal­maı­dy, berilgen tapsyrmalardy tııanaqty oryndaıdy. Kóp uzamaı kýrs­tas jigitterdiń ishinde oqý­da alǵyrlyǵymen kózge tústi. Byl­tyrdan tanystyǵymyz bar, oqý barysynda tipten jaqyn ara­lasyp, birtindep dostasyp kettik. Ol kezde aýyldan kelgen balalardyń kóbisi oryssha jaqsy bile qoımaıdy, antıkalyq ádebıetten Morozova degen apaı sabaq beretin; foto isinen Redkın aǵaı beredi, emtıhanǵa bárimiz birlese ázirlenetin ádis taptyq; keıbirimizge berilgen ádebıettiń bárin oqyp shyǵýǵa ýaqyt qaıda, kim Pýshkın atyndaǵy kitap­ha­naǵa baryp, jaqsylap daıyn­dalyp keledi, sol oqyǵan-toqy­ǵa­nyn aıtyp ortaǵa salady. Osyndaı ádistiń arqasynda kýrs bolyp synaqtardan súrin­beı ótip júrdik. Darhan, Altynbek, Beıbit, Erkin, Shámshi oqyp, bilgenderin baıandaý­dan ja­lyq­paı­dy. Esesine kitapha­na­nyń da, kitaptyń da betin ashpaıtyn Qal­jigit, Abdolla, Áben sekildi ji­gitter olardan estigenderin Mo­ro­zova sııaqty apaılardyń al­dyn­da ózderi oqyp kelgendeı kó­si­le sóılep aıtyp beretin.

Sol ýaqytta bizder erekshe bir ádet taptyq. Sabaqtan qolymyz bosaı qalǵan kezde Esik qalasyna baryp, Altyn Adam tabylǵan jerdi kórýge bir attansaq, endi birde Jambyl Jabaevtyń basyna baryp táý ettik. Odan Abaıdyń basyna, Shoqan jerlengen Kerbulaq jaqqa, sosyn Qorqyt Ata eskertkishine, sodan soń Saıramǵa baryp, Ibrahım Atanyń, Qarashash Ananyń rýhy­na taǵzym etýdi úrdis ettik. Túr­kis­tanǵa, Arystan Babqa, Se­meı­ge, Syr óńirine, sóıtip stýdent kez­diń ózinde Qazaqstannyń talaı jerine bardyq...

1980 jyl. Ańyraǵan aqpan. Qorqyt Atanyń basyna barý­ǵa, odan soń eki márte So­sıa­lıstik Eńbek Eri Ybyraı Jaqaev ata­my­z­ǵa sálem berýge Qyzy­lor­da obly­syna tartyp kettik. Kún sýyq. Qyzylordanyń úskirik jeli bet qaratpaıdy. Joldy da, jobany da jóndi bilmeımiz. Jo­sa­lynyń ar jaǵyndaǵy Qor­qyt Ata kesenesin kún eńkeı­gen tusta taptyq. Sáýletshi Bek Ybyraevtyń turǵyzǵan qobyz beı­nesindegi bıik eskertkishtiń tú­binde otyryp, Qorqyt baba­myz­ǵa arnap duǵa oqydyq. Ar jaǵyndaǵy Qyryq Qyzǵa da quran baǵyshtadyq. Qaıtar ýaqyt bolǵanda kún ábden keshkirip, qarańǵy túsip te ketip edi. Beıbit Saparaly, Darhan úsheýmiz úlken jolmen jaıaý tartyp kelemiz. Úsheýmiz de Almatydaǵydaı juqa kıingenbiz, basymyzda shlıapa, ústimizde qaýdyrlaǵan birdeńe; art jaǵymyzdan jylt etken jaryq kórinse, jaltaq-jaltaq qaraımyz – úzdiksiz ótip jatqan kóliktiń birde-biri toqtaıtyn emes, tusymyzdan zyryldap óte shyǵady. Ymyrt úıirilip, qa­rańǵy tústi, kóz baılandy. Jolaı aq kirpishten turǵyzylǵan zırattardy kórgenbiz, dáý de bolsa, sonyń birin panalap, tú­neý­ge uıǵardyq. Sóıtkenshe bol­maı, álsiz jaryǵy alystan jyl­tyldap kórinip, tusymyzǵa qy­byrlap ázer jetken bir úl­ken júk mashınasy toqtaı qal­dy. «Peregon» kele jatqan qyr­ǵyz shopyr eken, táńiri ja­ryl­qaǵyr, jaqyn mańaıda eldi meken kórinse demalmaqqa be­ki­nip kele jatqan, ústi-basyn qan jý­ǵan, kóliginiń aldyńǵy tere­ze­si byt-shyt bolyp synǵan ol aıdaladaǵy bizderge jón suraý úshin toqtaǵan eken. Josalyǵa jettik. Sonda bizdiń Qarmaqshy aýdandyq gazetinde redaktor bolyp isteıtin jegjatymyzdyń úıi bar-tyn, túndeletip sol úıge jetip, sál tynyǵyp, ertesine tań atpaı jolǵa shyqtyq ta Shıelige keldik. Bizdiń úıde boldyq. Odan soń «Qyzyl tý» kolhozynda turatyn dańqty dıhan atamyz Ybyraı Jaqaıulynyń úıine baryp, sálem berdik. Zadynda kóp sózge joq, búkil ǵumyryn eńbekke arnaǵan abyz atanyń aldynda otyrmyz. «Qaı jaqtyń balasysyńdar?», dep Ybekeń saýal tastady. Beıbit – Semeıden, Darhan Shymkentten ekenin aıtty.

– Ol jaqtaǵylar meni bile me ózi? – dedi atam. – Bilgende qandaı, – dedi Darhan men Beıbit. Ybekeń bizge aq batasyn berdi. «Men oqı almadym. О́mir qara jumys, beınetpen ótti. Sender jassyńdar, oqyńdar, bilim alyńdar, elge jumys isteńder!» dedi.

Sol Ybyraı atamnyń batasy úsheý­mizge de jaman bolǵan joq. Darhan ile-shala Máskeý­diń M.Lomonosov atyndaǵy ýnı­versıtetine oqýǵa attandy. Beıbit ekeýmiz KazGý-di támam­da­dyq. Osylaısha bizdiń ómir jo­lymyz birge órilip, qanat­tasa, qatarlasa ósip jattyq...

Qazaqta «Mata jınama, bata – jına» degen jaqsy sóz bar. Darhannyń budan keıingi ómir joly bata jınaýǵa baǵyttaldy. Ol dúnıeniń sońyna túsken joq, neshetúrli memlekettik qyzmette júrgende bir jerde jaman aty shyqqan joq; tek qana bir Allaǵa syıynyp, eńbegi men qabiletine súıenip, halyqtyń yqylasy men iltıpatyna bólenip keledi. Ybyraı atanyń batasy qabyl bol­dy – Darhan Máskeýge deıin ba­ryp oqydy, el ıgiligi úshin jumys istep júr.

Biz stýdent kezimizde «Shirkin-aı, nege biz anaý Alash zamanynda týmadyq eken? Sol ýaqytta týǵanymyzda qazaq eli úshin talaı nárse isteýge talpynar ma edik» dep jıi armandaıtynbyz. Sol armandy kóktegi qudaı jerden berdi de, bizdiń naǵyz jumys isteıtin shaǵymyz Táýelsizdik kezeńimen tuspa-tus keldi. Qazaq memlekettiligin qa­lyp­tastyrýǵa, táýelsizdik tetik­­terin iske qosýǵa, el egemen­digin baıandy etýge Altynbek Sár­sen­baıuly dosymyz bas bolyp, qaınaǵan ómirdiń bel ortasynda osy Darhan Myńbaı bel sheship, bilek sybanyp jumys istedi. Áli de osy baǵyt Darhan qyzmetiniń negizgi baǵdary. Qashan kórseń de eldiń, jurttyń jumysyna jegilip, kúndi túnge, túndi kúnge ulastyryp beınet keship keledi.

Kezinde Joǵarǵy Keńeste istegende Darhan Qamzabekuly tikeleı aýdarma jasaý isimen aınalysty. Birde maǵan «aýdarma isimen osydan 20 jyl buryn maman daıarlaý qolǵa alyndy. Talaı adam oqyp shyqty. Qazir qaıda solar? О́tkendegi Astana ekonomıkalyq forýmynda Erdo­ǵan­nyń sózi aýdarylmaı qaldy. Sol sııaqty mysaldar óte kóp. Qaıda júr aýdarmashylar? Eger olar­dan aýdarmashylar tobyn ja­saqtaı almasaq, Bilim mı­nıstr­­ligi qaıda qarap otyr? Oqy­­­typ ne keregi bar onda? Osy máse­le­ni kóterý kerek», dep úl­ken máseleni qozǵaǵany bar.

Darhannyń isi de, sózi de, ózi de qashan da eldiń aldynda, jurt­tyń nazarynda.

Darhan Ońtústik Qazaqstan oblysynda ákimniń orynbasary bolyp júrgende talaı jıyn ótkizdi. Talaı jerde sóz sóıledi. Sondaı sharanyń biri – oblystyń 75 jyldyǵyna arnalǵan «О́nerli ólke sýretshileri» albomynyń tu­sa­ý­keseri edi. Tuńǵysh ret oń­­tús­­tik­qazaqstandyq sýretshi­ler­­diń shyǵarmashylyq ju­mys­tary jınaqtalyp, osy ólke­degi keskindeý óneriniń negiz­gi damý kezeńderin naqty túsi­nik­te­melermen baıandaıtyn albom jobasynyń jetekshisi Darhan Myńbaı bolatyn. Bul basylym Ońtústik ólkesiniń elge tanymal, Qazaqstan óneri­niń damýy­na eńbek etip, óz úles­terin qosqan 94 sýretshiniń shyǵar­ma­­shy­lyǵyna túsinikteme bere­di, erekshelikterin ekshelep kór­se­te­di.

Darhannyń baıaǵy Redkın aǵaı­dan alǵan dárisi tekke ket­pep­ti, ol ózi de qoly qalt etse, sýret túsirýmen aınalysady. «Aqsý-Jabaǵyly» qoryǵy týra­ly shyqqan túrli-tústi kitapta Darhan janaryna jalt etip ilin­gen nebir ádemi kartına kóri­nis tapqan. Darhannyń arhıv isine qunttylyǵy óz aldyna jeke bir áńgime.

Gazet oqyǵanǵa ońaı. Gazet qol­ǵa ustaǵanǵa ońaı. Gazet jyrt­­qanǵa tipti ońaı. Al ony shy­­­ǵa­rýdyń qıyndyǵyn kún sa­ıyn gazet shyǵaryp kele jat­qan­dar jaqsy biledi. «О́rken – Go­rı­zont» gazetinde bas redaktor bolǵanda Darhan Myńbaıdyń redaktorlyq qyry jaqsy tanyldy. Bul gazette onyń aldynda Altynbek Sársenbaıuly, Beıbit Isabaev bas redaktor bolǵan.

Oqyrmanǵa – sóz kerek. Oıly sóz. Nárli sóz. Árli sóz. Baspasóz naryǵy – arzan sózdiń de, marjan sózdiń de bazary. «Bir adam ot jaqsa, myń adam jylynady» deıdi qazaq. Darhan Myńbaıdyń jurtqa jan jylýyn syılaǵan qanshama maqalasy shyqty.

Memlekettik qyzmette júrip oıǵa kelgendi qoıyp qalýǵa, oraısyz bir isti solq etkizip jasaı salýǵa áste bolmaıdy. Darhan ár isti oı tarazysyna salyp, ábden ólshep-piship, kemeline keltirip baryp jasaıdy.

Al Qazaqstan Respýblıkasy Prezıdent Ákimshiligi Ishki saıasat bóliminiń meńgerýshisi qyzme­tin­de júrgende Astanada «Sot isin memlekettik tilde júrgizý­diń ózek­ti máseleleri» taqyrybynda dóń­gelek ústel ótkizdi. Sonda Darhan Qamzabekuly bıik min­berde turyp: – «Bizdegi taptaý­ryndy úrdis boıynsha keıde isti qaraý úderisi oryssha qolǵa alynyp, tolyqtaı sol tilde júrgiziletini jasyryn emes. Endi osy kórinisti basqasha qaıta jasap birtindep júzege asyratyn mezgil de jetti. Iаǵnı isti qaraý múmkindiginshe memlekettik tilde ǵana júrgizilip, al qajet bolǵan jaǵdaıda orys nemese ózge tilde qoldanylǵany durys bolar edi», dedi.

Sóıtti de óz paıymdaýyn kel­tirdi: – «Tilderdi damytý men qol­danýdyń 2011-2020 jaldarǵa arnalǵan memlekettik baǵdarlamasy bekidi. Baǵdarlama talaby boıynsha halyqtyń 95 paıyzy memlekettik tildi meń­ge­rýi tıis». Búginde respýb­lı­ka boıynsha jergilikti jáne at­qa­rý organdarynda is júrgizý memlekettik tilge kóshirilip otyr. Ishki saıasat bóliminde talaı azamat istedi, biraq dál meniń jeke pa­ıymdaýymda máseleni tap osylaısha tótesinen qoıyp, Astana tórinen ashyq aıtqan adam shamaly. Darhan memlekettik tildiń shynaıy janashyry retinde istiń tetigin taba biledi, tilimizdi ómirlik qajettilik etý jolynda eń bir ózekti salada qozǵalmaı turǵan tetikti tezirek túrtip ji­berdi.

Til-til dep qyzyl sózdiń kópi­ri­gin sapyryp jatqan joq, keýde qaǵyp daý-damaı, aıǵaı-shý shyǵaryp júrgen joq; bárin de óz retimen, oryn-ornymen ustamdy da salıqaly saıasat negizinde jasap júr. Eń bastysy isinde dáıektilik bar. Aıtqan sózdiń oryndalýyna bas mán beredi. Darhan el basqarý isinde bir kisideı tájirıbe jınady, bar jıǵan bilim men biligin memleket pen halyq isine arnap keledi.

Darhannyń jurtshylyqtyń oıyn tap basatyn, keıde ádemi ázilmen, keıde bir támsildermen jınalǵandardyń kóńilinen shy­ǵa­tyn qasıeti jóninde aqyn Ábilda Aımaq bylaı dep eske alady: «Marhabat Baıǵuttyń mereıtoıyn ótkizýge Túlkibas aýdanyna tarttyq. Sastóbeniń burylysyna kelip toqtadyq. Osy jerde bizdi aýdan ákimi Darhan Myńbaı qarsy alyp, ári qaraı alyp júrdi. Bizge aýdandyq gazettiń redaktory Rústem О́mirzaqov bastaǵan jýrnalıster qosyldy. Shaı ústinde ylǵı kóptiń kóńilin tabýǵa tyrysatyn, kópshil jáne sezimtal da uǵymtal, zerek, úlken aqyl ıesi Darhan Myńbaı bir áńgime aıtty: – «Baıaǵyda Daǵystan halqynyń kósemi Imam Shámildiń kezinde elde aqyn kóbeıip ketipti baıqap otyrsa, anaý da aqyn, mynaý da aqyn, tipti aqyndardyń kóptiginen adam mezi bolǵandaı eken. Bir kúni Shámil jarlyq shyǵarypty. Ol jarlyǵynda kim de kim aqyn bolsa, erteńnen bastap tereń zyndanǵa tastalady delinipti. Osy jarlyqtan keıin-aq qaptap júrgen 300 aqynnan úsh-aq aqyn qalypty. Aqyry jarlyqty oryndaýshylar úsh aqyndy ákelip zyndanǵa tastapty. Shámil olarǵa óleń jazǵandaryńdy qoımasańdar, tamaq ta berilmeıdi depti. So­ny­men ne kerek, úsh aqynnyń ekeýi óleń jazýdy sap tyıyp, bireýi-aq qalypty. Al aqyndy zyndannan shyǵarǵan Shámil eldi jınap: «Mine, naǵyz aqyn – osy!» depti. Aqyrynda aqynǵa mol syılyq berip úıine qaıtarǵan eken». Darhan osy áńgimesimen mereıtoı ıesi Marhabat Baıǵuttyń mereıin tasytyp, mártebesin bıiktetip jiberdi.

Darhan Myńbaı Mádenıet jáne aqparat mınıstri bolyp taǵaıyndalǵanda, sóz ben istiń qadirin biletin azamattardyń bári qýana qabyldady. Mádenıet pen aqparattyń basyna baıaǵy Temirbek Júrgenov, Ilııas Omarov, О́zbekáli Jánibekov sııaqty talantty da talapshyl, óreli istiń órisin, parasat­ty­lyq­­tyń paıymyn, aqparattyń ahýalyn biletin ultjandy, mem­le­ketshil tulǵa keldi dep bir-biri­nen súıinshi surasyp jatty.

2012 jyl. Almaty. Saǵat 3-ten óte Darhan habarlasty. «Almatyǵa keldim, keshki bes ja­rymdarda qolym bosaıdy, jo­lyǵaıyq», dedi. «Aqser» qo­naq­úıine ornalasqan eken. Túngi 12-ge deıin qaýqyldasyp áńgi­melestik. Darhan óziniń jos­par­la­ryn aıtyp, pikir bólisti. Ol aıtysty ótkizýdiń jańa jobasyn usyndy. «Burynǵydaı on shaqty adam emes, aıtysqa eki-aq adam shyǵady. Baıaǵy «Birjan Sal men Saranyń» aıtysy sııaqty. Bir óńirden eki adam shyǵýy da múmkin. Jeńgen aqynǵa altynnan jasalǵan dombyra syıǵa tartylady. Biraq ol dombyra aýyspaly bolady. «Altyn dombyra» júldesin qatarynan úsh ret ıelengen aqynǵa dombyra syıǵa beriledi. Sonda aıtystyń máni ózgerip, maǵynasy artady. Qazaqtyń sóz óneri ózinshe órnekpen to­ly­ǵady», dedi ol. Keıin dúr­kiregen «Altyn dombyra» jobasy osylaı kelgen.

Sodan soń qazaqtyń maqal-mátelderin áıgileıtin eskert­kish­ter­di qoıý, balalarǵa arnalǵan ánder, prozalyq jáne poezııalyq shyǵar­malar jóninen konkýrs uıymdastyrǵysy keletindigin sóz etti. Anımasııalyq jáne mýltıplıkasııalyq fılmder jasaý týraly oılaryn aıtty.

Darhan sóz arasynda: «Din máselesimen biraz aınalysqanda kózim jetken bir nárse – bul taqyrypta eshkimmen daýlasyp, pátýa tappaıdy ekensiń, osyny uqtym. Sosyn til máselesinde de tap solaı eken. Osy eki nársege aralasyp, daýlaspaımyn, dep sheshtim», dedi. Ol til-til dep shýlap júrgender «nege kúnige bir ret bolsa da kemshilikti óz qolymmen túzeıin demeıdi, jurttyń bári synap, minegenge sheber, al naqty ispen eshkim aınalysqysy kelmeıdi, tek syrttan qarap turady» dep keıistik bildirdi.

Dákeń ázilge, qaljyńǵa sheber. Bilmeıtin anekdoty joq. Áńgimeni de ańqyldap kúlip alyp, jarqyldap aıtady. Birde «Uıǵyr teatryna barǵanda teatr dırektory maǵan sol jerde turǵan dýtardy syıǵa tartty. Men sol jerde Sháken Aımanovtyń oqıǵasyn aıtyp berdim. «Sháken Aımanov Máskeýge barady. Odaqtas el­der­diń bir ókiliniń týǵan kúni bolyp qalǵan eken, soǵan ne syılaý kerek degende bas qatyryp jatpas­tan qonaqúıde turǵan vazany alady da qaǵazǵa orap aparyp, «mynaý qytaıdyń vazasy, qoldan jasalǵan, birneshe ǵana danasy bar, sony sizge syılaımyn», dep keremet sóıleıdi. Eldiń bári «Oı, Shaken ı zdes operedıl nas» dep tańdana qol soǵady. Ertesine álgi mereıtoı ıesi qo­naq­­úıden shyǵaıyn dese, vazany qaldyryńyz, deıdi. Nege dese, ol qonaqúıdiń zaty, senbeseńiz astynda ınventar nómiri bar dep kórsetedi. Mereıtoı ıesi Shákendi kezdestirip qalyp: – meni uıatqa qaldyrdyńyz ǵoı, mynaý zat qonaqúıdiki eken ǵoı, dep ókpesin aıtady. Sóıtse Sháken az-kem paý­za jasap, «Zato ot dýshı» degen eken. Sol sııaqty mynanyń da ınventar nómiri bolyp júrmesin», dep edim, kúlkiden qyrylyp qala jazdady, dedi.

Daladaı – darhan, baladaı – aqkóńil, aqpeıildi Darhan dos týraly attyń jaly, túıeniń qo­­mynda, asyǵys júrgende týǵan az-kem syrdyń baıanyn irke turǵan da jón. Áıtse de bir nár­seni ashyq aıtý kerek: – Darhan da, men de, meniń qanshama tur­ǵy­las dostarym da eń aldymen bir Allaǵa shúkirshilik aıtýymyz qajet, sosyn bizdi dúnıege alyp kelgen ata-anamyzǵa ólsheý­siz qaryzdar ekenimizdi atap aıtqa­nymyz lázim; eger qan maıdannan aman-esen oralǵan ákelerimiz bolmasa, olardyń árqaısysy onshaqty baladan artyna urpaq shashpasa, biz osyndaı bolar ma edik!?. Darhannyń ákesi Qamzabek qarııa elge syıly, óle-ólgenshe halyq dep qam-qareket jasaǵan adam bolsa, anasy – ımany salamat bolsyn, ómirge 15 bala ákeldi, tárbıeledi, azamat etip ósirdi. Shyn eskertkish solarǵa qoıylýy tıis. Biz olarǵa ómir-baqı qaryzdarmyz. Bizdiń atqaryp júrgenimiz azamattyq paryz ǵana...

Darhannyń jýrnalıstıkada júrgende bylaıǵy jurt bile bermeıtin psevdonımi bolatyn. «Shabandoz» degen! Sol sóz túıin: tulparyńnyń shashasyna shań juqpasyn, Shabandoz!

 

Nurtóre JÚSIP

Sońǵy jańalyqtar

Dollar qaıta kóterildi

Qarjy • Búgin, 16:35

BQO-da Astana kúni atap ótiledi

Elorda • Búgin, 15:59

Uqsas jańalyqtar