Tý ustaýshylardy tuǵyrdan kóreıik

Ekaterına Aıdova Qazaqstan qura­masy sapynda eń alǵash ret 2010 jyl­ǵy Vankýver Olımpıadasynda óner kórsetti. Keıinnen Sochı-2014 jáne Phenchhan-2018 oıyndarynda el namysyn qorǵady. 30 jastaǵy Aı­dova úshin Beıjiń oıyndary óz mansabyndaǵy tórtinshi Olımpıada bolmaq. Tájirıbeli sportshy konkımen júgirýden Álem kýbogy keze­ńiniń, 2017 jylǵy Ýnıversıada oıyn­darynyń júldegeri, 2021 jyl­ǵy tórt qurlyq chempıonatynyń jeńimpazy sanalady.

«Qysqy Olımpııa oıyndarynyń ashylý saltanatynda elimizdiń baı­raǵyn kóterip shyǵatyn alǵashqy qazaq­standyq sportshy qyz ekenimdi maq­tan tutamyn. Kóptegen atlet úshin bul – alǵashqy Olımpıada, al keı­bireýleri tórtjyldyq dodasyna birneshe ret qatysqan. Alaıda Olım­pıadaǵa qansha ret qatyssań da, onda­ǵy sezim ózgermeıdi. Eliń úshin maqtanasyń jáne úlken jaýapkershilik baryn túsinesiń. Beıjińde el úmitin aqtaý úshin bar kúshimizdi salamyz», deıdi Ekaterına Aıdova.

Abzal Ájiǵalıevtiń enshisinde short-trekten Álem kýbogy kezeńde­riniń barlyq júldesi bar: 2017 jyl­ǵy Ýnıversıada, 2011 jylǵy Azııa oıyn­darynyń medali onyń qorjynynan tabylady. Abzal 2014 jáne 2018 jyl­dardaǵy Olımpıadaǵa qatysyp, Phenchhanda Qazaqstannyń týyn kó­terip shyqqan bolatyn. Ol mundaı qurmetke osymen ekinshi ret ıe bolyp otyr.

«Olımpııa oıyndarynda Qazaq­stannyń týyn alyp shyǵý men úshin úlken abyroı. Elińniń baıraǵyn ashylý saltanatynda kóterip shyqqandaǵy sezim ómir boıy umytylmaıdy. Bizge senim artqan barsha jankúıerge alǵy­symyz sheksiz. Barlyq olımpıada­shylar atynan bul básekeni asyǵa kútke­nimizdi aıtqym keledi. Sport­shylarǵa daıyndalý úshin bar jaǵdaı jasaldy. Elde de, shetelde de daıyn­daldyq. Endi Olımpıada aıdynynda el namysyn abyroımen qorǵaý úshin barymyzdy salamyz», deıdi Abzal Ájiǵalıev.

Osy oraıda ótkenge sheginis jasap, buǵan deıingi aq qar, kók muz ústindegi oıyndarda elimizdiń Kók týyn ustap shyqqan sportshylar men olardyń Olımpıadada qol jetkizgen nátıjelerine toqtalyp ótkendi jón kórip otyrmyz.

Qazaqstandyq sportshylar tuńǵysh ret Norvegııanyń Lıllehammer qala­synda (1994) ótken Qysqy Olımpııa oıyn­daryna qatysty. Onda Qazaqstan týyn tramplınnen sekirýshi, elimizdiń tórt dúrkin chempıony, TMD elderi kýbogynyń ıegeri Qaırat Bıekenov ustap shyqty. Olımpıadada ol 90 metrlik tramplınnen sekirýde 49-oryn alsa (157,5 upaı), 120 metrden sekirýde 58-shi (35,2 upaı) orynnan kórindi. Qaırat 2001 jyly sporttyq karerasyn aıaqtap, birjola bapkerlikke bet burdy. Búginde tramplınnen sekirýden Qazaqstan ulttyq quramasynyń bapkeri.

1998 jyly Japonııanyń Nagano qalasynda alaýy tutanǵan Aq Olım­pıadada Kók týdy ustaý mártebesi Lıl­lehammerde Qazaqstan qorjynyna úsh júlde salǵan shańǵyshy Vladımır Smırnovqa buıyrdy. Vladımır Smırnov Naganoda da júldegerler qatarynan kórinip, Olımpıadanyń qola júldesin ıelendi. 1999 jyly sport­tyq mansabyn aıaqtap, 2000 jyly Halyqaralyq Olımpıada komı­tetiniń atqarý komıtetiniń múshesi bo­lyp saılandy. Al 2002 jyldan 2010 jylǵa deıin Qazaqstan bıatlon fede­rasııasynyń prezıdenti qyzmetin atqardy. Sondaı-aq Smırnov 2014-2015 jyldary «Astana» prezıdenttik kásibı sport klýbynyń bas dırektory boldy.

AQSh-tyń Solt-Leık-Sıtı qala­synda ótken XIX Qysqy Olımpııa oıyndarynda Qazaqstan baıraǵyn konkımen júgirýshi Radık Bıkchentaev ustap shyqty. Radık Bıkchentaev sol kezdegi quramadaǵy úsh Olımpıadaǵa qatysqan (1994, 1998 jáne 2002 jyldary) tájirıbeli sportshynyń biri edi. Onyń Olımpıadadaǵy eń úzdik kórsetkishi 16-oryn boldy. Bul nátıjege ol 1994 jyly Lıllehammerde 5 000 metr qashyqtyqqa júgirýde qol jetkizgen edi. R.Bıkchentaev konkımen júgirýden Qazaqstannyń úsh dúrkin chempıony jáne tórt ret el birinshiliginiń qola júldesin ıelendi. Sondaı-aq 1999 jylǵy Qysqy Azııa oıyndarynda altyn medal alǵan. Ol búginde Qazaqstannyń konkımen júgirý federasııasynyń atqarýshy dırektory.

2006 jyly Italııanyń Týrın qala­synda ótken Olımpıadada elimizdiń Kók týyn hokkeıshi Aleksandr Ko­resh­kov ustady. Týrındegi hokkeı báse­kesinde Qazaqstan quramasy irikteý kezeńinde «V» tobynda synǵa túsip, eki upaımen alty quramanyń ishinde besinshi oryn aldy. Sóıtip irikteýden irkilgen quramamyz Olımpıadany erte aıaqtaýǵa májbúr boldy.

2010 jyly Kanadanyń Vankýver qalasynda jalaýy jelbiregen Qysqy Olımpııa oıyndarynda Qazaqstannyń týyn bıatlonshy Dıas Keneshev alyp shyqty. Tý ustaýshy bul dúbirli dodada kóńil kónshiterlikteı nátıje kórsete almady.

Sochı Olımpıadasynda (2014) Kók týdy ustap shyǵý shańǵyshy Erdos Ahmadıevke senip tapsyryldy. Tý ustaǵan sportshymyz shańǵydan 15 shaqyrymdyq klassıkalyq stılde júgirýden synǵa túsip, márege 54-shi bolyp keldi.

Ázirshe Qazaqstan quramasy qatys­qan sońǵy Phenchhan Olımpıa­dasynda Qazaqstannyń Kók týyn, joǵaryda aıtyp ótkenimizdeı, short-trekshi Abzal Ájiǵalıev ustap shyqty. Ájiǵalıev Ońtústik Koreıadaǵy oıyndarda 500 metr jáne komandalyq estafeta jarysynda baq synady. 500 metrge júgi­rýde 9-orynǵa taban tirese, estafetada úzdik altaýdyń qatarynan kórindi.

Bul joly qalaı bolar eken?..