«Zenıttiń» «qudalyǵy» shynaıy ma?

Qazirgi tańda qazaqstandyq fýtbolshylardyń aldy Ispanııa, Belgııa, Polsha sekildi elderdiń negizgi birinshilikterinde bolmasa da, ekinshi, úshinshi deńgeıli lıgalarynda óner kórsetip júr. Sonymen qatar keıingi jyldary soltústiktegi kórshilerimizdiń klýb­tary da bizdiń jigitterge jıi «quda túse» bastady. Se­be­bi qazaqstandyq fýtbolshylar Reseıde legıoner bolyp sa­nalmaıdy. Búginde Reseı birin­shiliginde úsh jerlesimiz baq synap júr. Olar: tarazdyq Baq­tıer Zaınýtdınov (SSKA, Más­keý), qos­tanaılyq Marat Bys­trov («Ah­mat», Groznyı) jáne tal­dy­qorǵandyq Alekseı Shetkın («Rotor», Volgograd).

Byltyr bul oıynshylardyń qatary budan áldeqaıda kóp bolatyn. О́kinishke qaraı, birneshe jerlesimiz Reseı chempıonatynda laıyqty oınaı almaı, el chempıonatyna qaıta oraldy. Atap aıtar bolsaq, qorǵaýshylar Dmıtrıı Shomko men Iýrıı Logvınenko, jartylaı qorǵaýshylar Islambek Qýat, Roman Mýrtazaev, shabýyl­shylar Abat Aıymbetov, Arman Keńesov óz múmkindikterin kór­sete almady.

Jýyq arada joǵarydaǵy úsh jerlesimizdiń qataryn mańǵys­taýlyq Nuráli Álip tolyqtyryp qalýy ábden múmkin. Qazaqstan ult­tyq quramasy men almatylyq «Qaırattyń» qorǵaýshysy bul kún­deri Dýbaıda Sankt-Peter­býrgtiń «Zenıtinde» qaralymda júr. 14 qańtarda bastalǵan Reseı chempıondarynyń oqý-jattyǵý jıyny 25 qańtarda aıaqtaldy. Eki aptaǵa jýyq jıynnyń nátı­jesinde N.Álip «Zenıt» sapynda ekinshi jattyǵý jıynyna barady.

– Biz Álipti kópten beri ba­qylap júrmiz. Ol – jas oıynshy. Tólqujat jaǵynan da ol Reseı chempıonatynda legıoner bolyp eseptelmeıdi. Qazirgi tańda bizdiń klýbta úsh ortalyq qorǵaýshy bar. Nuráliniń kelýimen klýbtyń qor­ǵanys shebinde básekelestik paıda bolady. Eger Álip óziniń jaqsy qorǵaýshy ekenin dáleldeı alsa, ony komandada qaldyramyz. Jalpy Nuráliniń «Zenıtte» qalý-qalmaýy ózine baılanysty, – deıdi «Zenıttiń» bas bapkeri Sergeı Semak.

Osy jerde oqyrmandar arasynda Nuráli Álip degen kim, ol qaıdan kelgen fýtbolshy de­gen saýal týyndaýy múm­­kin. Oqyrmandarǵa túsinikti bolý úshin aıta ketsek, Nuráli 1999 jyldyń 22 jeltoqsanynda Aq­taý qalasynda dúnıege kelgen. 2008 jyly jergilikti «Kas­pıı» klýbynyń balalar akademııasyna qabyldanyp, fýtboldyń qyr-sy­ryna qanyǵa bastady. Al 2015 jyly N.Álip Almatynyń «Qaı­rat» klýbynyń akademııa­syna oqý­ǵa túsip, fýtbolshy re­tinde sheberligin odan ári shyń­daı tústi. Sol ýaqyt ara­ly­ǵynda ol «Qaı­rattyń» jas­tar ko­manda­symen birge birqatar iri jetistikke qol jetkizip, saýat­ty oıynynyń arqasynda ne­gizgi quram bapkerleriniń nazaryn ózine aýdardy. Ortalyq qorǵaý­shy pozısııasynda oınaıtyn ol 2018 jyldyń 11 naýryzynda Premer-lıgadaǵy debıýtin ót­kizse, araǵa birneshe kún salyp Qa­zaqstan ulttyq quramasynyń jeıdesin kııýge laıyq fýtbol­shy ekenin dáleldedi. Sol ýa­qyttan beri ol «Qaırattyń» da, ulttyq quramanyń da negizgi qorǵaý­shysyna aınalyp úlgerdi.

Qazaqstandyq sport jýrnalısi Bek Tóleýov «Zenıttiń» Nur­álini oqý-jattyǵý jıynyna sha­qyrǵanyna tańqalǵanyn jáne ol klýbpen kelisimshart jasas­qannyń ózinde basqa klýbqa jalǵa berilýi múmkin ekenin aıtady.

– Nuráliniń «Zenıtpen» birge Dýbaıǵa attanǵany meni azdap tańdandyrdy. Sebebi ol «Qaırat» chempıon atanǵan 2020 jylmen salystyrǵanda byltyr joǵary deńgeıli oıyn kórsete alǵan joq. Bul jerde klýb qojaıyny Qaırat Boranbaevtyń baılanysy sebep bolyp otyr­ǵany túsinikti. Baýyrjan Islam­han­dy da «Zenıt» synaqtan ótkiz­genin bilemiz. Nuráliniń Baýyrjanmen salystyrǵanda bir ǵana artyqshylyǵy bar. Iаǵnı ol áli jas. Sondyqtan «Ze­nıt» bolashaqty oılap, ony klýb­ta alyp qalýy múmkin. So­dan soń Reseıdiń ortańqol koman­dalarynyń birine jalǵa berýi de ǵajap emes. Mysaly, «Krylıa Sovetovke» degen sııaqty. Eki komanda arasynda jaqsy baılanys ornatylǵan. Al komandaǵa dál qazir alyp qalmasy anyq, – deıdi sport sarapshysy.

Al reseılik «Sport-Ekspress» basylymynyń jazýynsha, dál qazirgi ýaqytta «Zenıt» ortalyq qorǵaýshyǵa muqtaj. «Klýbta Chıstıakov, Lovren, Rakıskıı jáne 19 jastaǵy Hotýlev bar. Ázirshe Semaktyń bapkerler shtaby Hotýlevqa senim artpaı otyr (osy maýsymda ol 1 mınýt qana oınaǵan). Sonymen qatar kóktemde ýkraınalyq Iаroslav Rakıskııdiń kelisimsharty aıaq­talady, sondyqtan «Zenıtke» qazir ortalyq qorǵaýshy kerek. Onyń ústine Álipte qazaqstandyq tólqujat bolǵandyqtan, asa kóp yqtımaldylyqpen ol «Zenıtte» qalýy múmkin», dep jazady basylym.

Aıta keteıik, Nuráli Álip «Ze­nıttiń» oqý-jattyǵý jıynyna shaqyrylǵan alǵashqy qazaq­standyq fýtbolshy emes. Jankúıerlerdiń esinde bolsa, osydan eki jyl buryn Baýyrjan Islam­han da «Zenıttiń» jatty­ǵýyna qatysqan bolatyn. О́kinish­ke qaraı, Islamhannyń oıyny bas bapker Sergeı Semaktyń kó­ńilinen shyqpasa kerek, onymen kelisimshart jasaspady. Son­daı-aq 2017 jyly Erkebulan Seı­dahmet te «Zenıttiń» jastar klý­bynyń qataryna shaqyrylǵan-dy. Alaıda jerlesimizdiń kámelet jasyna tolmaýyna baılanysty bul transfer de iske aspaı qalǵan edi.