«Sammıt elder arasyndaǵy dıplomatııalyq qatynastardyń ornaǵanyna 30 jyl tolýy qarsańynda ótip otyr. Bizdiń aýqymdy Azııa óńirimiz zor resýrstarǵa jáne zor zııatkerlik áleýetke ıe», dedi Qazaqstan Prezıdenti Qasym-Jomart Toqaev.
Onyń aıtýynsha, bul aımaqta mańyzdy kólik dálizderi men jyldam damyp kele jatqan naryqtar shoǵyrlanǵan. Sol sebepti Azııanyń álemdik ekonomıkadaǵy róli aıtarlyqtaı ósti. Ol ınvestısııalar men kapıtaldy tartýdyń jańa jahandyq ortalyǵyna aınalýda.
Prezıdent bul óz kezeginde elder arasyndaǵy ózara tıimdi yntymaqtastyq úshin qolaıly múmkindikterdi iske asyrý úshin úlken perspektıvalar ashatynyn aıtty.
«Eń aldymen, bul saýdaǵa qatysty. Ortalyq Azııa elderi men Úndistannyń taýar aınalymy 2020 jyly 3 mlrd dollarǵa jetti. Bul rette Qazaqstannyń osy saýdadaǵy úles salmaǵy 80%-dy qurady. Alaıda, bul kórsetkishter bizdiń jıyntyq ekonomıkalyq áleýetimizge áli de sáıkes kelmeıdi», dedi Memleket basshysy.
Prezıdent «Ortalyq Azııa - Úndistan» sammıti sııaqty dıalog alańdarynyń jumysy elderdiń údemeli damýy, sondaı-aq jańa syn-qaterler men táýekelderge tıimdi jaýaptar ázirleý úshin praktıkalyq paıda ákeletinin atap ótti.
