Qazaqstan – shırek fınalda

Eýropa chempıonatynyń aldynda bir­qatar fýtzal mamandary bıylǵy birin­shilik týraly óz oılaryn ortaǵa salyp, V to­byn­daǵy tórt quramanyń ishin­de Italııanyń kelesi kezeńge shy­ǵý múmkindigin joǵary baǵa­laǵan edi. Tipti sarapshylar «Skýad­ra adzýrralyqtar» óz tobyn­da birinshi oryn alyp, pleı-off satysyna esh qıyn­dyq­syz shyǵatynyn aıtýdan jalyq­qan joq-tyn. О́ıtkeni Ita­lııa quramasy 1996 jyldan beri ótkizilip kele jatqan chempıonattyń eń tıtýldy ko­man­­da­larynyń biri sanalady. Atap aıtar bolsaq, olar osy kúnge deıin 11 márte jalaýy jelbiregen Eýropa chempıona­tyn­da 6 ret júldegerler qatary­nan kórin­gen. 2003 jáne 2014 jylǵy týrnırlerde bas júldeni oljalaǵan bolsa, 2007 jylǵy doda­n­yń fınalynda Ispanııadan jeńilip, kúmis júldeni qanaǵat tutqan. Al 1999, 2005 jáne 2012 jyldary úshinshi orynǵa taban tiregen bolatyn. Kári qurlyq birinshiliginde osyndaı júldege ıe komanda keshegi oıynnyń sózsiz favorıti edi.

Gronıngendegi matchtyń alǵashqy bes mınýtyn Italııa quramasy qarqyndy bastady. Igıta qorǵaǵan qaqpaǵa birqa­tar qaýipti shabýyl uıymdas­ty­ryp, qaqpashymyz­dyń áleýe­tin bir baıqap kórgendeı boldy. Qýa­ny­shymyzǵa oraı, bul joly Igıta óte jaqsy oınady. Al ýaqyt uzaǵan sa­ıyn jer­lesteri­miz birte-birte oıyn tizginin óz qol­daryna alyp, matchtyń 6-mınýtyn­da kezdesýdiń esebin ashty. Dýglas Jýnıor­d­an tamasha pas alǵan Birjan Orazov qar­sy­lastyń qorshaýynda tursa da, asqan sheberliginiń arqasyn­da shabýyldy golmen túıindedi. Arada úsh mınýt ótkende Azat Valıýllın mergendigimen kózge tú­sip, tablodaǵy kórsetkishti 2:0-ge jetkizdi. Jýyr­da ǵana ulttyq quramanyń jeıdesin kıgen Edson nátıjeli pastyń avtory atandy. Bul onyń úshin­shi matchtaǵy tórtinshi nátıjeli pa­sy edi. Oıyn barysynda ózi gol soqpasa da, komandalastary­nyń gol soǵýyna jaqsy múmkin­dik jasap bergenin aıta ketý kerek. Birinshi taımnyń bel ortasynan aýǵan shaǵynda Italııa quramasynan Nıkolodı esepti qysqartýǵa múmkindik aldy – 2:1. Oıynnyń birinshi ke­zeńi Qazaqstan quramasynyń basymdyǵymen aıaqtaldy.

Úzilisten keıin de Italııa quramasynyń jigitteri tarazy basyn teńestirýdiń qamyn oılap, bizdiń qaqpaǵa jıi shabýyl jasady. Alaıda qorǵanysta óte saýatty oı­naǵan jerlesterimiz qarsylastaryna gol soǵa­tyn­daı esh múmkindik bergen joq. Qar­sy shabýyl arqyly oınaýdy jón kórgen Kaka shákirtteri 30-mınýtta esepti eseleı tústi. Bir­jan Orazov shabýyldy ózi bas­tap, núktesin de ózi qoıdy. Al­ǵashqy matchta bir gol soǵyp, keıin­gi eki oıynda dýbldiń av­to­ry atanǵan jerlesimiz osylaısha 5 golmen sur­mer­gender tizi­minde kósh bas­­tady. Al matchyń aıaqtalýyna eki mınýt qal­ǵan­da Dýg­las bos qalǵan qaq­pany dál kózdep, kezdesý­diń núktesin qoıdy. Qorytyndy esep – 4:1.

Osylaısha, eki dúrkin Eýropa chempıondarynan basym túsken Qazaqstan quramasy óz tobynda birinshi orynmen kári qurlyq birinshiliginiń shırek fınalyna shyqty. Sondaı-aq bizdiń toptaǵy ekinshi oıynda Fınlıandııa quramasy Slovenııany 2:1 esebimen jeńip, olar da ekinshi orynmen shırek fınalǵa joldama aldy.

О́zge toptardyń nátıje­leri­ne toqtalar bolsaq, A tobynda úsh oıynnyń bárinde jeńiske jetken Portýgalııa men tek bir oıynda ǵana úzdik shyqqan Ýkraına jarystyń shırek fınalyna shyqty. S tobynda Reseı men Slovakııa jarysty ári qaraı jalǵastyrýǵa múmkindik alsa, D tobynda Ispanııa jáne Grýzııa quramalary shırek fınalda baq synaıtyn boldy.

Jerlesterimiz jartylaı fınalǵa shyǵý úshin A tobynda ekinshi orynǵa turaqtaǵan Ýkraına quramasymen oınaıdy. Match búgin Amsterdamdaǵy  Ziggo Dome sport kesheninde ótedi. О́kinishke qaraı, bul kezdesýde Qazaqstan quramasyna ekinshi «sary qaǵazdaryn» alǵan Taınan men Edson kómek­tese almaıdy. Esesine eki matchqa oıyn­nan shettetilgen Albert Aqbalyqov bul oıynda alań­ǵa shyǵady. Sonymen qatar koro­navırýsqa shaldyqqan Shyńǵys Esena­manov ta qatarǵa qosylyp qalýy múmkin. 

Eger Qazaqstan quramasy shırek fınalda jeńiske jete­tin bolsa, jartylaı fınalda Kaka shákirtteri Reseı jáne Grý­zııa jubynyń jeńimpazymen kezdesedi.