Jańa quram iske kiristi

Saıası qýǵyn-súrgin qurbandaryn tolyq aqtaý boıynsha memlekettik komıssııa Prezıdent Jarlyǵymen 2020 jylǵy 24 qarashada quryldy. О́tken jyly aýqymdy uıymdastyrýshylyq-daıyndyq jumystary júrgizildi. Atap aıtqanda, Qazaqstandaǵy saıa­sı qýǵyn-súrgin qurbandarynyń ne­giz­gi sanattaryn jan-jaqty zert­teý maq­sa­tynda taqyryptyq ba­ǵyttary bo­ıynsha maqsatty toptardan quralǵan 10 Jumysshy toby, 17 Aımaqtyq komıssııa quryldy, ádisteme ázirlendi, osyǵan deıin jabyq bolǵan qorlar men materıaldar ashylyp, kóptegen ister atqa­ryldy. 2021 jyly saıası qýǵyn-súrgin qurbandaryn tolyq aq­taý bo­ıynsha uıymdastyrýshylyq-iz­des­tirý kezeńi aıaqtaldy.

Ekinshi kezeńde jınaqtalǵan jáne kelip túsip jatqan materıaldardy, arhıvterdi jáne quqyqqorǵaý organdary men aımaqtyq komıssııalar jınaǵan tájirıbelerdi suryptaý, taldaý úshin bilikti mamandar men ǵalymdar qajet bolady. Sáıkesinshe, bul kezeńde jınaqtalǵan materıaldardy zertteý men júıeleý boıynsha tereń taldaý jumystaryn júrgizý kóz­delýde. Bul baǵyttaǵy jumystar Jo­ba­lyq keńseniń qyzmetkerlerinen bel­sen­dilikti, osyǵan saı daǵdylar men bilik­ti­likti talap etedi.

Memleket basshysynyń Jarlyǵyn oryndaý maqsatynda Premer-Mı­nıstr 2022 jylǵy 14 qańtarda Jo­ba­lyq ofıs­tiń kadrlyq quramyn kú­sheı­tý bo­ıynsha ókim shyǵardy.

Memleket basshysynyń komıssııa al­dyna qoıyp otyrǵan mindetterin oryn­daýdyń joǵary deńgeıdegi jaýap­ker­shiligine baılanysty Joba­lyq keń­se­niń kadrlyq quramyn Memlekettik komıssııa jumysynyń búkil kezeńinde olardyń jalaqylary men barlyq áleý­met­tik tólemderin saqtaı otyryp, múd­deli memlekettik organdardyń qyz­m­etkerlerimen, ǵylymı mekemeler men joǵary oqý oryndarynyń ókil­de­rimen jańartý jáne kúsheıtý ju­mystary júrgizildi.

2022 jylǵy 31 qańtarda Nur-Sultan qalasyndaǵy Jobalyq keń­sede jańa qurammen jınalys ótki­zilip, onda Mem­­lekettik komıs­sııa­nyń Jobalyq keńsesiniń jetekshisi S.A.Qasymov baıan­­dama jasady. Jınalysqa Prezıdent Ákimshiligi Ishki saıasat bólim basshysynyń oryn­ba­­sary V.V.Porýbaımeh, Sh.Ýálı­ha­nov atyndaǵy Tarıh jáne et­no­lo­gııa ınstıtýtynyń dırektory Z.E.Qabyl­dınov jáne Jobalyq keńseniń jańa qu­ra­my qatysty. Jobalyq keńseniń jańa quramy ózderiniń laýazymdyq mindetterine sáıkes jumysqa kiristi.