О́temaqy tóleýde qandaı máseleler bar?

Qazir óńirlik komıssııa shaǵyn jáne orta bıznes sýbektilerine keltirilgen shyǵynnyń somasyn anyqtaý jumystaryn jal­ǵas­tyryp jatyr. О́tken ju­mada alǵashqy eki kásipkerge tártipsizdik kezinde keltirilgen zalal úshin ótemaqy tólendi. Kásipker Aleksandr Tkachenkonyń «Mobılka» saýda úıindegi uıaly telefon satatyn býtıgi ózgelerdiki sııaqty túgi qalmaı tonalyp, qı­ratylǵan edi. Saldarynan 3,2 mln teńge shyǵynǵa ushyraǵan A.Tkachenko barlyq qajetti qu­jatty rásimdegennen keıin, oǵan tolyq kólemde qarajat aýdaryldy. Ekinshi kásipker Arkenjan Mırzabaev «Azııa park» jáne «Maksıma» saýda-oıyn-saýyq orta­lyqtarynda 2 býtıkti jalǵa alyp, balalar kıimin satyp, tabys taýyp kelse, tártipsizdik saldarynan onyń bıznesine 1,8 mln teńge zalal keltirildi. Oǵan da ótemaqy qarajaty aýdaryldy.

Biz buǵan deıin de Almatyda tártipsizdik pen tonaý saldarynan 1 581 kásipkerlik sýbektisi zardap shekkenin, shyǵyn somasy 45,6 mlrd teńgeni quraǵanyn habarlaǵan edik. Buǵan deıin de óńirlik komıssııa shyǵyndy óteý tetikterinde kinárat baryn anyqtap, óz tarapynan naqty usynystar engizgen bolatyn. Ákimdiktiń usynystary 2022 jylǵy 1 aqpanda Ulttyq ekonomıka mınıstrligimen jedel túrde kelisilip, úkimettik komıssııa deńgeıinde maquldandy. Endi shyǵyndy óteý erejesine tıisti ózgerister men tolyqtyrýlar engiziledi. Negizgi ońaltý shara­lary taýarlyq-materıaldyq qundylyqtarǵa kelgen múliktik zalalǵa qatysty. Endi 5 mln teńgege deıingi eń joǵary tólem somasymen jeńildetilgen mehanızm boıyn­sha búlingen jyljymaly ári jyljymaıtyn múlikke, qalpyna keltirýge kelmeıtin jáne joǵalǵan jabdyqtarǵa da shyǵyndy óteý joldary qarastyrylyp jatyr. Bul óz kezeginde zardap shekken bıznes sýbektilerin keńinen qam­týǵa múmkindik beredi.

Memlekettik bıýdjet qaraja­tynan bólek qorlardyń jeke aqsha­synan da tólem júrgizý má­se­lesi qarala bastady. Iаǵnı ótem­aqy tóleý prosesin jetildirý jolyn­daǵy izgi jumystar jalǵasa beredi.

Eske sala keteıik, qalanyń bu­rynǵy basshysy qańtarda zar­dap shekken kásipkerler kom­mýnaldyq shyǵyndardy tóleý 3 aıǵa, al qaladaǵy kommýnaldyq menshikti jalǵa alýshylardy 6 aıǵa jalǵa alý tóleminen bosatýǵa sheshim shyǵarǵan edi. Sonymen qatar «Almaty bıznes-2025» qalalyq baǵdarlamasy boıynsha aınalymdaǵy qarajatyn eselep alý úshin kásipkerlerge kepil usy­ný arqyly 10 mln teńgege deıin jyldyq 2 paıyzben 12 aıǵa nemese «Almaty» AО́K ishinara kepildigimen jeńildetilgen nesıe beriledi. «Almaty Fınans» JShS men «MFO Almaty» JShS zardap shekken kásipkerlerge negizgi qaryzdy óteý merzimin uzartady, aıyppuldar men ósimpuldardy 180 kúnge deıin shegeredi.

Sondaı-aq Almaty qalasynyń ákimdigi qala turǵyndary kóter­gen máseleler qataryndaǵy, Pre­zıdent Q.Toqaevtyń 2019 jyl­ǵy 29 qazandaǵy tapsyrmasyna sáıkes qaladaǵy jer telim­derinde qurylys júrgizýge tyıy­m bar ekenin málimdedi. Biraq qol­danystaǵy zańnama men Mem­leket basshysynyń tapsyrmasyn buzǵan zańsyz áreketter anyqtalyp otyr. Osyǵan baılanysty qala ákimi E.Dosaev bar­lyq mán-jaı anyqtalǵanǵa deıin belgili nysandarda (19 ýchaske), onyń ishinde Samal-3 shaǵyn aýdany men Dostyq, 125 ýchaskeleri ornalasqan aýmaqta júrip jatqan jumystardy toqtatý týraly sheshim qabyldady. Qala bıligi BAQ ókilderine joǵarydaǵy tizim boıynsha qazirgi ýaqytta mán-jaıdy anyqtaý jumystary júrip jatqanyn jáne aldaǵy kúnderi máselege tolyǵyraq túsinikteme beriletinin habarlady.

ALMATY