Olımpıada qalashyǵyna ornalasqan sportshylar, jattyqtyrýshylar, delegasııa músheleri jáne buqaralyq aqparat quraldarynyń ókilderi jergilikti halyqpen júzdesý turmaq, belgilengen aımaqtan syrtqa attap basa almaıdy. Sport jarysy Qytaıda ótip jatyr demeseńiz, onyń qytaı kórermeni men jankúıerlerine tikeleı qatysy joq kórinedi. Muny Beıjińge baryp ornalasqan qonaqtyń barlyǵy birdeı aıtyp jatyr. Qonaq úı men sport nysandary qorshaýly jáne kúni-túni kúzetiledi. Uıymdastyrýshylar indettiń taralýyn boldyrmaý úshin osyndaı sharalar qolǵa alynǵanyn aıtady.
Sheteldik medıa basylymdar bul kórinisti Qytaıdyń «Qysqy Olımpıada shary» dep atap ketti. Bul – syrttan ne ishten eshkimge kirýge ruqsat joq qoldan jasalǵan shar degenderi. Beıjińdegi 2022 jylǵy oıyndar halyqaralyq sport is-sharalarynyń ishindegi baqylaý deńgeıi eń joǵary jarys bolyp este qalatyn sekildi. Jalpy, koronavırýs pandemııasynda Olımpıada ótkizýge bolatynyna byltyr Japonııada kóz jetkizdik. Qytaı ózine júktelgen mindetke asa tyńǵylyqty daıyndyqpen kelgenge uqsaıdy.
Oıynǵa qatysy bar sportshylar, komandalardyń resmı tulǵalary, BAQ, eriktiler men basqalardy qosa alǵanda barlyǵy 60 myńǵa jýyq adam jumyldyrylǵan. Bul jandardyń aldaǵy aptalardaǵy kúndelikti áreketi koronavırýsqa tekserilýmen bastalady. О́tken aıdan bastap elge kele bastaǵandardyń arasynan 300-ge jýyq adamnan vırýs anyqtalǵan. Olardyń kelesi test nátıjeleri teris bolmaı, oıynǵa qosyla almaıdy. Nysandardaǵy jıi dezınfeksııa sekildi saqtyq sharalary da mundaı daıyndyqqa qanshalyqty mańyz berilgenin kórsetetindeı. Ashanadaǵy taǵam tasıtyn, eden jýatyn robottar da jumysyna adal. Olımpıadaǵa jetken jýrnalıster men qonaqtardyń alǵashqy áseri osyndaı.
Qytaıdaǵy Olımpııa oıyndarynyń saıası sıpatyna keler bolsaq, álemdegi alpaýyt elderdiń sońǵy jyldardaǵy qarym-qatynasy kúrdeli ekendigi belgili. AQSh pen Qytaı, AQSh pen Reseı teketiresin búkil álem baqylap otyr. Olımpıadanyń saıasılanbaýy týraly qansha aıtylǵanymen, bul múmkin bolmaı tur. Máselen, AQSh Qytaıǵa dıplomatııalyq baıkot jarııalap, oıynǵa óz ókilin jibermeıtinin málimdedi.
Jaqynda Qytaıdyń syrtqy ister mınıstri oıynnyń ashylý saltanatyna keletin tulǵalardyń tizimin jarııalady. Habarlamada Beıjińdegi qysqy Olımpııa oıyndarynyń ashylýyna 30-dan astam memleket, úkimet jáne halyqaralyq uıym basshylarynyń qatysatyny aıtylǵan. Shaqyrylǵan joǵary laýazymdy tulǵalar tiziminde Reseı prezıdenti Vladımır Pýtın, Mysyr prezıdenti Ábdel Fattah Ás-Sısı, Saýd Arabııasy koroldiginiń taq murageri hanzada Muhammed ben Salman, Qatar ámiri sheıh Tamım ben Hamad Ál Tanı, Abý-Dabıdiń taq murageri sheıh Muhammed ben Zaıd Ál Nahaıan jáne Pákistan premer-mınıstri Imran Han bar.
Sondaı-aq Ortalyq Azııa elderi – Qazaqstan, Qyrǵyzstan, Tájikstan, Túrikmenstan men О́zbekstan basshylary da Olımpıada qonaqtary bolady. Aqorda Qazaqstan Prezıdenti Qasym-Jomart Toqaevtyń QHR Tóraǵasy Sı Szınpınniń shaqyrýymen XXIV Qysqy Olımpııa oıyndarynyń ashylý saltanatyna qatysý úshin Beıjiń qalasyna jumys saparymen baratynyn habarlady.
Odan bólek Polsha, Serbııa, Sıngapýr, Argentına, Ekvador jáne Mońǵolııa prezıdentteri de Beıjińde bolady. Halyqaralyq uıymdardan qonaqtar qatarynda BUU Bas hatshysy Antonıo Gýterrısh, BUU Bas Assambleıasynyń tóraǵasy Abdýlla Shahıd jáne Dúnıejúzilik densaýlyq saqtaý uıymynyń basshysy Tedros Adhanom Gebreıesýs bar.
AQSh-pen qosa Aýstralııa, Belgııa, Kanada, Danııa, Estonııa, Germanııa, Japonııa, Lıtva men Ulybrıtanııa basshylary da Qytaıda adam quqyǵy shekteldi delingen aıypqa baılanysty óz ókilderin jibermeıtinin málimdegen. Osylaısha, álem elderiniń kóshbasshylary oıyndy saıasılandyrǵanǵa uqsaıdy. Jaqyn kúnderi Sı Szınpın men Vladımır Pýtın kezdesýiniń mańyzy sport jarystarynan kem túspeıin dep tur.
