Talanttary top jarǵan Kovent-Garden Koroldik baleti, amerıkalyq balet teatry jáne Kvınslendsk baletiniń jetekshi solısteri qatysqan álemdik deńgeıdegi gala-kórsetilim 26 qańtardan 5 aqpanǵa deıin jalǵasady.
Osy aıtýly is-sharada Baqtııar Adamjan men Shuǵyla Ádephan A.Hachatýrıannyń «Spartak» baletinen bir nómirdi oryndap, kórermenderdiń ystyq yqylasyna bólendi.
A.V.Seleznev atyndaǵy Almaty horeografııalyq ýchılıshesiniń túlegi Baqtııar Adamjannyń ónerdegi tabysty joly Spartak partııasynan bastalyp, ol birneshe márte Nıý-Iork, Ystanbul, Seýl, Máskeý jáne t.b. shaharlarda ótken halyqaralyq balet baıqaýlarynyń laýreaty atandy. Álemniń áıgili sahnalarynda óner kórsetti.
– Alǵashqy oryndaýymyz keremet boldy, – deıdi Baqtııar. – Kórermen bizdi óte jaqsy qabyldady. Zalda ıne shanshar oryn bolǵan joq. Jurtshylyqtyń qoshemeti bizge shabyt syılady, − deıdi ol.
Ballet International Gala balettiń jetekshi ártisterin jınaýy kópshiliktiń nazaryn aýdaryp, buqaralyq aqparat quraldarynda keńirek aıtyldy. Sonyń ishinde oqyrmandardyń qyzyǵýshylyǵyn oıatqan oryndaýlardyń biri «Astana Opera» ártisteriniń nómiri bolǵandyǵyn birqatar aýstralııalyq jáne álemdik BAQ ókilderi jazypty.
Ásirese aýstralııalyq synshylardyń biri Fıl Braýn The Courier Mail gazetinde Baqtııar men Shuǵylanyń ónerine joǵary baǵa bergen.
«Spartak» baletinen úzindi oryndaǵan qazaqstandyq qos bıshi – Baqtııar Adamjan men Shuǵyla Ádephandy kórgenime sene alar emespin. Olarǵa munda óner kórsetý ońaı bolmady, sonda da olar óz maqsattaryna jetti. О́tken keshte qazaqstandyq jup kezinde jazylǵan eń ádemi áýenderdiń biri – Aram Hachatýrıannyń mýzykasyna keremet bıledi. Jáne de Baqtııar Adamjannyń beınesi shynaıy Spartaktan aınymady. Shyn máninde, Grıgorovıch ony rólge ádeıi tańdap alǵan sebebi de túsinikti. Bul juptyń óner kórsetýi bizdi tańǵaldardy», deıdi ol.
Bir sózben aıtqanda, otandyq balet ártisteriniń osyndaı aýqymdy sharalarǵa qatysýy olardyń deńgeıiniń joǵary ekenin kórsetedi.
