Qarsyz qysta kúre joldyń shańy shyǵyp jatyr eken. Jyldaǵydaı adymyńdy ashtyrmaıtyn kóktaıǵaq joq. Etpisirim ýaqytta ańsaǵan aýylǵa jetip jyǵyldyq. Áýletimizdiń úlkeni О́mir aqsaqaldyń tabaldyryǵynan attaǵanbyz. Kópten kórmegen jamaǵaıyn qaýqyldap, qýanyp qarsy aldy. Áýeli aýyl-aımaqtyń, etjaqyn aǵaıyn-týystyń amandyq-saýlyǵyn suradyq.
– Myna derttiń bitetin kúni bolady ma eken? – dedi aqsaqal, – aǵaıyn-týys bir-birimen burynǵydaı emen-jarqyn aralasa almaı jatbaýyr bolyp bara jatyr. Toı-tomalaq tıylǵaly qashan, tipti bir-birimizdiń júzimizdi kórýden qaldyq. Sender de jyl aralatyp soǵyp tursyńdar.
О́kpesi oryndy. Biz saǵynǵanymyzben, indet úıden shyǵarmaı tur emes pe? Sebebin aıtqanbyz.
– Bilemin, – dedi aqsaqal, – ánsheıin aıtyp jatqanym ǵoı. Osy jaman aýrýdan qutylǵan kúni aqsarbas shalyp, qurmaldyq beremin.
Bul ýaqytta dám de aldymyzǵa kelip qalǵan.
– Baýyrsaqqa maı jaǵyp jeńder, – dedi apaı, – baıaǵydaı dámi til úıiretin sary maı joq, dúkenniń maıy. Kartopke deıin qaladan aldyramyz.
Jolserigim aqsaqal aıtqan aqsarbastyń túpki mánin túsinbeı otyr eken. Álden soń áńgimege aralasyp, mánin suramasy bar ma? Búginginiń jaıyn jaqsy biletin qarııa shamdanǵan joq. Joǵary oqý ornyn bitirip, aǵylshyn tilinen sabaq berip júrgen jıensharǵa aqsarbastyń jaqsy tilek júzege asqanda qurbandyqqa shalynar mal ekenin táptishtep túsindirdi. Al men bolsam apaı aıtqan dastarqan mázirin qazbaladym. Sóıtsek, aýyldaǵy kelinder burynǵysha sıyr saýyp, maı bylǵaýdy birjola qoıǵan eken. Tipti esiktiń aldynda bos jatqan baqshaǵa kókónis túgil kartop ta ekpeıdi.
– Amalyń bolsa iste, – deıdi aqsaqal ábden túńilip ketken adamsha, – kelinder buzaý jaqsy jetiledi dep syltaýratady. Kelinniń sózin bala sóılegen soń kóksý iship otyrǵan jaı bar.
Qaıtyp kele jatyp men de bir sheshimge keldim. Aýyldaǵy kelinder sıyrdyń jelinine jarmasqan kúni men de bir aqsarbas beremin dep ishteı atadym.
Kókshetaý
