Keńestik zulmatty, alapat ashtyq pen qandy soǵysty kórgen, Aral qasiretin kókiregine túıip, ony adam ekologııasymen shendestire jazǵan klassık jazýshy talapshyl da talǵampaz qalpymen artyna óshpes mura, ólmeıtin týyndylaryn qaldyrdy. Syrty yzbarly qatal kóringenimen ishi meıirimge toly patrıarhtyń kirpııaz bolmys-minezi men shyǵarmashylyq kúrdeli álemi ózgege uqsamaıtyn. Qolyna alǵan jaqutty jarqyratatyn qas zergerdeı, minsiz músinshideı ol árbir shyǵarmasyn kúni keshege deıin qaıta-qaıta qashaýdan, túzep-kúzeýden, shıratyp shyńdaýdan áste jalyqpaıtyn. Árdaıym aǵysqa qarsy júzetin, sertine berik, dini qatty, dili qunarly, dińi sekseýildeı shymyr daraboz qubylys, tarlan tulǵa osy degdar bolmysynan, tarpań minezinen bir sát tanǵan emes. Bar ǵumyryn jazýǵa arnaǵan, sóıtip shynaıy shyǵarmashylyqqa adal bolǵan onyń muraty ǵajap keıipkerler galereıasymen ajyraǵysyz ushtasyp, Ábeń men ádebıet degen birtutas qasterli uǵymǵa aınalyp ketkendeı. Onyń bireýdi kólgirsip maqtamaıtyn, ózi de maqtanbaıtyn, sabyry sarqylmaıtyn, tózimi túgesilmeıtin shyńyraý minezi daladan daryǵan nár edi. Basqa qalamgerler mereıli beleske shyqqan saıyn dabyralap madaq jazdyryp, daqpyrtpen toı jasap jatqanda abyz Ábeń bir de bir ataýly toıyn atap ótpegeni búgingi bizderge ónege. Ol tutas shyǵarmasyna ǵana emes, árbir sóılemine, árbir jazǵan sózine yqtııatpen mán berip, qaıta-qaıta óńdeýden-jóndeýden áste qajymaıtyn. Sýretkerdiń kórkem sóz sıqyryna ińkár perishte kóńili, estetıkalyq tunyq talap-talǵamy ony únemi mazasyz etkenine kózimiz talaı márte jetken.
Ábeniń qazasy ádebıetimiz úshin ǵana emes, el gazeti úshin de aýyr qaıǵy. Abyz aqyrǵy maqalalarynyń birin «Egemen Qazaqstanǵa» berdi. Bas basylymnyń ǵasyrlyq toıyna arnaıy kelip, izgi tilegin arnap «saýatymdy ashqan osy gazet, sondyqtan ol Qurannan keıingi rýhanı ustazym» degen edi jaryqtyq tebirenip turyp. Oqyrmanymyz retinde gazet redaksııasyna da talaı keldi, sonda Ábish, Sherhan inileriniń aldynda taǵzym etkendeı únsiz uzaq turatyn. Biz de Ábeńniń janynda biraz júrdik, sarqylmaıtyn áńgimesin tyńdap, ónegesin kórdik. Ustazdaryna degen sheksiz qurmeti, zamandastaryna degen erekshe iltıpaty, inileri men jastarǵa degen qamqorlyǵy ár sózinen ańǵarylyp turatyn. Jasandylyqty, jaǵympazdyqty, jarymjan dúnıeni jany súımeıtin. Arǵy ǵasyrlardan altyn arqaýy úzilmeı jetken ádebıet pen ónerge, qazaqtyń qasıetti qara sózine adaldyqtyń ǵajaıyp etalony bolǵan arqaly abyz jadyrap rııasyz qýana da biletin, keıde qyrsyǵyp, qataıyp qalatyn. Sonyń bári ózine jarasyp turatyn.
Álemge áıgili klassık jazýshydan aıyrylyp qalǵanymyz arqamyzdy aıazdaı qarıdy. Kóńilimizge demeý – artynda qalǵan kól-kósir ádebı murasy men jelkildep ósip kele jatqan jas oqyrmandary.
«Egemen Qazaqstan» gazetiniń atynan barsha oqyrmandarymyzǵa kóńil aıtamyz. Baqul bolyńyz, Alashtyń abyzy! Janyńyz jánnatta bolsyn!
