«QR Úkimetiniń qaýlysymen Almaty qalasy Medeý aýdanyndaǵy 1002,0 gektar aýmaqty quraıtyn Kókjaılaý shatqaly Ile-Alataýy memlekettik ulttyq tabıǵı parkiniń quramyna qaıtaryldy. Kókjaılaý – biregeı tabıǵıtymen qundy. Onda qylqan japyraqty shyrshaly orman bar. Ásirese Qumbel jotasynyń baýraıyndaǵy tómengi bóligindegi estetıkalyq landshaftyń qundylyǵy zor. Munda Qazaqstan Respýblıkasynyń Qyzyl kitabyna engen ósimdikter ósedi: Shrenk shyrshasy, Sıvers alma aǵashy, kádimgi órik, qyzǵaldaq jáne taǵy basqalary», dep habarlady QR Ekologııa, geologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıtetinen.
Eske sala keteıik, 2014 jyly Úkimettiń qaýlysymen jalpy aýmaǵy 1002 gektar Ile-Alataýy memlekettik ulttyq tabıǵı parkiniń jeri aıryqsha qorǵalatyn tabıǵı aýmaq sanatynan Almaty qalasynyń Medeý aýdanynyń qory sanatyna «Kókjaılaý» taý shańǵysy kýrortynyń qurylysy men jumys isteýi úshin berilgen bolatyn.
2019 jylǵy qazanda Qazaqstan Respýblıkasynyń Prezıdenti Qasym-Jomart Toqaev jurtshylyqtyń pikirin eskere kelip, «Kókjaılaý» shatqalynda taý shańǵysy kýrortyn salý jobasyna tyıym salǵan edi. 2021 jyldyń qazan aıynda Kókjaılaý shatqalynda ornalasqan 1002,0 gektar jer ýchaskesin, Ile-Alataýy memlekettik ulttyq parkine qaıtarý máselesin qarastyrý jónindegi komıssııa quryldy.
«Komıssııa memlekettik ekologııalyq saraptamanyń oń qorytyndysy bolǵan jaǵdaıda Kókjaılaý shatqalyn Ile-Alataýy ulttyq parkine berý týraly sheshimdi zańdy dep tanydy», dep qosty vedomstvadan.
