Ońtústikte bank aqshasyn urlaǵandar ustaldy

Ońtústik Qazaqstan oblysyndaǵy bank aqshasyn urlaǵandar ustaldy.  Bul týraly «KTK» telearnasy habarlady. Atalǵan oqıǵa byltyrǵy jeltoqsan aıynda Shardara aýdanynda oryn aldy. Sol kezde bank bólimshesinen 63 mln. teńge urlanyp, kúdikti retinde 27 jastaǵy kúzetshi qamaýǵa alynǵan bolatyn. Tergeý barysy 3 aıǵa sozylyp, kúzetshi osy iske qatysy bar banktiń 6 qyzmetkerin atap berdi. О́zderi qyzmet isteıtin bank aqshasyn urlaý úshin 6 qyzmetker aldyn ala jospar qurǵan. Sóıtip, olar kúzetshini úlesińdi beremiz dep ılandyrǵan. Osydan keıin kúdiktiler ǵımarat terezesin ashyq qaldyryp, beıne baqylaýlardy óshiredi. Odan ári aqsha turǵan bólmege kirip, 63 mln. teńgeni qoldy etken. «Kúdiktiler aqsha urlaý qylmysyna jaqsy daıyndalǵan. О́ıtkeni, olar qaı terezeden kirgende, beıne baqylaýǵa túspeıtinin bilgen»-deıdi oblystyq ishki ister departamenti basqarmasynyń bastyǵy Nurıddın Daýylbaev. Osy urlyqqa Shardaradaǵy ǵana emes, oblystaǵy bank bólimshesi basshylarynyń qatysy bolýy múmkin. Qazir olar da tergelýde. Ámirhan Almaǵanbetov. Derekkóz: «KTK» telearnasy. Foto: «KTK».