Sýretshiniń zaıyby Gúljámish Jolamanova osy kartınany Muratbektiń ózine uqsatady. Qylqalam sheberiniń ózi de jylqy jyly ómirge kelgendikten be, tabıǵaty da soǵan tartyp týypty. Nebári otyz úsh jas qana ómir súrgen talant ıesi beıneleý ónerinde óz qoltańbasyn aıshyqtaǵan súbeli dúnıeler qaldyrdy.
Jazýshy Aıgúl Kemelbaevanyń qylqalam sheberiniń «Qulager» kartınasy jaıynda jazǵan kólemdi maqalasy bar, sonda qalamger: «Muratbektiń Qulageri ǵajap bolǵanda aq tústi. Qulagerdiń sýrettegi kózine arbalǵandaı kóp qaradym, ol qusa-sher, arman, qııalyn jylqy jaryqtyqtyń kóz janaryna aýmaı kóshirgen. Qulagerdiń kóz sıpaty ushyp bara jatqan qus beıneli eken. Jadyma ańyratyp qazaqtyń qos halyq áni tússin: «Ushyrdym uıasynan balapan qaz-aı» men «Ushady kógala úırek kólge qarsy, Uıasy janýardyń jelge qarsy». Juldyzdaı aqqan Qulager. Kóz emes, beıne qus qanatyndaı aǵyp bara jatqan dáýrenniń ózi bar», dep sýretshiniń biregeı týyndysy týraly shynaıy tolǵapty.
Bala kúninen aýyldaǵy káriqulaq qarııalardyń ańyz-áńgimelerin qulaǵyna quıyp ósken sýretshiniń shyǵarmashylyǵynda tarıhı taqyryptar erekshe oryn alady. Ásirese avtor «Syrym batyr», «Rýh shaqyrý», «Edil-Jaıyq», «Kúltegin men Bilge týraly jyr», «Saryn», «Qazanat», «Tumar», «Qorqyttyń teńizge kelýi», «Kereı-Jánibek», «Jaman yrym nemese qaǵanattyń qulaýy», «Qyzǵysh qus», «Jekpe-jek», «Attılanyń elesi» sekildi týyndylarynda ǵasyrlar qoınaýlarynyń qatparyna úńilip, tarıhı beınelerdi boıaý tilimen sheber sóılete bilgen.
О́nertanýshylar Muratbek Jolamanovtyń shyǵarmashylyǵyn eki kezeńge bólip, olardy akademııalyq jáne «Jýsan ıisi» dep qarastyrady. «Jýsan ıisi» atty sıkldik jumystaryn sýretshi ómiriniń sońǵy jyldarynda salǵan. О́ner zertteýshileriniń pikirinshe, qylqalam sheberi týyndylarynyń ishindegi kásibı joǵary deńgeıde salynǵan, myqtylary da – osylar dep aıtylady. Bul sıkldik jumysqa 15 kartına kiredi.
«Onyń sýretteriniń kóbi − tarıhı taqyrypta jazylǵan kórinister. Erte jaýgershilik zamandarda, soǵysqa attanǵan batyrdyń anasy shúberekke oraǵan jýsandy birge berip jiberedi eken. Sol jýsan ıisinen elin saǵynǵan batyr óz anasyn kórýge, elin kórýge qushtar bolady. Ańyzdar men tarıhı shejirelerde osylaı aıtylady», deıdi zaıyby Gúljámish Bákeıqyzy.
Qamshynyń sabyndaı qysqa ǵumyr keshse de, ónerde óz izin qaldyrǵan sýretshi Batys Qazaqstan oblysynyń Josaly aýylynda dúnıege kelgen. 1990 jyly O. Tańsyqbaev atyndaǵy kórkemsýret kolledjiniń «Keskindeme» bólimin, al 1996 jyly T.Júrgenov atyndaǵy Qazaq ulttyq óner akademııasyn támamdaǵan. О́ner akademııasynda ataqty sýretshi, akademık Q.Teljanov pen professor M.Qalymovtyń sheberhanasynda oqyǵan. Odan keıin oqý úzdigi retinde osy joǵary oqý ornynda ustazdyq qyzmetke qaldyrylady. Osy jyldar aralyǵynda ol kóptegen respýblıkalyq jáne halyqaralyq kórmege qatysyp, sheberligi shyńdala tústi. Alǵashqy jeke kórmesi 1999 jyly Oral qalasynda uıymdastyryldy.
Buǵan deıin elordada qylqalam sheberiniń kórmesi eki-úsh márte uıymdastyryldy, sondaı bir kórmesinde ustazy, Qazaqstan Sýretshiler odaǵynyń múshesi Sembiǵalı Smaǵulov Muratbektiń qysqa, biraq óte jaryq ǵumyry shyǵarmashylyq izdenister men bastamalarǵa toly bolǵandyǵyn aıtqany bar.
«Ol ózin túrli janrlarda baıqap kórdi. Ony Jánibek pen Kereı handar, Mahambet, Syrym batyrlar sekildi uly tarıhı tulǵalar qyzyqtyratyn. Shyǵarmashylyq samǵaýynyń erte úzilgeni ókinishti, alaıda Muratbek artyna mol shyǵarmashylyq mura qaldyrdy. Onyń ómiri búgingi óskeleń urpaq úshin óz Otanyna qaltqysyz qyzmet etýdiń jarqyn mysaly bolary sózsiz», dedi ol.
Búginde Muratbek Jolamanovtyń beıneleý ónerimizdiń qazynasyn baıytqan tamasha týyndylary elimizde ǵana emes, Túrkııa, Polsha, Ulybrıtanııa, Koreıa sekildi memleketterdiń jeke qorlarynda saqtaýly tur. Jerlesteri de tuǵyrly talant ıesin umytpaı, únemi eske alyp otyrady. Qylqalam sheberiniń týǵan jeri Josaly aýylyna sýretshiniń músini ornatylyp, turǵan úıine eskertkish taqta qoıylǵan.
