Tehnıkalyq jáne kásiptik bilim berý departamenti dırektorynyń orynbasary Ernat Júnisovtiń aıtýynsha, saladaǵy bilim sapasyn jaqsartyp, zaman talabyna saı etý úshin úsh baǵytta keshendi sharalar qolǵa alynǵan.
«Tehnıkalyq jáne kásiptik kolledjderdiń bilim sapasyna jumys berýshiler tarapynan da, qoǵam tarapynan da syn kóp aıtylyp júr. Mınıstrlik osy baǵytta biraz jumys istep jatyr. Sonyń biri – akademııalyq derbestik. Buryn kolledjderdegi oqý baǵdarlamalaryn mınıstrlik ázirlep, oqý pánderi men kólemin, merzimderin anyqtap beretin. Oqý orny sol baǵdarlama boıynsha ǵana jumys isteıtin. Ol kezde oqý oryndarynyń baǵdarlamany ózgertýge eshqandı múmkindigi bolmady. Akademııalyq derbestiktiń aıasynda oqý oryndary jumys berýshilermen birlesip oqý baǵdarlamalaryn kásiptik standarttar negizinde ázirlep, merzimin de ózderi bolyp anyqtaıdy. Buryn oqý merzimi 1 jyldan 4 jylǵa deıin bolsa, qazir ony jumys berýshiler men oqý oryndary ózderi belgileıdi», dedi mınıstrlik ókili.
Departament dırektorynyń orynbasary bir oqý baǵdarlamasy arqyly birdeı biliktilik alýǵa ruqsat berilgenin atady.
«Oqý oryndary jumys berýshilerdi tartqan kezde eńbek naryǵyndaǵy, sol kásiporyndaǵy naqty talaptyń bárin eskeredi. Biz bir oqý baǵdarlamasy sheńberinde birneshe mamandyq alýǵa múmkindik berdik. Buryn aspaz bolyp shyǵý úshin ǵana stýdent 3 jyl oqýy kerek bolǵan. Qazir osyndaı bir mamandyq aıasynda 3 biliktilik alýǵa ruqsat jasap otyrmyz. Kez kelgen biliktilikti alǵannan keıin stýdentter eńbek naryǵyna shyǵyp, jumysqa ornalasa alady. Qajet bolsa, qaıta kelip basqa biliktilik boıynsha oqýyn jalǵastyra beredi. Oqý baǵdarlamalaryn kolledjder janynan qurylǵan ındýstrııalyq keńester bekitedi», dedi Ernat Júnisov.
