Kezdesý barysynda Qazaqstan men Reseı Prezıdentteriniń búgingi kelissózderiniń qorytyndysy boıynsha qol jetkizilgen ýaǵdalastyqtardy júzege asyrý máseleleri sarapqa salyndy.
«Elderimiz arasyndaǵy strategııalyq seriktestik pen shynaıy odaqtastyq qatynastardy ilgeriletý úshin kóp jumys isteý kerek. Bar kúsh-jigerdi kún tártibine engizilgen máseleler boıynsha naqty nátıjelerge qol jetkizý úshin jumsaý qajet. Men jańa ǵana Vladımır Vladımırovıchpen uzaq ári tıimdi kelissóz júrgizdim. Biz yntymaqtastyǵymyzdy nyǵaıtýǵa, halyqaralyq jáne óńirlik jaǵdaıǵa qatysty barlyq másele boıynsha sóılestik», dedi Qasym-Jomart Toqaev.
Memleket basshysy Qazaqstannyń jańa Úkimetimen júıeli jumys isteýdiń mańyzdylyǵyna toqtala ketti.
«Sizderdiń ókilderińiz ben Qazaqstannyń jańa Úkimeti arasyndaǵy baılanystarǵa tyń serpin bergim keledi. Qarym-qatynastar Reseı Úkimetimen aradaǵy iskerlik, belsendilik jáne óte tyǵyz baılanystardy jalǵastyrýǵa baǵyttalýy kerek», dedi Prezıdent.
Onyń aıtýynsha, Qazaqstan men Reseıdiń Kamaz, Sıbýr jáne basqa da jetekshi kompanııalarynyń qatysýymen júzege asyrylyp jatqan strategııalyq sıpaty zor mańyzdy birlesken jobalary bar. Bul jobalar óndiristik kooperasııany keńeıtýge, jańa jumys oryndaryn ashýǵa, eki eldiń ónerkásiptik jáne tehnologııalyq áleýetin kúsheıtýge baǵyttalǵan. Sonymen qatar Qazaqstan tarapy Eýrazııalyq ekonomıkalyq odaq aıasynda tyǵyz yqpaldastyq ornatýǵa nıetti.
О́z kezeginde Reseı Úkimetiniń basshysy eki el arasyndaǵy dostyq pen yntymaqtastyqty damytý úshin Qasym-Jomart Toqaevtyń Máskeýge jasaǵan saparynyń mańyzy zor ekenin atap ótti.
«Reseı Federasııasynyń Úkimeti joǵary deńgeıde qol jetkizilgen ýaǵdalastyqtardy oryndaý úshin barlyq qajetti sharany qabyldaıtynyn málimdeımin», dedi Mıhaıl Mıshýstın óz sózinde.
Kezdesýdi qorytyndylaı kele, Qazaqstan Prezıdenti ekonomıkalyq kooperasııanyń memleketterimiz arasyndaǵy yntymaqtastyqtyń strategııalyq maqsatyna saı keletinine senim bildirdi.
