Ashat Oralovtyń aıtýynsha, partııa Tóraǵasy Qasym-Jomart Toqaevtyń Jańa Qazaqstandy qurý boıynsha alǵa qoıǵan mindetterin sapaly ári ýaqtyly oryndaý úshin barlyq partııalyq resýrsty jumyldyrý qajet.
«Biz Memleket basshysy belgilegen reformalardy iske asyrý maqsatynda toptasýymyz qajet. Elimiz úshin osy kúrdeli kezeńde aýyzbirshilik tanytyp, Prezıdent jaqtastarynyń negizi bola bilýimiz kerek dep sanaımyn. Nur Otan partııasy – memlekettiligimizdiń ınstıtýsıonaldyq tiregi. Biz qoǵamdaǵy barlyq konstrýktıvti kúshtiń toptasýyn qamtamasyz etip, bar resýrstardy jumyldyra otyryp, qoǵamdaǵy turaqtylyqty saqtaýǵa úlken úles qosa alamyz. Eldiń damýy úshin eń mańyzdysy – saıası turaqtylyq pen qoǵamdaǵy kelisim», dedi Ashat Oralov.
Ol Nur Otan, eń aldymen, qarapaıym múshelerdiń, ıaǵnı muǵalimderdiń, medısına qyzmetkerleriniń, ónerkásiptik kásiporyndar jumysshylarynyń jáne qarapaıym partııalastardyń múddesin qorǵaýǵa tıis ekenin atap ótti.
Nur Otan partııasynyń basty maqsaty – halyqpen jumys júrgizý, problemalaryn bilý jáne olardy sheshý úshin jaǵdaı jasaý, bılik pen halyqtyń arasynda konstrýktıvti qarym-qatynasty qamtamasyz etý.
«Búginde Nur Otan-ǵa úlken jaýapkershilik júktelip otyr. Sondyqtan biz óz jumysymyzdy qaıta qaraýymyz kerek. Barlyq partııalyq organnyń, partııalyq fraksııanyń, qoǵamdyq keńestiń, bastaýysh partııa uıymynyń jumys tıimdiligin arttyrý qajet. Partııanyń bastamalary ortalyqta ǵana emes, barlyq jergilikti jerde kórinis tabýy úshin partııalyq qurylymdardyń búkil múmkindigin jumyldyrǵan jón. Ásirese bastaýysh partııa uıymdaryna basymdyq berý kerek. Bizdiń 4,5 myńnan astam bastaýysh partııalyq uıymymyz bar. Bul – kez kelgen saıası partııanyń negizgi ózegi, onyń naqty kúshi. Nur Otan-ǵa degen senim dál osy bastaýysh uıymdardan bastaý alady. «Bastaýysh uıymdar» partııalyqtardyń pikir alysý, naqty problemalardy sheshý ornyna aınalýǵa tıis. Belsendi emes, tıimsiz basshylardyń ornyna ashyq jınalystarda naqty bedeli bar kóshbasshylar saılanýǵa tıis», dedi Nur Otan-nyń Atqarýshy hatshysy.
Sonymen qatar Ashat Oralov Jas Otan jastar qanatynyń aldyna birqatar naqty mindet qoıdy. Onyń aıtýynsha, jastardy partııa aınalasyna biriktirý, naqty jumys isteıtin «áleýmettik lıftiler» qurý mańyzdy.
«Bul rette Jas Otan-ǵa erekshe mindet júkteledi. Ol formaldy is-sharalardan bas tartyp, jastardyń barlyq sanatymen jumysty jańa formatta júrgizýi qajet. Jas Otan belsendi jastar men úkimettik emes uıymdardy jumyldyrý ortalyǵyna aınalýǵa tıis. Bul uıymdaspaǵan jáne aýyl jastaryna basa nazar aýdara otyryp, kún saıynǵy júıeli atqarylatyn jumys bolýǵa tıis. Osy baǵyttaǵy jumystarǵa 500-den astam adamnan turatyn Jas depýtattar korpýsyn tartý qajet», dep atap ótti A.Oralov.
Sondaı-aq ol fılıaldardaǵy jumysqa azamattyq ustanymy bar belsendi adamdar, eń aldymen Prezıdenttik jastar kadrlyq rezerviniń, praımerızdiń, oblystardyń, qalalar men aýdandardyń rezervtik partııalyq tizimderiniń qatysýshylary tartylýǵa tıis ekenin atap ótti.
«Saılaý aldyndaǵy barlyq mindetteme tolyq kólemde oryndalýǵa tıis. Partııa Tóraǵasy Qasym-Jomart Kemeluly Toqaev óz sózinde: «Partııanyń odan ári ómirsheńdigi saılaýaldy ýádelerdiń qanshalyqty oryndalatynyna baılanysty ekenin túsiný kerek», dedi. Árbir eldi meken boıynsha 2021 jylǵy óńirlik saılaýaldy baǵdarlamalardyń iske asyrylýyna taldaý jasap, oryndalý sapasyna erekshe nazar aýdara otyryp, nátıjelerin barlyq deńgeıdegi máslıhattardaǵy fraksııalar otyrystarynda qaraý kerek», dedi A.Oralov.
Sonymen qatar ol azamattardyń ózekti máselelerine ýaqtyly den qoıý, olardy tikeleı efırde talqylaý tájirıbesin engizý qajettigine nazar aýdardy.
Onyń pikirinshe, máslıhattardaǵy partııa fraksııalarynyń otyrystary azamattarmen kún tártibin aldyn ala talqylaı otyryp, ashyq ótkizilýge tıis.
Atqarýshy hatshy taǵy bir mindet retinde máslıhat depýtattarynyń saılaýshylarmen esep berý kezdesýlerin ótkizýdi tájirıbege engizýdi jáne ózekti problemalar boıynsha, onyń ishinde shalǵaı eldi mekenderde kóshpeli otyrystar uıymdastyrýdy atady.
«Kelesi aptadan bastap Májilis depýtattary halyqpen kezdesý úshin óńirlerge shyǵady. Eń aldymen, kezdesýlerdiń ashyqtyǵyna basa nazar aýdarǵan jón, formalızm bolmaýy qajet. Qabyldaýǵa halyq qalaýlylarymen kezdeskisi keletinderdiń barlyǵyn jazý kerek. Jalpy, partııanyń qoǵamdyq qabyldaý bólmeleriniń jumysyn kúsheıtý qajet. О́ńirler men Respýblıkalyq qoǵamdyq qabyldaý bólmesi servıstik model aıasynda azamattardan kelip túskennen bastap túpkilikti sheshim shyqqanǵa deıingi ótinishterge monıtorıng júrgizýi kerek», dedi Atqarýshy hatshy.
