«Qarǵaly» súzgi stansasynyń qurylysyn bıyl shilde aıyna deıin aıaqtaý josparlanǵan. Jańa stansa aýdannyń 40 myńnan astam turǵynyn sýmen qamtamasyz etedi. Bul – Qaraǵaıly, Qarǵaly, Tastybulaq, Quramys shaǵyn aýdandary. Buǵan deıin aýdan turǵyndaryna jaǵdaı jasaý úshin «Halyqtyń bıýdjetke qatysýy» baǵdarlamasy arqyly balalar, oıyn jáne sport alańdary salynǵan bolatyn. Endigi jerde baǵdarlamany qarjylandyrý 500 mln teńgege (1,8 mlrd teńgege deıin) ulǵaıtylmaq.
Qaraǵaıly shaǵyn aýdanyndaǵy dárigerlik ambýlatorııanyń apatty ǵımaratyna qatysty oń sheshim qabyldandy. Nysan seısmıkalyq qaýipti jáne 2018 jyly paıdalanýǵa jaramsyz dep tanylǵan. Sondyqtan ambýlatorııa ornyna «Áleýmettik qyzmetter úıi» jobasy úlgisinde kópbalaly analar úshin áleýmettik nysan salynady.
Quramys shaǵyn aýdanyndaǵy memlekettik menshiktegi jerlerde (6 ga) emhana men balabaqsha salý úshin jobalyq-smetalyq qujattamasy ázirlenýde. Bıyl Tastybulaq shaǵyn aýdanynda uzyndyǵy 4,5 km jol asfalttalýy tıis.
Qaladaǵy baý-baqsha qoǵamdastyqtarynyń máselesi ózekti, osyǵan baılanysty aýdan ákimdikteri Qalalyq josparlaý jáne ýrbanıstıka basqarmasymen birlesip olardyń mártebesin naýryz aıynyń sońyna deıin anyqtaıdy. Sondaı-aq Tastybulaq jáne Aqjar shaǵyn aýdandaryndaǵy sý qubyry men káriz jelilerine qosý úshin jańa jobaǵa baý-baqsha qoǵamdastyqtarynyń eskerilmegen kóshelerin engizý qajet.
Qala ákimi E.Dosaev bıyl naýryz aıynda balalardy qabyldaıtyn Aqjar shaǵyn aýdanyndaǵy 120 oryndy jańa balabaqshany aralap kórip, keńes barysynda mektep pen basseıni bar 15 ga dene shynyqtyrý-saýyqtyrý keshenin salý máselesin sheshýdi tapsyrdy. Tóle bı kóshesi men Abaı dańǵylyn uzartýdyń jaı-kúıin tekserip, jer ýchaskelerin satyp alý prosesin jedeldetý jáne osy jobalardy 2022-2023 jyldary kezeń-kezeńimen iske asyrýdy bastaý qajettigin atap ótti. Naýryzbaı aýdanynyń ákimshilik ortalyǵyna deıin metropolıtendi jobalaý máselesi qaraldy.
Sonymen qatar bıylǵy qyrkúıek aıynda Abaı shaǵyn aýdanyndaǵy («Alma Sıtı-5» TK, «Qazaq Stroy» merdigerlik uıymy) 1200 oryndy mektep qurylysyn paıdalanýǵa berý, Shuǵyla shaǵyn aýdanynda (Alataý dańǵyly jáne «Alem Sıtı» TK) qosymsha eki mektepti iske qosý josparlanyp otyr. Jalpy aýdanda 2022 jyly barlyǵy 8 390 oryndy 7 mektep jáne 1 320 oryndy 5 balabaqsha salý qarastyrylǵan.
ALMATY
