Vedomstvo 2020 jyldyń mamyr aıynda О́zbekstanǵa Fransııadan 10 mıllıon AQSh dollary mólsherindegi aktıvter qaıtarylǵanyn atap ótti.
«2022 jylǵy 11 aqpanda Shveısarııa men О́zbekstan birqatar kelissózder ótkizdi, onyń barysynda eki delegasııa Birikken Ulttar Uıymynyń jańa kópjaqty senim qoryn qurýǵa kelisti. Qor Gúlnár Kárimovaǵa qatysty qylmystyq is júrgizý sheńberinde túpkilikti tárkilengen aktıvterdi qaıtarý úshin paıdalanylatyn bolady», dep túsindirdi О́zbekstan Ádilet mınıstrligi.
Mınıstrliktiń málimetinshe, qor Shveısarııada áli de jalǵasyp jatqan qylmystyq is júrgizý aıasynda bolashaqta túpkilikti tárkilenýi múmkin kez kelgen qosymsha aktıvterdi qalpyna keltirý tetigi retinde qyzmet etedi.
Qazirgi ýaqytta О́zbekstanǵa shamamen 131 mıllıon AQSh dollary qaıtarylýǵa daıyn.
«Qordy basqarý tetigi Shveısarııa, О́zbekstan jáne Birikken Ulttar Uıymynyń ókilderinen turatyn bolady. Osylaısha, Shveısarııa men О́zbekstan búkil restıtýsııa prosesine qatysatyn bolady. Qor О́zbekstanda ornyqty damý maqsatyna qol jetkizýge yqpal etetin bolady. Ol BUU-nyń О́zbekstan úshin ornyqty damý salasyndaǵy yntymaqtastyq jónindegi negizdemelik baǵdarlamasyna (UNSDCF) sáıkes jobalarǵa resýrstar bóletin bolady», dep qosty vedomstvo.
Barlyq jobalar BUU júıesiniń erejeleri negizinde Qordyń monıtorıngi men baǵalaý júıesine sáıkes baqylanatyn bolady, al azamattyq qoǵam uıymdary konsýltasııalyq ról atqarady dep josparlandy.
Qor óz qyzmetin Shveısarııa men О́zbekstan arasyndaǵy restıtýsııa týraly zańdy túrde mindetteıtin kelisimge qol qoıylǵannan keıin bastaıdy.
Sonymen qatar Máskeý qalasynyń soty Gúlnár Kárimova men onyń sybaılastaryna qatysty ózbek sottarynyń úkimderin moıyndady jáne qazirgi ýaqytta О́zbekstanǵa túsken qarajatty odan ári qaıtarý úshin tárkilengen múlikti satý boıynsha Reseı tarapymen jumysty uıymdastyrý boıynsha is-sharalar júrgizilýde.
Habarlanǵandaı, qaıtarylǵan qarajat halyqtyń ál-aýqatyn jaqsartý úshin áleýmettik salada paıdalanylatyn bolady.
Gúlnar Kárimova - О́zbekstannyń burynǵy Prezıdenti Islam Kárimovtyń qyzy. Ol 2015 jyldyń tamyzynda bopsalaý jáne salyq tóleýden jaltarǵany úshin sottaldy, al 2017 jyldyń 18 jeltoqsanynda taǵy bir is aıasynda oǵan on jyl merzimge bas bostandyǵynan aıyrý jazasy taǵaıyndaldy. 2020 jyldyń 18 naýryzynda sot jańa qylmystyq is aıasynda onyń túrme jazasyn 13 jyl tórt aıǵa deıin uzartty.
