Álem halqynyń sanynyń ósýine baılanysty jahandyq jetkizilim tizbeginiń jumysyn jaqsartý, azyq-túlik pen tamaq qaldyqtarynyń shyǵynyn azaıtý, sondaı-aq azyq-túlik tapshylyǵynan zardap shegetin halyqtyń qoljetimdiligin qamtamasyz etý úshin aýyl sharýashylyǵynyń ónimdiligin ınnovasııalyq arttyrý qajet. Qurǵaqshylyq, klımattyń ózgerýi, sýdyń jetispeýshiligi, sondaı-aq pandemııa sııaqty kókeıtesti problemalar aýyl sharýashylyǵynyń damýyna teris áser etedi, osylaısha ár eldiń azyq-túlik qaýipsizdigine nuqsan keltiredi.
«Qazaqstan Respýblıkasynyń jáne Ortalyq Azııanyń azyq-túlik qaýipsizdigin damytý perspektıvalary» halyqaralyq konferensııasy aýyl sharýashylyǵyn turaqty damytý salasynda tájirıbe almasý úshin, sondaı-aq azyq-túlik qaýipsizdigin damytýǵa kedergi keltiretin ózekti máselelerdi talqylaý úshin tamasha alań bolyp tabylady. Is-sharanyń uıymdastyrýshylary «Ulttyq agrarlyq ǵylymı-bilim berý ortalyǵy» KEAQ jáne Azyq-túlik qaýipsizdigi jónindegi ıslam uıymy (IOFS). Is-shara oflaın jáne onlaın formatta ótkizildi.
Konferensııany quttyqtaý sózderimen «Ulttyq agrarlyq ǵylymı-bilim berý ortalyǵy» KEAQ (UAǴBBO) Basqarma tóraıymy Gúlmıra Isaeva, Investısııalar jáne aýyl sharýashylyǵyn damytý jónindegi arab basqarmasynyń prezıdenti Mohammad bın Obaıd ál Mazrýı, «Qazaqstan Ǵarysh Sapary» UK» AQ Basqarma tóraǵasy Aıdyn Aıymbetov, IOFS bas dırektory Erlan Baıdáýlet ashty.
Plenarlyq otyrystan keıin UAǴBBO men Arab ınvestısııalar jáne aýyl sharýashylyǵyn damytý basqarmasy, IOFS jáne Arab ınvestısııalar jáne aýyl sharýashylyǵyn damytý basqarmasy, UAǴBBO men «Qazaqstan Ǵarysh Sapary» UK» AQ, IOFS jáne «Qazaqstan Ǵarysh Sapary» UK» AQ arasynda yntymaqtastyq týraly memorandýmdarǵa qol qoıyldy.
Konferensııa úsh sessııadan turdy, onyń aıasynda strategııalyq mańyzdy resýrstardy damytý, azyq-túlik qaýipsizdigi men maldyń aman-saýlyǵyn qamtamasyz etý, sondaı-aq Qazaqstannyń agroónerkásiptik sektoryndaǵy ınvestısııalyq múmkindikter máseleleri talqylandy. Sonymen qatar is-shara qatysýshylary aýyl sharýashylyǵy ǵylymynyń azyq-túlik qaýipsizdigin damytýdaǵy, qurǵaqshylyq, klımattyń ózgerýi, sýdyń jetispeýshiligi sııaqty problemalardy sheshýdegi rólin, sondaı-aq aýyl sharýashylyǵynyń turaqty damýyn qamtamasyz etý jónindegi sharalardy talqylady. Konferensııa jumysyna Ortalyq Azııa elderiniń aýyl sharýashylyǵy mınıstrlikteriniń, halyqaralyq azyq-túlik, ǵylymı mekemeler men agroholdıngterdiń ókilderi qatysty.
