Jýyrda Almaty qalasyndaǵy I.Jekenov atyndaǵy klınıkalyq juqpaly aýrýlar aýrýhanasynda Dámesh Qarataeva júzge tolǵanyn da atap ótip, indetten de aıyǵyp, dárigerlerge alǵysyn jaýdyryp, úıine qaıtty. Ǵasyr jasaǵan keıipkerimiz 5 aqpan kúni aýrýhanaǵa aýyr halde túsken bolatyn. Dárigerlerdiń aıtýynsha, álsiz naýqas birden ıntensıvti terapııa bólimshesinde em ala bastaǵannan keıin beti beri qaraǵan.
«Meni emdep, qoldaý bildirgen barlyq aq halatty abzal jandarǵa rahmetimdi aıtamyn, aınalaıyndar! О́mir jastaryń uzaq bolsyn! Meniń jasymdy bersin, áýmın! Elimiz tynysh bolyp, kórkeıe bersin», dep batasyn berdi úıine qaıtyp bara jatqan 100 jastaǵy keıýana Dámesh Qarataeva.
«Naýqasqa koronavırýstyq ınfeksııa dıagnozy qoıylyp, ókpesi zaqymdanǵan kezde aýrýhanaǵa tústi. Aýrýdy jeńýdegi basty jaıt – ájeıdiń ómirge degen qushtarlyǵy boldy», deıdi I.Jekenov atyndaǵy klınıkalyq juqpaly aýrýlar aýrýhanasynyń 1-sanatty dárigeri Danııa Nasyrbekova.
«Ájemiz bir apta boıy jótelip qoımaǵan soń, ýaıymdap, KT apparatyna túsirdik. О́kpesi 25% zaqymdanǵan. О́zim dáriger bolǵan soń basqa dárigerlermen keńesip, jedel túrde aýrýhanaǵa jatqyzdyq. Telefonmen sóılesken kezde jaǵdaıynyń jaqsarǵanyn baıqadym. Ájemizdiń qanshama nemeresi, shóbere, shópshegi bar, bári de aq halatty jandarǵa alǵystaryn aıtyp jatyr», dedi Dámesh Qarataevanyń nemeresi Nurbol Jumabekov.
Aıtqandaı, Dámesh áje óziniń 100-ge kelgen týǵan kúninde aýrýhanadan shyǵyp otyr. Qos qýanyshy qatar kelgen keıýanany aýrýhana mamandary gúl shoqtary men syılyqtaryn berip, shyǵaryp saldy. Al asyl ájeleriniń shańyraqtaryna aman-esen oralǵany úshin jaqyndary aýrýhana ákimshiligine zor alǵystaryn aıtady.
ALMATY
