Ǵ.Esqalıevtiń aıtýynsha, bul kezdesýler aldyn ala josparlanǵan.
«Terekti aýdanyndaǵy munaı óńdeý zaýyty jobasyna ınvestor bolyp tabylatyn Ábý-Dabı ámirliginiń sheıhymen zaýyt qurylysy kezinde týyndaǵan keıbir máselelerdi talqyladyq. Biz jobany jedel túrde júzege asyrý boıynsha máselelerdi talqylap, mindetterdi aıqyndadyq. Investor joǵary ónimdiligi bar munaı ónimderin óńdeıtin jáne qyzmetkerlerine (200-ge jýyq qyzmetker) eńbek etý men demalýǵa yńǵaıly, jaqsy jaǵdaı jasalǵan zamanaýı zaýyt salýdy kózdep otyr», dedi oblys ákimi sapar qorytyndysy týraly.
Aıta keteıik, elimizdegi tórtinshi munaı óńdeý zaýyty Batys Qazaqstan oblysy Terekti aýdanynyń Alǵabas aýylyna jaqyn jerde salynatyny jóninde 2019 jyly habarlanǵan edi. Joba quny 420 mln dollar bolatyny, jańa munaı óńdeý zaýytyna shıkizat Qarashyǵanaq munaı-gaz kondensaty ken ornynan jetkiziletini belgili bolǵan. Zaýyt ınvestorlary jobany júzege asyrýǵa eki jyl ýaqyt kerektigin, ol 2020 jyldyń sońyna deıin iske qosylýy kerektigin aıtqanymen, ol jospar júzege aspaı qalǵan.
Oblys ákimi osy saparynda sheteldik ınvestorlarmen qoı etin óndirý jobasy jáne arab elderine arnalǵan seleksııalyq jumystar baǵytyn talqylaǵan. Jaqyn arada arab ınvestorlarynyń mamandar toby Batys Qazaqstan oblysyna kelmek.
Ǵ.Esqalıev sonymen birge Ystanbul qalasynda Oral arqyly áýe júk tasymaly kólemin arttyrýǵa, mal terisin óńdeıtin zaýytty qalpyna keltirýge, sondaı-aq Oral qalasynda salynyp jatqan 4 juldyzdy qonaqúıdi basqarýǵa nıet bildirgen kompanııa jetekshilerimen kezdesti. О́ńir basshysy yqtımal ınvestorlardyń qarjysynan góri olardyń osy saladaǵy kópjyldyq tájirıbeleri mańyzdy ekenin aıtady.
«Arab jáne túrik kásipkerleri bizdiń elmen óte jaqsy tanys. Qazaqstan halqyna asa qurmetpen qaraıtynyna kóz jetkizdim. Muny paıdalaný kerek. О́ıtkeni álem elderi ınvestısııa tartý úshin bar kúshterin salýda. Aldaǵy bir-eki aıda biz bul kezdesýlerdiń alǵashqy nátıjelerin kóretin bolamyz. Bul kezdesýler Batys Qazaqstan oblysynyń damýyna oń serpilis beretinine senimdimin», dep jazdy Ǵ.Esqalıev áleýmettik jelidegi jeke paraǵynda.
Batys Qazaqstan oblysy
