Sanǵa emes, sapaǵa basymdyq beretin ýaqyt jetti

Short-trek

500 metr. Abzal Ájiǵalıev – 4-oryn; Denıs Nıkısha – 8-oryn; Ádil Ǵalıahmetov – 19-oryn;

1000 metr. Ádil Ǵalıahmetov – 24-oryn; Olga Tıhonova – 24-oryn;

1500 metr. Ádil Ǵalıahmetov – 8-oryn; Denıs Nıkısha – DNF; Olga Tıhonova – DNF;

Aralas estafeta. Iаna Han, Olga Tıhonova, Denıs Nıkısha, Abzal Ájiǵalıev – 6-oryn.

Qytaı jerinde short-trekten bir júlde buıyra ma dep edik. О́kinishke qaraı, úmitimiz aqtalmady. Degenmen 500 metrge jarys jolyna shyqqan Abzal Áji­ǵalıevtiń Olımpıadany 4-orynmen aıaqtaýynyń ózi biz úshin úlken jetistik sana­lyp otyr. Elimizde endi ǵana damý jo­lyna túsken short-trek sportynda buryn-sońdy mundaı nátıje tirkelmegen edi. 

Jalpy alǵanda, Mádiǵalı Qarsybekov jattyqtyratyn komandaǵa oń baǵa berýge bolady. Eki birdeı sportshymyz fınalda óner kórsetti. Júlde alýǵa Abzal Ájiǵalıevtiń de, Ádil Ǵalıahmetovtiń de múmkindigi bolǵan. Biraq Majarstan, Qytaı, Reseı, Kanada, Koreıa Respýblıkasy sııaqty elderdiń tájirıbeli sportshylary jeme-jemge kelgende otandastyrymyzdyń aldyn orap ketti.

Abzal osymen úshinshi Olımpıadasyn támamdady. Bıyl 30-ǵa tolatyn sport­shynyń endi tórt jyldan keıin Italııadaǵy Aq Olımpıadaǵa barýy ekitalaı. Bir aıta ketetin jaıt, eger el sportynyń tizginin ustap otyrǵan basshylar qazirden bastap short-trektegi shyrmaýy kóp máselelerdi sheshpese, erteńgi kúni Ádil Ǵalıahmetov, Denıs Nıkısha syndy jas, daryndy sportshylardyń bolashaǵyna balta shabamyz.

Frıstaıl

Mogýl. Dmıtrıı Reıherd – 8-oryn; Iýlııa Galysheva – 11-oryn; Pavel Kolmakov – 21-oryn; Anastasııa Gorodko – 21-oryn; Aıaýlym Ámirenova – 22-oryn; Olesıa Graýr – 28-oryn;

Akrobatıka. Aqmarjan Qal­murzaeva – 11-oryn; Janbota Alda­ber­genova – 13-oryn; Sherzod Hashyrbaev – 19-oryn.

Qazaqstan jankúıerleriniń júlde kútken sporttarynyń biri – frıstaıl. Soń­ǵy jyldary qysqy sport túrlerinde «jyr­tyǵymyzdy jamap» júrgen mogýl­shylar edi. Iýlııa Galysheva, Pavel Kol­makov, Dmıtrıı Reıherd syndy qyz-jigitterimiz álem chempıonattary men Álem kýbogynyń kezeńderinde udaıy júlde alyp, jankúıerlerin qýantyp júrdi. Tipti osydan tórt jyl buryn Koreıa jerindegi Olımpıadada qorjynymyzǵa jalǵyz qola medal salǵan da Iýlııa Galysheva bolatyn.

О́kinishke qaraı, frıstaılshylar da tórtjyldyqtyń basty jarysyna daıyn bolmaı shyqty. Úmit kútken Dmıtrıı Reıherd pen Pavel Kolmakov fınalǵa shyǵa almady. Iýlııa Galyshevanyń joly tipten aýyr boldy. Olımpııa oıyndaryna kele sala koronavırýspen aýyrǵan sportshymyz jarysty ekinshi irikteý kezeńinen bastaýǵa májbúr boldy. Onyń ózi sońǵy sátte ǵana sheshildi. Osynyń barlyǵy Galyshevaǵa psıhologııalyq jaǵynan qıyndyq týdyrǵany aıtpasa da túsinikti. Sodan da bolar, otandasymyz dál sheshýshi sátte bilgeninen jańylyp, óreskel qatelik jiberdi.

Qalǵan sportshylarǵa kelsek, Aıaýlym Ámirenova, Anastasııa Gorodko, Olesıa Graýr sekildi jastarymyzǵa tájirıbeli qarsylastaryna tótep berýge áli erterek ekenin baıqadyq. 

Al frıstaıldyń akrobatıka túrine kelsek, Janbota Aldabergenova, Aqmarjan Qalmurzaeva, Sherzod Hashyrbaev úshtigi óner kórsetti. Sherzod – ulttyq quramaǵa keshe ǵana qosylǵan jas sportshy. Al Janbota men Aqmarjan tájirıbeleri tolysqan, naǵyz babynda bolatyn. Biraq eki qyzymyz da dál jaýapty jarysta biz kútkendeı nátıje kórsete almady. Biraq qazaqtyń eki qarakóz qyzynyń sporttyń osyndaı kúrdeli de qaýipti túrinde úlken dodaǵa túsip júrgenderiniń ózi kóńilge qýanysh uıalatady.

Shańǵymen tramplınnen sekirý

Ortasha tramplın. Sergeı Tkachenko – 42-oryn; Danıl Vasılev (ortasha tramplın) – 46-oryn;

Úlken tramplın. Danıl Vasılev (ortasha tramplın) – 51-oryn; Sergeı Tkachenko – 54-oryn.

Elimizde tramplın kesheni Almaty jáne Shýchınsk qalalarynda salynǵan. Salýyn salǵanymyzben, qansha jyl ótse de dál osy sport túrinen nátıjemiz jaqsarmaı-aq qoıdy. Alty aı qysta Eýropany sharlap júretin sportshylarymyzǵa mem­leket tarapynan barlyq jaǵdaı jasalyp keledi. Baratyn jarystaryna baryp ta, qatysyp ta júr. Biraq Eýropa elderin aıt­paǵanda, Azııanyń kóshine de ilese almaı kelemiz. 

Taý shańǵysy

Slalom. Zahar Kýchın – 36-oryn; Aleksandra Troıskaıa – dnf; 

Alyp slalom. Zahar Kýchın – dnf.

Osy sport túri bizge kerek pe? Elimizde deni durys jattyǵý bazasy joq, ne jeńip alyp jatqan júldemiz joq. Qazaqstanda jattyǵyp jatqan taý shańǵyshylaryn da kórmeımiz. Áıteýir Olımpıadaǵa joldama alǵandardyń qataryn kóbeıtip júrmiz. Qys bastalǵanda Eýropaǵa ketip, kóktemge taman oralatyn «týrısterdiń» bizge qandaı qajeti bar? Bálkim, osy sport túrine ketip jatqan mıllıondardy short-trek sııaqty sport túrlerine bólip, máselelerin sheship berýge bolmas pa? Sanǵa emes, sapaǵa jumys isteıtin ýaqyttyń jetkeni anyq.

Shańǵy qossaıysy

Ortasha tramplın+10 shaqyrym. Shyńǵys Rakparov – 41-oryn;

Úlken tramplın+10 shaqyrym. Shyńǵys Rakparov – 43-oryn.

Shańǵy qossaıysyna bir ǵana sportshymyz qatysty. Shyńǵys Rakparov eki qashyqtyq boıynsha baq synap, qyryqtyń arǵy jaq-bergi jaǵynan shyqty. Tramplınniń ózin jeke sport retinde damyta almaı jatqanda, oǵan shańǵy jarysyn qosý aqylǵa qonbaıtyndaı...

Bıatlon

10 shaqyrym. Sprınt. Aleksandr Mýhın – 49-oryn; Vladıslav Kıreev – 77 oryn;

12,5 shaqyrym. Iz kesý. Aleksandr Mýhın – 57-oryn;

20 shaqyrym. Jekeleı saıys. Aleksandr Mýhın – 52-oryn; Vladıslav Kıreev – 25-oryn;

7,5 shaqyrym. Sprınt. Galına Vıshnevskaıa – 52-oryn;

10 shaqyrym. Iz kesý. Galına Vıshnevskaıa – 52-oryn;

15 shaqyrym. Jekeleı saıys. Galına Vıshnevskaıa – 44-oryn.

Bıatlon – jankúıeri kóp sport túrleriniń biri. Ár jarys úlken tartyspen ótedi. Ásirese, Norvegııa, Shvesııa, Germanııa, Fransııa, Reseı syndy elderdiń arasyndaǵy tartys ózgeshe.

Osydan tórt jyl buryn Koreıadaǵy Olımpııa oıyndaryna 9 sportshy baryp edi. Sol kezdegi nátıjelerimiz búgingimen salystyrǵanda táýirleý edi. Biraq bul jolǵy barǵan úsh sportshymyzdyń arasynda eń joǵary nátıje kórsetkeni tek Vladıslav Kıreev qana boldy. Ol 20 shaqyrymdyq jarysty 25-shi bolyp aıaqtady.

Bir kezderi Galına Vıshnevskaıa Qazaq­stan bıatlonyndaǵy basty juldyzymyz boldy. Jastar arasynda álem chempıony atandy. Álem kýboktarynda júlde alyp júrdi. Talantty edi. Biraq eresekter arasyna ótkende biz Galınany joǵaltyp aldyq, óz múmkindigin tolyǵymen kórsete almady. Onyń basqa sportshylardan ereksheligi – nysanadan múlt ketpeıtin naǵyz mergenniń ózi. Bul joly da ol sprınttik jarysta birde-bir oǵyn dalaǵa ketirmedi. Sóıte tura 50-orynnan kóterile almady. Iаǵnı jyldamdyǵy jaǵynan óte baıaý. Ol Phenchhan olımpıadasy qarsańynda da sondaı edi. Odan beri de ózgeris bolmady. Bul jerde basty kiná bapkerler shtabynda jatýy yqtımal. Vıshnevskaıany fızıkalyq jaǵynan turaq­ty daıyndaıtyn tájirıbeli maman­dar bolǵanda ol 2010 jyly Olım­pıada júldesin jeńip alǵan Elena Hrýs­ta­levanyń nátıjesin qaıtalaýy ábden múmkin edi.  

Konkımen júgirý

500 metr. Ivan Arjanıkov – 28-oryn; Ekaterına Aıdova – 20-oryn.

1000 metr. Nadejda Morozova – 11-oryn; Dmıtrıı Morozov – 17-oryn; Ekaterına Aıdova – 19-oryn; Denıs Kýzın – 23-oryn;

1500 metr. Nadejda Morozova – 14-oryn; Ekaterına Aıdova – 18-oryn; Dmıtrıı Morozov – 18-oryn;

3000 metr. Nadejda Morozova – 13-oryn;

Mass-start. Nadejda Morozova – 15-oryn; Dmıtrıı Morozov – 19-oryn.

Shyny kerek, qazirgi tańda Lıýdmıla Prokashevanyń jetistigin qaıtalaıtyn sportshyǵa zárýmiz. 1998 jyly Japonııada ótken Olımpııa oıyndarynda pavlodarlyq Lıýdmıla Prokasheva qola medal alyp qýantqan edi. Sodan beri qansha jyl ótti, nátıje joq. Bir kezderi Denıs Kýzın jarq etip shyqty da, joq boldy. Bıyl da sol Kýzınge úmit artyp edik. Úmitimiz aqtalmady. Álem kýboktarynda jap-jaqsy nátıje kórsetip júrgen Nadejda Morozova, Dmıtrıı Morozov sekildi sportshylarymyz alǵashqy ondyqqa da kire almady.

Shańǵy jarysy

Sprınt. Erkin ádis. Áıelder. Nadejda Stepashkına – 51-oryn; Angelına Shýryga – 60-oryn; Ksenııa Shalygına – 67-oryn; Irına Bykova – 68-oryn;

Erler. Evgenıı Velıchko – 62-oryn; Vıtalıı Pýhkalo – 66-oryn;

15 shaqyrym. Klassıkalyq ádis. Vıtalıı Pýhkalo – 25-oryn; Evgenıı Velıchko – 40-oryn;

Skıatlon (15+15). Vıtalıı Pýhkalo – 32-oryn; Evgenıı Velıchko – 57-oryn;

Mass-start. 30 shaqyrym (erler). Evgenıı Velıchko – 43-oryn;

10 shaqyrym. Klassıkalyq ádis. Valerııa Tıýlenova – 55-oryn; Angelına Shýryga – 50-oryn; Ksenııa Shalygına – 51-oryn;

Skıatlon (7,5+7,5). Ksenııa Shalygına – 48-oryn; Angelına Shýryga – 49-oryn; Valerııa Tıýlenova – 51-oryn; Nadejda Stepashkına – 58-oryn;

Mass-start. 30 shaqyrym (áıelder). Angelına Shýryga – 42-oryn; Nadejda Stepashkına – 49-oryn; Irına Bykova – 54-oryn;

Komandalyq sprınt. Áıelder. Nadejda Stepashkına/Ksenııa Shalygına – 19-oryn;

Estafeta 4h5 shaqyrym. Áıelder. Ksenııa Shalygına, Angelına Shýryga, Nadejda Stepashkına, Irına Bykova – 15-oryn.

Bizdiń eldegi shańǵy sporty men jeńil atletıka bir-birine qatty uqsaıdy. Jeńil atletıkada Olga Rypakova sporttan qol úzgennen keıin úmit artatyn sportshy qalmaǵan bolsa, shańǵy sportynda Alekseı Poltoranın sporttyq karerasyn aıaqtaǵannan keıin Olımpıadada úzdik ondyqqa kiretin sportshy tappaı qaldyq. Beıjiń Olımpıadasyna barǵandardyń ishinde tek áıelder arasynda komandalyq estafetada 15-orynnan kórindik. Al qalǵan sportshylarymyzdy úzdik 30 sportshynyń qatarynan da taba almadyq.

Qoryta aıtqanda, dál qazir bizge qysqy sport túrleri boıynsha úlken ózgerister kerek. Joǵaryda aıtqanymyzdaı, sanǵa emes, sapaǵa jumys isteıtin kez keldi. Iаǵnı Beıjiń Olımpıadasynyń qorytyndysynan sabaq alyp, durys ári naqty sheshim shyǵarý qajet.