Is-sharaǵa Premer-Mınıstrdiń orynbasary Eraly Toǵjanov, Prezıdent Ákimshiliginiń memlekettik ınspektory Janat Iskakov, Mádenıet jáne sport mınıstr Dáýren Abaev, Parlament Senaty men Májilisiniń depýtattary, qoǵamdyq keńes ókilderi, jergilikti atqarýshy organdardyń, uıymdardyń basshylary, úkimettik emes uıymdar, zııaly qaýym ókilderi, sportshylar, jattyqtyrýshylar qatysyp, óz oılaryn ortaǵa saldy.
Vedomstvo basshysy Dáýren Abaev jıyn barysynda eń birinshi 2021 jyl sport salasynda atqarylǵan jumystar men sportshylardyń jetken jetistikterine toqtaldy. Byltyrdan bastap elimizde alǵash ret sport seksııalaryna jan basyna shaqqandaǵy qarjylandyrý ınstıtýty engizilgeni belgili. Sonyń arqasynda byltyr 162 myńnan astam bala men jasóspirim sport seksııalaryna tegin qatysqan. Sport seksııalaryn ashýǵa memleketten 6 mlrd teńge qarjy bólingen.
«Sonymen qatar memlekettik bilim berý uıymdarynyń muǵalimderine sabaqtan tys sporttyq dárister júrgizgeni úshin bazalyq laýazymdyq jalaqydan 100 paıyz mólsherinde qosymsha aqy tóleý júıesi engizildi. Dene shynyqtyrý jáne sport salasyndaǵy mamandandyrylǵan mektep pen kolledj qyzmetkerleriniń jalaqysy 25 paıyz ósti. 2023 jylǵa deıin jalaqy jyl saıyn kóbeıtilip, 2023 jylǵa qaraı bul ósim 100 paıyzdy quraıdy. Sportshylardyń dopıngke qarsy zerthanasy men Ulttyq dopıngke qarsy ortalyqtyń, dene shynyqtyrý jáne sport boıynsha respýblıkalyq oqý-ádistemelik jáne taldaý ortalyǵynyń basqarýshy jáne negizgi qyzmetkerlerdiń jalaqy mólsheri laýazymdyq jalaqydan 100 paıyz ósti. Bilim berýdiń barlyq deńgeıindegi dene shynyqtyrý sabaqtarynda «Qazaq kúresi», «Toǵyzqumalaq» jáne «Asyq atý» ulttyq sport túrleri mindetti komponent retinde engizildi», dedi D.Abaev.
Sondaı-aq mınıstr byltyr salamatty ómir saltyn nasıhattaý aıasynda respýblıka boıynsha 27 myńnan astam buqaralyq-sporttyq is-shara ótkizilgenin atap ótti. Oǵan jalpy sany 1,5 mln adam qatysqan bolsa, onyń 900 myńy aýyldyq jerlerde. 2021 jyldyń qorytyndysy boıynsha qazaqstandyq sportshylar túrli deńgeıdegi 474 halyqaralyq jarysta baq synap, ártúrli dárejedegi 632 medal jeńip alǵan. Al respýblıka aýmaǵynda 51 halyqaralyq jarys ótkizilgen.
Jıyn barysynda Dáýren Abaev 2022 jyly mınıstrliktiń aldynda turǵan bes ózekti mindet turǵanyn aıtty. Onyń eń birinshisi jáne qazirgi tańdaǵy eń mańyzdysy – sport ınfraqurylymynyń bolmaýy.
«Qazirgi tańda respýblıka boıynsha jabyq sport ǵımarattarynyń sany óte az. El boıynsha eń jaǵdaıy nashar Túrkistan jáne Almaty oblystary, sondaı-aq Nur-Sultan jáne Shymkent qalalary bolyp tur. Al eń qolaıly jaǵdaı Pavlodar, Qaraǵandy jáne Batys Qazaqstan oblystarynda baıqalady. Alaıda, bul óńirlerde de ınfraqurylymnyń tapshylyǵy seziledi.
Ekinshi mindet – buqaralyq sportty damytý, onyń ishinde memlekettik sporttyq tapsyrysty durys oryndaý. Prezıdent osy baǵyt boıynsha naqty tapsyrma berdi. Bul – azamattardyń áleýmettik kóńil kúıin jaqsartýdyń eń utymdy joly.
Úshinshi – jattyqtyrýshylardy, tóreshilerdi jáne sport ardagerlerin qamtamasyz etý. Júrgizilgen taldaý boıynsha elimizde joǵary bilikti jattyqtyrýshylardyń jetispeýshiligi anyqtaldy. Munyń basty sebebi – jalaqynyń azdyǵy. Búginde eńbekaqy tóleý júıesine sáıkes biliktiligi ortasha deńgeıdegi sanaty joq jattyqtyrýshynyń jalaqysy 63 myń teńge.
Tórtinshi – ulttyq sport rezervin daıarlaý. Ulttyq qurama komandalardyń quramyn laıyqty orynbasarlarmen qamtamasyz etpeı, úlken jetistikterge jetý múmkin emes. Bul úshin búginde barlyq alǵyshart bar, buǵan jastar qurama komandalarynyń álem chempıonattaryndaǵy, Azııa chempıonattaryndaǵy, Álem kýboktaryndaǵy nátıjeleri dálel bola alady. О́sip kele jatqan jastardyń sporttyq áleýeti joǵary jáne biz olardy nazardan tys qaldyrmaýymyz kerek.
Besinshi – sporttyq medısınaǵa tıisti kóńil bólý. Búginde Almaty qalasyndaǵy dopıngke qarsy zerthananyń WADA akkredıtteýin qaıtarý boıynsha jumystar josparly túrde júrgizilýde. 2021 jyly elimizde dopıngke qarsy erejelerdi buzýdyń 41 jaǵdaıy anyqtaldy», dedi mınıstr.
Premer-Mınıstrdiń orynbasary Eraly Toǵjanov Olımpıada rezervin daıarlaýdyń birtutas júıesin qurý kerek ekenin aıtty. «Olımpıada rezervin daıarlaýdyń birtutas júıesin qurý ýaqyty keldi. Bul salada túbegeıli is-shara qabyldaý qajet. Mınıstrlik, Ulttyq olımpıada komıteti, ákimdikter, ǵylymı ınstıtýttar men federasııalar sportshylardy daıarlaý barysynda ózderiniń mindetteri men rólderin anyq túsinip, olardy tııanaqty oryndaýy tıis. Osy jumysty úılestirý – mınıstrliktiń basty mindeti. Olımpıada rezervin daıarlaý qyzmetin naqty deńgeılerge bólip, árbir deńgeı úshin tıisti normatıvterdi, kórsetkishterdi, jaýapty uıymdardy jáne qarjylandyrý kózderin anyqtaý qajet», dedi vıse-premer.
Jıyn barysynda Qazaqstan boks federasııasynyń atqarýshy dırektory Maratbek Myqtybekov, Gımnastıka federasııasynyń prezıdenti, kórkem gımnastıkadan ulttyq quramanyń bas jattyqtyrýshysy Álııa Iýsýpova, aýyr atletıkadan erler ulttyq qurama komandasynyń bas jattyqtyrýshysy Nurjan Smahanov, Qazaq Batyry jekpe-jek akademııasynyń negizin qalaýshy Qanat Alın, Soltústik Qazaqstan oblysynyń «Qýanysh» voleıbol klýbynyń dırektory Qaıyrbek Hamzın sóz sóıledi.
