Tarqata aıtsaq, tamaq ónerkásibinde – 20 joba, qurylys ındýstrııasynda – 13 joba, hımııa ónerkásibinde – 7 joba, metallýrgııada – 11 joba, munaı óńdeý salasynda – 5 joba, farmasevtıkada – 5 joba, mashına jasaý salasynda – 15 joba, jeńil ónerkásipte – 7 joba, aǵash óńdeý salasynda – 4 joba, basqa salalarda 3 joba júzege asyrylmaq.
Jobalardyń basym bóligi Aqmola, Qostanaı jáne Jambyl oblystarynda, sondaı-aq Shymkent jáne Nur-Sultan qalalarynda iske qosylmaq.
Negizgi jobalardyń qatarynda Atyraý oblysyndaǵy gaz-hımııa kesheni bar. Integrasııalanǵan gaz-hımııa kesheni jylyna 629 myń tonna propan óńdep, 500 myń tonna polıpropılen shyǵarady.
Iri jobalardyń qataryna Shymkenttegi alıýmınıı bankilerin óndiretin zaýytyn qosýǵa bolady. Joba «Qarapaıym zattar ekonomıkasy» baǵdarlamasy aıasynda júzege asyrylýda. Onyń negizgi maqsaty – ishki naryqty jergilikti óndiris taýarlarymen qamtamasyz etý. Jańa zaýyt sýsyndardy quıýǵa arnalǵan ártúrli kólemdegi ońaı jabylatyn qaqpaqtary bar alıýmınıı qutylardy shyǵarady. Kásiporynnyń óndiristik qýaty jylyna 500 mln qutyny quramaq.
Saran qalasynda ornalasqan shına óndirý zaýytyn da atap ótýge tıispiz. Zaýyt jeńil, jeńil júk jáne júk shınalaryn shyǵarady. Zaýyttyń óndiristik qýaty jylyna 3,5 mln shınany quraıdy. Kásiporyn zamanaýı jabdyqtarmen jabdyqtalǵan.
Budan bólek, Túrkistan oblysynda munaı óńdeý zaýyty salynbaq. Zaýyttyń qýattylyǵy jylyna 1 mln tonna ónimdi quraıdy.
Sonymen qatar Shyǵys Qazaqstan oblysynda maı ekstraksııalyq zaýytyn salý josparlanǵan. Kombınat óńirdegi aýqymdy ınvestısııalyq jobalardyń biri. Zaýyt jylyna 300 myń tonna daıyn ónim shyǵarmaq. Jobanyń quny – 28 mlrd teńge.
