Osy áýletten til biliminiń aıtýly ókili, professor Qudaıbergen Jubanov pen kórnekti mýzyka zertteýshisi, kompozıtor, dırıjer Ahmet Jubanov sekildi dara tulǵalar shyqty. Sol alyptardyń jolyn jalǵaǵan kórnekti kompozıtor Ǵazıza Jubanovanyń da orny erekshe.
−Ahmet Jubanovty halqymyz jaqsy biledi dep oılaımyn. Qazaq ulttyq orkestrin quryp, onyń alǵashqy dırıjeri boldy. Otyzynshy jyldardyń aıaǵynda Qazaqstan kompozıtorlar odaǵyn basqardy. Kompozıtor Latıf Hamıdımen birigip «Abaı» operasyn jazdy. Ulttyq mýzykanyń damýyna onyń qyzy Ǵazıza Jubanova da úlken úles qosty. Bıyl ardaqty tulǵanyń mereıtoıy. Ol kisiniń «Hırosıma», «Qaragóz» baletteri men «Jiger», «Aqsaq Qulan» atty sımfonııalyq poemalary álemdik deńgeıdegi týyndylar sanalady. О́zim Ǵazıza apaıdyń shákirti bolǵanyma qýanamyn. Ol kisiden ónegeli tálim-tárbıe aldyq, −deıdi Qazaqstan Kompozıtorlar odaǵynyń tóraǵasy, kompozıtor Serikjan Ábdinurov.
Mýzykalyq keshte «Astana Opera» teatrynyń orkestr ártisteri men solısteri Ahmet Jubanov, Ǵazıza Jubanova, sondaı-aq dańqty áýlettiń keıingi ókilderi Álibı Mámbetov pen Karına Izmaılovanyń kameralyq jáne vokaldyq týyndylaryn oryndap, klassıkalyq áýenge sýsap júrgen tyńdarmandardyń shólin qandyrdy. Aıta keteıik, Karına Izmaılova –Ǵazıza Jubanovanyń shóberesi. Qazaqstan Kompozıtorlar odaǵynyń eń jas múshesi, qazir Máskeý konservatorııasynda oqıdy. Birtalaı halyqaralyq baıqaýlardyń laýreaty.
Sonymen qatar kesh barysynda kórnekti kompozıtor Muqan Tólebaev, Erkeǵalı Rahmadıevten bastap, qazirgi zamanaýı avtorlar − Balnur Qydyrbek, Nazgúl Tańatar, Serikjan Ábdinurov, Álibı Ábdinurov, Arman Jaıym, Aısulý Tánı, Ázimbek Jambaev, Álibek Qadyrov, Lázzat Jumanovanyń týyndylary oryndaldy.
