Ulttyq ekonomıka mınıstrliginiń málimeti boıynsha reformanyń negizgi úsh mańyzdy aktisi bar. Onyń birinshisi «Kásipkerlik saladaǵy mindetti talaptar tizilimine» engizilýge jatatyn salalardy aıqyndaý týraly» Úkimet qaýlysy bolsa, ekinshisi – kásipkerlik saladaǵy mindetti talaptardyń tizilimin júrgizý qaǵıdalary, al úshinshisi – kásipkerlik saladaǵy mindetti talaptar tizilimi. «Búginde aktiler ázirlendi, endi osy qujattar negizinde kelisý prosesi júrgizilip jatyr. Osyǵan baılanysty memlekettik organdar jobalardy ýaqtyly ázirleý jáne qabyldaýǵa belsendilik tanytýy tıis. Tizilimde retteýshilik aktilerdiń jańadan qabyldanyp jatqan saıasatqa sáıkestigi tekserilip, taldaý júrgiziledi. Eger retteýshi organ osy taldaýdy merzimde júrgizbegen jaǵdaıda mundaı aktilerdiń kúshi joıylady jáne tiziliminen shyǵarylady», deıdi mınıstrlik taratqan habarlamada.
Osynyń aldynda ǵana gazetimizge bergen suhbatta «Atameken» ulttyq kásipkerler palatasy basqarma tóraǵasynyń orynbasary Erbol О́stemirov kásipkerlik salasyn «taza paraqtan» retteý saıasatynyń kásipkerlerge paıdaly tusy kóp ekenin atap ótken edi. Onyń aıtýynsha, bıznes salasynda júrgen azamattardyń quqyǵy keıde zań aıasynda qorǵalmaǵan bolyp shyǵady. Sodan bolyp kásipkerler biraz qıyndyqtarǵa tap bolyp júr. Jańa retteýshilik saıasat osy máseleni ońynan sheshýge tıis. «Zań memlekettik retteýdiń qaǵıdattary men negizgi erejelerin belgileıdi jáne bızneske qoıylatyn talaptar qandaı bolý kerektigin naqtylaıdy. Bul zań bolǵandyqtan retteýdegi qaǵıdattar mindetti túrde oryndalady. Jańa qujat eń aldymen kásipkerlerdiń múddesin qorǵaıdy. Olarǵa qandaı da bir talap qoıarda olardyń jaǵdaıy, ol talaptardy oryndaı alý múmkindigi, salmaq salmaýy eskeriledi. Buǵan qosa, memleket tarapynan bıznesmenderge bir jańa talap engizilgen jaǵdaıda qoldanystaǵy eki talap joıylyp otyrady», degen edi E.О́stemirov.
Talap demekshi, Úkimet bekitken tizilimde belgili bir talaptar kúshin joıǵan bolsa, onda kásipkerler sol talaptardy buzǵany nemese ýaqytynda oryndamaǵany úshin eshqandaı ákimshilik jaýapkershilik arqalamaıdy.
Mınıstrlik ókilderine sensek, bıznesti «taza paraqtan» retteýdi engizý jumystarynyń 2022-2023 jyldarǵa arnalǵan jospar-kestesi daıyn tur. Kásipkerlikti retteýdiń jańa tásilderine oqytý úshin sarapshylar quramy da bekitilgen. Oqytý bir aı boıy júrgiziledi. «Bıylǵy naýryzdyń sońyna deıin memlekettik organdar jumys toptarymen birlesip, tizilimge enetin salalar boıynsha retteý aktileriniń tizbesin naqtylaıdy. Al 30 naýryzdan bastap jańa retteýshilik saıasatqa qoldanystaǵy qandaı talaptar sáıkes keletinine taldaý júrgiziledi. Búgingi tańda bıznes-ombýdsmen jáne «Atameken» ulttyq kásipkerler palatasymen birlesip, retteýshi aktilerdi zertteý jumystary júrgizildi. 2021 jyly aldyn ala 424 quqyqtyq aktiler qaraldy, onda shamamen 17 558 talap belgilengen, onyń 40%-dan astamy jańa tásilderge sáıkes kelmeıdi», deıdi UEM baspasóz qyzmeti.
Sondaı-aq zańda memlekettik baqylaý jáne qadaǵalaý júıesin ózgertý kózdelgen. Mınıstrlik tekserýler júrgizý kestelerin qurý kezinde bolýy múmkin táýekelderdi basqarý júıesin avtomattandyrýdy zańnamalyq turǵydan bekitpekshi. Bul norma 2023 jylǵy 1 qańtardan bastap kúshine enedi. «Mundaı avtomattandyrý bıznestiń problemalyq sýbektilerin retke keltirýge jáne shoǵyrlandyrýǵa, zańǵa baǵynatyn kásipkerlerge ákimshilik qysymdy tómendetýge múmkindik beredi. Memleket basshysy kásipkerlermen kezdesýde memlekettik baqylaý júıesin avtomattandyrýdy aıaqtaýdy tapsyrdy. Bul sharalar osy tapsyrmany oryndaýǵa múmkindik beredi», deıdi mınıstrlik ókilderi.
