S&P halyqaralyq agenttigi rastady

S&P pikirine qaraǵanda, geosaıa­sı jaǵdaı Qazaqstan men Reseı arasyndaǵy tyǵyz saıası, qarjy­lyq jáne ekonomıkalyq qarym-qaty­nas­tar­ǵa qaramastan memlekettiń kredıt reı­tıngine yqpal etken joq. Reseıge qatysty qabyldanǵan ekonomıkalyq sank­sııalardyń qosymsha áseri retteýge keledi jáne Qazaqstan úshin eń mańyzdy eksport naryqtaryna qoljetimdiligin shektemeıdi.

Kredıt reıtınginiń saqtalýynyń she­shýshi faktory retinde memlekettik bo­rysh deńgeıiniń tómendigi men aıtar­lyq­taı ótimdi aktıvtermen erekshelenetin memlekettiń turaqty fıskaldyq pozısııasyn qarastyrýǵa bolady. S&P sarapshylarynyń pikirine súıensek, Ulttyq qordan bıýdjetke aýdarylatyn transfertterdiń kólemin shekteıtin bıýdjettik erejeni basshylyqqa alý jáne munaı óndirisiniń kólemin arttyrý Qazaqstanǵa  turaqty fıskaldyq pozısııasyn saqtaýǵa múmkindik beredi. Qazaqstannyń syrtqy rezervteriniń kólemi aıtarlyqtaı deńgeıde saqtalǵan, al syrtqy qarjylandyrýǵa muqtajdyǵy tómen.

2022 jyly IJО́-niń ósimin S&P 3,6% deńgeıin quraıdy dep boljaıdy. Agent­tik ınflıasııa 2021 jyly Ulttyq bank ornatqan 4-6% dálizden joǵary orta eseppen alǵanda 8%-dy quraǵanyn jáne bul jaǵdaı iske asyrylyp otyrǵan yntalandyrýshy fıskaldyq saıasat pen ımporttyq taýarlardyń baǵasynyń ósýine baılanysty oryn alǵanyn atap ótti. S&P boljamyna sáıkes, ınflıasııa ósimi 2025 jylǵa qaraı baıaýlap 5%-dy quraıtyn bolady. Agenttik qubylmalyq jaǵdaıynda Ulttyq bank baǵalar turaq­tylyǵyn saqtap qalý maqsatynda baza­lyq mólsherlemeni 13,5%-ǵa deıin joǵarylatqanyn atap ótti.

Sarapshylar Ulttyq banktiń óz mandatyn nyǵaıtý men transparenttigin kúsheıtýge baǵyttalǵan áreketine oń baǵasyn berdi. S&P sarapshylarynyń pikirine qaraǵanda, Ulttyq banktiń 2023 jyly ekonomıkany qoldaý baǵdar­lamalarynan shyǵý boıynsha josparlary, Qarjy mınıstrligimen birigip ishki qaıtalama naryqtaǵy ótimdilikti arttyrý maqsatynda tabystylyq qısyǵyn qurýǵa baǵyttalǵan jumysy monetar­lyq saıasattyń transmıssııalyq arnasyn kúsheıtetin bolady. Sonymen qatar Ulttyq bank quzyretinen qarjylyq ret­teý boıynsha qyzmetiniń shyǵarylýy makroekonomıkalyq turaqtylyqqa basa nazar aýdarýǵa múmkindik berdi.

S&P sarapshylary aıyrbas­taý ba­ǵamynyń erkin ózgermeliligi eko­nomı­ka­nyń syrtqy qysymǵa beıim­de­lýine kó­mekteskenin atap ótti. S&P baǵa­laýynsha, teńge baǵamy 2022 jyldyń ekinshi jartysynda nyǵaıady.

Agenttik sarapshylarynyń pikirin­she, kredıt reıtınginiń dınamıkasy mem­le­kettik basqarý, memlekettik ınstıtýt­tar saıasatynyń odan ári jetildirilýi men monetarlyq saıasat tıimdiligi jáne bank sektorynyń jaǵdaıyna táýeldi.