Oqtaı ushqan dop, abyr-sabyr oıynshylar, jattyqtyrýshynyń yshqynǵan ysqyryǵy... Jeńisten jeńis bermeı júrgen «Altaı» komandasynyń jattyǵýy. Sportshylary shetinen myqty, osaly joq. Qazaqstan Respýblıkasynyń halyqaralyq dárejedegi sport sheberi Sana Anarqulova da kóp arýdyń ishinde dop soǵyp júr. Qımyly shıraq, soqqysy joıqyn...
– Meniń bilýimshe, sizderde kúndelikti jattyǵý. Úzilis bolmaı ma?
– Oı, joq. 12 naýryzda pleı-off serııasy bastalady. Jaýapty oıyndar. Al bir aıdan soń Semeıde Azııa chempıonaty ótedi. Sol úshin jatpaı-turmaı daıyndalýymyz kerek. Úzilis degen joq bizde. Jarysqa baryp kelgen soń da ári ketse, jarystan keıin eki-aq kún demalamyz. Pandemııa dendegen kezde ǵana jattyǵýlardyń berekesi ketip qaldy. Qazir bári oıdaǵydaı júrip jatyr.
– Osy «Altaı» komandasyna qashan keldińiz? Kimder usynys bildirdi?
– 2016 jyly edi, «Altaı» komandasy qurylyp, alǵash ret el chempıony bolǵan. Dekrettik demalystan shyqqan soń «Altaı» klýbynyń dırektory Dosjan Ýálhanov (búginde oblystyq sport basqarmasynyń basshysy) usynys bildirdi. Sál oılanyp qabyl aldym. Kele sala jattyǵýlarǵa kiristim. Eshqandaı ókinish joq. Komandaǵa kelgeli jetken jetistikterimiz az emes, estip jatyrsyzdar bárin.
– Jeńisterińizden jaqsy habardarmyz. Qazaqstannyń bes dúrkin chempıony bolý ońaı emes. Tabandylyqty qajet etedi. «Aǵaıynnyń aty ozǵansha, aýyldastyń taıy ozsyn» dep otyratyn qazaqpyz. Azııa chempıony bolǵandaryńyzda tóbemiz kókke jetti. Al sizdiń týǵan jerińiz Reseı. О́skemenge úırenise almaı júrgen joqsyz ba?
– Reseıdiń Orynbor oblysy Sol-Ilesk qalasynda týdym. Basqa balalardan túk ereksheligim joq. Oqydym, jattyqtym. Áke-sheshem temirjolshylar. Olardyń sportqa qatysy joq. Meni 6-synypta sportqa alyp kelgen týǵan aǵam Tımýr Jarylǵasov. Ol qazirgi ýaqytta Semeıde «Altaı-3» komandasynyń jattyqtyrýshysy.
– Boıyńyz 188 santımetr. Kúıeýińiz sizden de uzyn. Sırek kezdesetin uzyn jigitti qalaı jolyqtyrdyńyz? (ázil aralastyra qoıǵan suraqqa jaýap bermes buryn, kúlip aldy).
– Meni ábden zerttepsiz ǵoı. Boıym negizi 189 santımetr. Birqatar derekti 188 dep júr. Al siz aıtpaqshy, sırek kezdesetin kúıeýimniń boıy 197 santımetr. Tanystyǵymyz osy О́skemende bastaldy. Ol ýaqytta taǵdyr meni osy qalaǵa qaıta aıdap ákelerin sezbegen de edim. 2009 jyl edi. «Prezıdent kýbogy» О́skemende sarapqa salyndy. Men áıelder komandasynda oıyn kórsetip júrdim, ol erler komandasy atynan shyqty. Sóıtip, sport saraıynda tanystyq. Keıin bilisip, taǵdyrdyń jazýymen otbasyn qurdyq.
– Taǵdyr deısiz, yrymǵa senesiz be? Ony surap otyrǵanym, «Altaı» komandasyna kelgeli 2-nómirli oıynshysyz. Sáttilik ákelip júr me?
– Kóp jyldan beri 2-nómirde oınaımyn. Oǵan deıin 3-nómir, 1-nómir boldy. Alǵash «Altaı» komandasyna kelgende birneshe nómirdiń ishinde 2-nómir bos bolyp, sony tańdap aldym. Unaıdy maǵan. Sıqyry joq qoı, biraq jolym bolyp júr.
– Al komandaǵa shetelderden legıoner tartý degen qanshalyqty durys? Ony surap otyrǵanym, jergilikti oıynshylar shettetilip qalmaı ma degenim ǵoı.
– Legıoner tartý chempıonattyń deńgeıin arttyrady. Ol – sheteldik tájirıbe. Meniń oıymsha, oıynshylardy jergilikti jerden iriktep, legıonerlermen aralastyrý kerek. Sonda nátıje jaqsy bolady.
– Esińizde qalǵan tartysty oıyndar bar ma? Máselen, esep sońǵy sátterde teńesip kelip, basym túsip nemese qarsylas jeńip kele jatyp jeńilis tapqan kezder degendeı.
– Biz úshin ár oıyn jaýapty. Qıyn. Ár oıyn aldynda qobaljımyz. Sebebi «Altaı» degen atymyz, bizge senim artqan halqymyz bar. Sondaı-aq qarsylasqa degen qurmetimiz bolǵan soń da alańdaımyz. Iá, jeńilip bara jatyp basym túsken kezder bolady. Mysaly, esep 19:24 bolyp turady. Ondaıda oıynshylar psıhologııalyq turǵyda bosańsyp bara jatady. Biraq biz birneshe ret jınaqtalyp, oıyndy jeńispen aıaqtap jattyq. Kerisinshe bir dop qana jetpeı turyp, utylyp qalatyn kezder de boldy.
– Qarbalas jattyǵýdyń arasynda ýaqyt bólip, suhbat bergenińizge myń alǵys! «Egemen Qazaqstan» gazetiniń ujymy atynan «Altaı» komandasynyń arýlaryn
8 naýryz merekesimen shyn júrekten quttyqtaımyz! Sizderdi tek bıikterden kóreıik. О́mirde de, oıynda da jeńisti sátterińiz kóp bolsyn!
Áńgimelesken
Mereı QAINARULY,
«Egemen Qazaqstan»
