«2025 jylǵa deıin halyqtyń tabysyn arttyrý baǵdarlamasy aıasynda QR Eńbek jáne halyqty áleýmettik qorǵaý mınıstrligi 3 negizgi baǵyt boıynsha jumys júrgizedi: jańa jumys oryndaryn qurý, ıaǵnı, halyqty jumyspen qamtýǵa járdemdesý, eńbek resýrstary daǵdylaryn jetildirý jáne jastardy kásiptik baǵdarlaý», dedi Serik Shapkenov Úkimet otyrysynda.
Onyń aıtýynsha, bul baǵytta eńbek mınıstrliginiń qatysýymen 33 is-shara qarastyrylǵan, 16 is-sharany mınıstrlik tikeleı júzege asyrady.
«Atalǵan sharalar eń tómengi kúnkóris deńgeıinen tómen tabys alatyn halyqtyń úlesin azaıtýdy, jumyssyzdyq deńgeıin tómendetýdi, 2025 jylǵa deıin shamamen 2 mln jańa jumys ornyn qurýdy kózdeıdi», dedi mınıstr.
Ol sondaı-aq jańa jumys oryndaryn qurý boıynsha jumys sheńberinde EHÁQM frılanserler qyzmetin sıfrlyq formatqa kóshirý maqsatynda «platformalyq jumys» elektrondyq servısin ázirleıtinin habarlady.
Bul ózin-ózi jumyspen qamtyǵan azamattardyń qyzmetin túrli platformalarda ońaı tirkeýge, qajetti mamandardy tez tabýǵa, eńbek quqyqtaryn qorǵaýǵa jáne tapsyrys berýshilermen qarym-qatynasty resmı resimdeýge múmkindik beredi. Budan basqa, 3 jáne 4 sanattar boıynsha (mamandar men bilikti jumysshylar) sheteldik jumys kúshin tartýǵa kvota 4,7 myń adamǵa qysqartyldy.
«Jańa jumys oryndaryn qurý óńirlik jumyspen qamtý kartalaryn ózektendirý jáne aqparattyq júıeni turaqty jańartý arqyly baqylanady», dep tolyqtyrdy Serik Shapkenov.
