Sıan Sınhaı – aıtýly qytaı kompozıtory, 250-den astam shyǵarma avtory. Sonyń ishinde kantata, opera, sımfonııa, orkestrlik mýzykaǵa arnap jazǵan týyndylary ulttyq órnegimen erekshelenedi. Talantty mýzykant 1940 jyly Máskeýge jiberilgen, sonda «Ult azattyǵy» degen birinshi sımfonııasyn aıaqtaǵan. 1941 jyly Almatyǵa kóship kelip, sol jyldary «Qasıetti soǵys» atty ekinshi sımfonııasyn jazady. Sonymen qatar qazaqtyń birqatar halyq ánin jınap, qaıta óńdegen. 1944 jyly Qostanaıda turyp, oblystyq fılarmonııanyń negizin qalaýǵa úlesin qosady. Tobyl óńirine kelýine qazaq kompozıtory Baqytjan Baıqadamov sebepker bolǵan. Halyq batyry týraly sımfonııalyq shyǵarmasy osy jyldary ómirge kelgen.
Osydan eki-úsh jyl buryn qazaqstandyq jáne qytaılyq óner sheberleri Baqytjan Baıqadamov pen Sıan Sınhaı arasyndaǵy dostyq pen olardyń shyǵarmashylyq ómirin beınelegen «Kompozıtor» atty kórkem fılm túsirgeni esimizde.
Búginde eki tulǵanyń arasyndaǵy syılastyq urpaqtarymen de sabaqtasyp otyr. Baqytjan Baıqadamovtyń jıeni, Qalamqas Aryslanqyzy (kompozıtordyń apasy Danabıke Baıqadamovanyń qyzy) qos mýzykanttyń ómiri men shyǵarmashylyǵy jaıynda kitap jazyp, arhıvten Sıan Sınhaıdyń birqatar týyndysyn izdep tapqan. Sonyń ishinde «Amangeldi» poemasy da bar. Osy shyǵarmanyń kóshirmesin mýzeıge tapsyrǵan Jupar Tatkenova da Baqytjan aǵamyzdyń jıeni.
«Bóle apam Qalamqas Aryslanqyzy ózi shyǵarǵan kitap pen sımfonııalyq týyndynyń notasyn arnaıy Arqalyqqa berip jibergen edi. Amanatyn oryndap, mýzeı qoryna tapsyrdym. Sıan Sınhaı mýzyka ǵana jazbaǵan, qazaqtyń bı ónerin de zerttegen. Naǵashymmen jaqyn dos bolǵan. Endi olardyń murasyn qazirgi jas urpaq ta bilgeni durys», deıdi ol.
Arqalyqtaǵy Dala ólkesi tarıhy mýzeıiniń dırektory Ashat Qasenov bir sózinde sımfonııalyq shyǵarmanyń kóshirmesin Elýbaı О́mirzaqov atyndaǵy Qostanaı oblystyq fılarmonııasy da alǵanyn aıtady. Atalǵan óner ujymy týyndyny Amangeldi batyrdyń 150 jyldyǵy qarsańynda qaıta jańǵyrtýdy oılap otyrǵan kórinedi.
