Oblystyq sybaılas jemqorlyqqa qarsy is-qımyl departamentiniń málimetinshe, ýnıversıtet rektoryna qatysty Qylmystyq kodekstiń 189-babynyń 3-bólimi boıynsha qylmystyq is tirkelgen. Atalǵan bap boıynsha ózine senip tapsyrylǵan bóten múlikti ıemdenip alǵan nemese talan-tarajǵa salyp, jymqyrǵan jaýapty memlekettik laýazym atqaratyn adamnyń dúnıe-múlki tárkilenip, eki jyldan jeti jylǵa deıingi merzimge bas bostandyǵyn shekteý, ne sol merzimge bas bostandyǵynan aıyrý jazasyna kesilýi múmkin eken.
Antıkor qyzmeti, ázirge rektordyń ne jymqyrǵanyny týraly naqty aqparat bergen joq. Sybaılas jemqorlyqqa qarsy is-qımyl agenttiginiń oblystaǵy departament basshysynyń orynbasary Rınat Iýsýpovtyń aıtýynsha, QR QPK-niń 201-babyna sáıkes, sotqa deıingi tergep-tekserý derekteri jarııa etilmeýge tıis. Iske qatysty qandaı da bir aqparat eger tergeý múddesine qaıshy kelmese jáne ózge adamdardyń quqyqtary men zańdy múddelerine nuqsan keltirmeıtin bolsa, tek prokýrordyń ruqsatymen belgili bir kólemde ǵana jarııa etilýi múmkin.
Alma Dosjanova Ahań atyndaǵy Qostanaı óńirlik ýnıversıtetin 2019 jyldyń 25 qańtarynan beri basqaryp kelgen. Máseleniń mán-jaıyn ishten bilmekke atalǵan ýnıversıtetke qarasty muǵalimder daıarlaıtyn ınstıtýttyń ustazdarymen sóılesip kórdik. Pedagogıka ınstıtýtynyń ujymy buǵan deıin Memleket basshysy Qasym-Jomart Toqaevtyń atyna jáne oblystyq Antıkor qyzmetine 57 adam qol qoıǵan ashyq hat joldapty. Ǵalym-ustazdar: «Bálkim, janaıqaıymyz Prezıdentke deıin jetken bolar. Endi bizdiń de talap-tilegimiz oryndalyp, ádildik ornap qalar», dep úmittenip otyr.
– О́tken jyldyń qyrkúıek aıynan bastap JOO oqytýshylarynyń jalaqysyn kóterý týraly Prezıdent tapsyrmasy bizdiń ýnıversıtette tolyq oryndalǵan joq. Qazir ǵylym kandıdattarynyń kesimdi jalaqysy – 170 068 teńge. Eń soraqysy sol, byltyrdan beri eńbekaqy mólsherin belgileýde bizdiń kópjyldyq eńbek ótilimiz eskerilmeı qaldy. Buryn jeke ınstıtýt bolyp turǵanda jylyna 5-6 syıaqy alatynbyz. A.Baıtursynuly atyndaǵy QО́Ý-ge qosylǵaly, mundaı materıaldyq qoldaýdyń bárinen aıyryldyq. Jańa basshylyq jalaqymyzdy qysqartýdyń neshe túrli tásilin oılap shyǵaryp, adal eńbekpen tapqan aılyǵymyzdyń ózin tolyq tólemeı otyr. Mysaly, oqý júktemesi bólingende stýdent sany 8-den az toptar tıimsiz top dep tanylyp, oqytýshyǵa eńbekaqynyń 50-aq paıyzy tólenedi. Al oqytýshylar, stýdent sanynyń az-kóptigine qaramastan, jumys baǵdarlamasynda josparlanǵan dárister men tájirıbelik sabaqtardy tolyq ótkizedi. Sheshimin tappaı kele jatqan ózge máseleler de tolyp jatyr. Buǵan deıin osy máselelerdiń bárin tizip jazyp, rektordyń ózine qanshama ret ótinish bildirip, talap-tilegimizdi jetkizdik. О́kinishke qaraı, sonyń bári eskerýsiz qaldy, – dedi ustazdar.
2020 jyly A.Baıtursynov atyndaǵy Qostanaı memlekettik ýnıversıteti men О́.Sultanǵazın atyndaǵy pedagogıka ınstıtýty birigip, sál keıinirek Qostanaı óńirlik ýnıversıteti bolyp qaıta qurylǵan. Instıtýt ustazdarynyń aıtýynsha, sol kezde ýnıversıtet basshylyǵy ınstıtýtty bankrottyq jaǵdaıda qosyp alǵany týraly málimdeme jasapty.
– Al is júzinde ýnıversıtet basshylyǵy ınstıtýt ǵımaratynan kóptegen monoblokty, kompıýterler men noýtbýkterdi, jańa jıhazdardy shyǵaryp alyp ketti. Qazir onyń qaıda turǵanyn da bilmeımiz. Burynǵy ınstıtýt rektory minip júrgen avtokólikti de óńirlik ýnıversıtettiń basshylyǵy minip júr. Ákimshilik-basqarý korpýsy sheksiz keńeıdi. Mán-maǵynasyz, jumysy mazmunsyz ınstıtýttar men ortalyqtar ashyldy. Tolyp jatqan keńesshiler men kómekshiler, qosalqy qyzmetkerler qaptap ketti. Olar qatardaǵy oqytýshylar men dosent-professorlardan 2-3 ese joǵary jalaqy alady. 2019 jyly stýdentter jataqhanasynyń qurylysy qarjy daýymen bastaldy. Biraq sol kezdegi rektor, prorektor, esepshi sııaqty jaýapty adamdar qazir elimizdiń basqa JOO-larynda jumys istep júr. Olar nege zań aldynda jaýapqa tartylmaıdy? Jalaqyny arttyrý, syıaqy taǵaıyndaý máselesin kótergen saıyn únemi «sender ýnıversıtetke boryshker bolyp qosylǵansyńdar» degen jaýap alamyz, – deıdi bir top ǵalym-ustaz.
A.Dosjanovaǵa deıin Abaı dańǵylynyń boıyndaǵy aýdany 4,5 myń sharshy metr bolatyn qos qabatty eńseli ǵımaratta ýnıversıtettiń «Bilim ortalyǵy» dep atalatyn 693 myń kitap qory bar baı ǵylymı kitaphanasy bolatyn. Birinshi qabatynda abonement bólimi, ekinshi qabatynda oqý zaly jumys istep turǵan bilim ortalyǵy respýblıka boıynsha JOO-ǵa arnalǵan kitaphanalardyń eń úzdik bestiginiń qataryna engen. Ýnıversıtet basshylyǵy aýysqan soń, jańa basshy osy kitaphananyń oqý zalyndaǵy kitaptar qoryn basqa jaqqa kóshirip, onyń ornyna óńirlik Smart-ortalyq ashqan. Ortalyq startap jobalar ázirlep, ony tájirıbege engizýdi kózdeıdi. Alaıda kitaphana meńgerýshisi Jámıla Erjanova bul reformanyń stýdentterge qolaıly ǵylymı kitaphananyń toz-tozyn shyǵarǵannan basqa paıdasy bolmady dep sanaıdy.
– Jańa basshysy ýnıversıtetke kitaphananyń qajeti joq, ınternette bári bar degen qaǵıdany qalyptastyrdy. Bizden ekinshi qabatty tartyp alyp, oqý zalyn burynǵydan áldeqaıda tar ári yńǵaısyz 2-korpýsqa kóshirdi. Aqyr aıaǵynda bizdi 5 korpýsqa bólip, ydyratyp jiberdi. Sońǵy úsh jyl boıy bizdiń materıaldyq-tehnıkalyq talaptarymyzǵa eshkim qulaq asqan joq. Birinshi kýrs stýdentterin oqý ornymen alǵash tanystyrý aptalyǵyna kitaphana kirmegeli eki jyldan asty. Qazirgi 1-2 kýrs stýdentteri bizde kitaphana bar ekenin de bilmeıdi. Basshylyqqa kitaphana emes, jalǵa berýge qolaıly keń ǵımarat qana kerek. Saldarynan bilikti degen 6 kitaphanashy jumystan ketip qaldy. Rektor kitaphana múddesin qorǵamaq bolǵan meni de qýdalap, ýnıversıtet rektoraty men ǵylymı keńesiniń músheliginen shyǵartty. Qazir kitaphana balansynda turǵan 39 kompıýterdiń 13-i ǵana jumys isteıdi. 2006, 2009 jyly shyqqan bul kompıýterlerdiń ózi eskirip, áreń jumys istep tur. Al sońǵy úlgidegi 40 monoblokty «Smart-ortalyqqa» berdi. Bul ortalyqta anda-sanda bir ret alaýlatyp-jalaýlatyp pıar-sharalar ǵana ótetini bolmasa, bosqa tur. Oqý ornynyń kitaphanasyn saqtap qalý jolynda júıkemdi juqartqan kúres júrgizip kele jatqanyma úsh jyldan asty. Biraq ókinishke qaraı, odan esh nátıje shyǵara alar emespin, – dedi 30 jyl boıy kitaphana salasynda qyzmet etip kele jatqan meńgerýshi.
Istiń aq-qarasyn zań oryndary anyqtaı jatar. Al bilim ordasyndaǵy ustazdar qaýymy úlken ózgeristen úmitti. Ahmet Baıtursynov atyndaǵy Qostanaı óńirlik ýnıversıteti rektorynyń mindetin qazir osy oqý ornynyń prorektory Erbol Isaqaev atqarýda.
Qostanaı oblysy
