Sıfrly transformasııa – júıeli reformalardy iske asyrýdyń, memlekettik basqarýdy jetildirýdiń jáne halyq senimin arttyrýdyń túıindi quraldarynyń biri. Bul úrdisti barynsha tıimdi, qolaıly jáne ónimdi iske asyrý úshin Sıfrly ofıserler ınstıtýty qurylyp, byltyr sıfrlandyrýǵa jaýapty vıse-mınıstrlerge arnalǵan (CDO) KPI júıesi engizilgen edi.
«Ásirese búgingi jaǵdaıda CDO – ınnovasııalyq jáne tehnologııalyq ekonomıkany qalyptastyrý jolynda júıeli ózgeristerdiń draıveri. Olar ózderi qadaǵalaıtyn salalarda, ıaǵnı aýyl sharýashylyǵy, ónerkásip, energetıka jáne taǵy basqa salada ınnovasııalardy engizip, jahandyq úrdisterden qalmaı ınnovasııalyq ekojúıeni qalyptastyryp, mindetterdi júzege asyrý úshin otandyq startaptardy tarta otyra halyqaralyq BigTech kompanııalar men otandyq ǵylymı qaýymdastyqtyń múmkindikterin keńinen paıdalaný tıis», dedi Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın.
Vedomstvo basshysy aıtqandaı, eldi mekenderdi ınternetpen qamtý, baılanys sapasyn arttyrý jáne aqparattyq qaýipsizdikti qamtamasyz etý baǵytynda da biraz jumys atqaryldy. Atap aıtqanda, bas shahar men Almaty, Shymkent qalalarynda synaqtan ótkizilip jatqan 5G býyn tehnologııasyn bıyl osy qalalarda kommersııalyq maqsatta engizý kózdelip otyr. 2021 jyldyń qorytyndysyna sáıkes, 1 257 aýyl talshyqty-optıkalyq baılanys jelileri (TOBJ) arqyly keń jolaqty ınternetpen, 928 eldi meken mobıldi ınternetpen qamtyldy.
Baılanys sapasyn arttyrýǵa da basa nazar aýdarylyp jatyr deıdi mınıstrlik ókilderi. Byltyr 611 eldi mekende mobıldi ınternet jaqsartylsa, bıyl da 157 aýyldaǵy ınternet sapasyn arttyrý jumystary josparlanǵan. 2021 jyly vedomstvo mamandary baılanys sapasy boıynsha 562 tekseris júrgizip, bekitilgen parametrlerdi buzǵany úshin baılanys operatorlaryna 132 mln teńge aıyppul salyndy. Bul oraıda bıyl sapasyz baılanysqa aıyppul kólemin 1 500 AEK-ke deıin kóterý josparda bar.
Qazir Kaspıı teńiziniń túbinde TOBJ salý jumystary qolǵa alynyp, bul – elimizdi Eýrazııa ortalyǵyndaǵy sıfrly habqa aınaldyrý jolyndaǵy mańyzdy jáne aýqymdy jobalardyń birine aınaldyrady.
Sondaı-aq byltyr Qazaqstan +997 telefondy kodyn rezervke alyp, biraq áli de +7 aımaǵynda qalý múmkindigi bar. Osy baǵytta quzyrly organ mamandary reseılik tarappen jáne Halyqaralyq elektrbaılanys odaǵymen tıisti jumystar júrgizip jatyr.
Memlekettik qyzmetterdi jetildirý, bıznes-prosesterge reınjınırıng jasaý jumystary da qarqyndy júrip jatyr. Bul oraıda 110 bıznes-proseske analız jasalyp, qajetsiz úderister anyqtaldy. Qazir ózekti prosesterdi sıfrlaý bastalyp, oń nátıjesi baıqalyp jatyr.
Búginde birqatar mańyzdy memlekettik qyzmet proaktıvti túrde kórsetiledi. Alaıda mınıstrdiń aıtýynsha, barlyq qyzmet proaktıvti formatta usynylýy tıis, demek azamattar túrli mekemelerge júginip, taban tozdyrmaýy kerek. Osy baǵytta mınıstrlik 2022 jyly taǵy 20 proaktıvti qyzmet engizýdi josparlap otyr.
Alqa májilisi barysynda elimizdegi aeroǵarysh ónerkásibi salasyndaǵy máseleler, geodezııa jáne kartografııa salasynda atqarylyp jatqan jumystar men «Halyq únine qulaq asatyn memleket» tujyrymdamasy aıasynda júzege asyp jatqan jobalar, sıfrly servısterdiń engizilýi jónindegi mańyzdy máseleler pysyqtalyp, jan-jaqty talqylandy.
