Mazmundy is-sharanyń ashylýynda Ulttyq mýzeı dırektory Arystanbek Muhamedıuly kórmeniń maqsaty týraly aıta kelip, kúmis kómeı ánshiniń Qazaq eliniń ǵana emes, kezindegi Keńes Odaǵynyń maqtanyshyna aınalǵandyǵyn jetkizdi.
Odan keıin sóz alǵan R.Baǵlanova atyndaǵy qoǵamdyq qordyń tóraǵasy, ánshiniń kelini Maral Baǵlanova ardaqty tulǵanyń ǵasyrlyq mereıtoıyna arnap kóptegen is-sharalar ótip jatqandyǵyn, sonyń ishinde búgingi kórmeniń mańyzy bólek ekendigin aıtty.
«Sebebi kórmege anamyzdyń ózi qoldanǵan jeke zattary usynylyp otyr. Onyń bári – bizdiń otbasymyz úshin baǵaly jádigerler sanalady. Osy is-sharany ótkizýge muryndyq bolǵan azamattarǵa alǵysymdy aıtamyn. Ol kisi bizdiń ǵana anamyz emes, barsha halyqtyń anasy», dedi kelini. Sondaı-aq Roza apamyzdyń uly Tájen Baǵlanov anasy jaıyndaǵy qyzyqty estelikterimen bólisti.
Kórmege aıtýly óner ıesiniń ómirinen syr shertetin otbasylyq qorynan alynǵan sahnalyq kıimderi, áshekeı buıymdary, marapattary men jeke tutynǵan zattary, fotosýretteri qoıyldy. Bul jádigerlerdiń bári jurtshylyqtyń qyzyǵýshylyǵyn týǵyzyp, jyly áserge bóledi.
Odan ári mádenı shara dóńgelek ústel májilisine ulasyp, onda belgili kompozıtor Serik Erkimbekov, ánshi Maıra Ilıasova, kúıshi Janǵalı Júzbaı, Mádenıet qaıratkeri Qýanysh Ábdiqalymov jáne t.b. zııaly azamattar qazaq án óneriniń damýyna ólsheýsiz úles qosqan ánshiniń ómiri men shyǵarmashylyǵy týraly salmaqty oı qozǵady.
Ásirese Qazaqstannyń eńbek sińirgen qaıratkeri Janǵalı Júzbaı: «Qazaq estradasynyń óz úlgisimen qalyptasqan tarıhy, mektebi bar. Osy mýzykalyq baǵyttyń elimizde keń qanat jaıýyna Roza Baǵlanova zor úles qosty. Sol sebepti de, men ol kisini «Qazaq estradasynyń alǵashqy qarlyǵashy» dep ataǵym keledi», dep parasatty pikirin bildirdi.
Sonymen qatar is-shara aıasynda Roza Baǵlanova atyndaǵy «Qazaqkonsert» memlekettik uıymynyń ánshileri jınalǵandarǵa ásem án syılap, kórme mazmunyn baıytty.
