Kollajdy jasaǵan Qonysbaı ShEJIMBAI, «EQ»
2022 jyldyń tek aqpan aıynyń ózinde «Jetisý», «Áýejaı-Astana», «Áýejaı-Aqtóbe», «Qazyǵurt», «Áýejaı-Shymkent», «Áýejaı-Aktaý» keden beketterinde deklarasııalanbaǵan qolma-qol aqsha qarajattaryn alyp ketýdiń 51 deregi anyqtalǵan. Olardyń jalpy somasy 995 410 dollardy quraǵan.
Jalpy, bıylǵy aqpan aıynda 50 ákimshilik quqyq buzýshylyq týraly, materıal toltyrylǵan. Sonyń ishinde taýarlardy, qolma-qol qarajatty, aqsha quraldaryn deklarasııalamaý nemese kedendik deklarasııalaýdy anyq málimdemeý, qujattarda maǵlumattardy ashyp jazbaý sekildi zań buzýshylyqtar bar. Mundaı anyqtalǵan derekterge barlyǵy 1 531 500 teńge aıyppul salynǵan.
Memlekettik kirister komıtetiniń habarlaýynsha, Almaty qalasynda 2022 jyldyń aqpan aıynda jeke tulǵalarǵa 37 ákimshilik quqyq buzýshylyq týraly materıaldar toltyrylǵan jáne qylmystyq quqyq buzýshylyq sıpatyndaǵy bir derek anyqtalǵan. Jeke tulǵalar 298 mln teńgeden astam, naqty aıtqanda 688 262 dollardy deklarasııalamastan alyp ótpek bolǵan, olarǵa salynǵan aıyppul kólemi– 1 133 310 teńge.
Almaty qalasynyń halyqaralyq áýejaıynda «Jetisý» keden beketiniń qyzmetkerleri «Almaty – Ystanbul» qatynasyndaǵy áýe reısimen ushýǵa baǵyttalǵan Qazaqstan azamatyn toqtatqan. Ony ustaý kezinde 97 myń dollar somasynda deklarasııalanbaǵan aqsha qarajaty anyqtalǵan. Materıal odan ári tergeý úshin Almaty qalasy boıynsha Ekonomıkalyq tergeý departamentine jiberildi.
Al elordada 2022 jyldyń aqpan aıynda jeke tulǵalarǵa 9 ákimshilik quqyq buzýshylyq týraly materıaldar toltyrylǵan. Bul azamattar 101 341 421 teńgeni deklarasııalamastan alyp ótpek bolǵan, olar 275 670 teńge kóleminde aıyppul arqalaǵan.
«2022 jylǵy 11 aqpanda Nur-Sultan qalasynyń «Nursultan Nazarbaev» halyqaralyq áýejaıynda «Nur-Sultan – Antalıa» halyqaralyq áýe reısimen ushyp bara jatqan jolaýshylar kedendik baqylaýdan ótkennen keıin «Áýejaı-Astana» keden beketiniń qyzmetkerleri UQK Shekara qyzmetiniń qyzmetkerlerimen birge Qazaqstan azamattaryn ustady. Olardan 32 552 dollar kóleminde deklarasııalanbaǵan aqsha qarajaty anyqtaldy. Sondaı-aq Nur-Sultan qalasy boıynsha departamentiniń «Áýejaı-Astana» keden beketiniń qyzmetkerleri taǵy bir azamatty ustap, odan 43 070 dollar somasynda deklarasııalanbaǵan aqsha qarajaty anyqtaldy», deıdi Memlekettik kirister komıteti basqarma basshysynyń orynbasary Aınur Sartaeva.
Memlekettik kirister komıteti «Qazaqstan Respýblıkasyndaǵy kedendik retteý týraly» Qazaqstan Respýblıkasy Kodeksiniń 343-baby 1-tarmaǵynyń 7-tarmaqshasy boıynsha qolma-qol aqsha mindetti túrde kedendik deklarasııalaýdan ótýge tıis ekenin eske salady. Kedennen óterde qolma-qol aqshanyń jáne jol chekteriniń shyǵý tegi jáne maqsaty týraly málimetterdi kórsete otyryp, syrttan ákelinetin nemese áketiletin qolma-qol shetel valıýtasy, basqa da aqsha jazbasha túrde naqtylanyp, rastalýy kerek.
Mamandardyń aıtýynsha, jeke tulǵalar tek 10 myń dollar balamasyna teń nemese odan aspaıtyn qolma-qol ulttyq jáne shetel valıýtasyn Qazaqstanǵa ákelýge nemese alyp shyǵýǵa quqyly.
